Read Pahari, Mahasu इब्रा 12 Bible Online

इब्रा 12 - Pahari, Mahasu bible

इब्रा 12

¹आमु फिदिया लै भौरी सारै लोगु री ज़िन्दगी दी इणै औनैणै ई ज़ो आमुकै बोलाई कि विश्वास का सा। एथीलै आशौ, हर एक रोकणै वाल़ी च़ीज़ और उल़झ़ाणै वाल़ै पाप दूर कौरीयौ, सेज़ी फेट ज़ासदी आमारै फेट मारणी आ सौबरा कौरी फेट दैऔ,

²आमै विश्वासा रै काम कौरणै वाल़ै और पाक्कै कौरणै वाल़ै यीशु भिलै देखदै थाकेऊ लागी। यीशु तिऐं खुशी लै ज़ो तेसरै सामनै थी छ़ाड़ी ऐन्दी, लाज़ी री कुछ़ फिकर ना कौरीयौ क्रुसा रौ दुःख सहन कियौ, और सौरगा दी परमेश्‍वरा री सुल़टी भिलै बोशौ।

³एथीलै यीशु रै औनैणै माथै बिच़ार कौरौ, ज़ुणिऐ पापीऊ रै ज़ौरिऐ दैऔ औन्दै कौष्ट एथीलै सहन कौरै कि तुमै दु:खी हुइयौ हिम्मत ना छ़ाड़ौ।

⁴तुमुऐ पापा रै खिलाफ लौड़दै-लौड़दै इबी झ़ाऊं तेस आइलै इणी लौड़ाई नाईं कि तुमारौ लोऊ बौहौ औलौ।

⁵और तुमुऐ सै हिम्मती वाल़ी शिक्षा पोरु बिसरी गोई, ज़ो परमेश्‍वरै तुमुकै छ़ोहरु मानियौ थी देई ऐन्दी, “ओ मैरौ छ़ोहरु, प्रभु री डांट हौल़खी बूश नाईं ज़ाणौ, और ज़ैबै सेऊ ताऊं धौमकावा लौ ता हिम्मत ना छ़ाड़ै।

⁶कैलैकि प्रभु ज़ासकु प्यार कौरा सा, तेस धौमकावा भी, और ज़ास आपणौ छ़ोहरु चाणा आ, तेसलै सौज़ा भी दिया सा।”

⁷तुमै दु:ख बाबा री डांट सौमझ़ियौ सहन कौरौ। परमेश्‍वर तुमु छ़ोहरु सौमझ़ियौ तिणौ बरताऔ कौरा आ। सेऊ केज़ौ छ़ोहरु आ ज़ास बाब नाईं डांटदौ?

⁸सै डांट ज़ो सारेऊ लै मिला आ, अगर तेसलै नाईं मिली औली, ता तुमै परमेश्‍वरा रै असली छ़ोहरु नाईं ई।

⁹ज़ैबै कि आमारौ दुनिया रौ बाब भी आमु डांटा थौ और आमुऐ तिउंरी इज़्ज़त की। तैबै आमुलै औज़ौ ज़ादौ ज़ुरुरी आ कि ज़ेबी आमारौ आत्मिक बाब आमु धौमकावा आ तैबै आमै तेथकु भी बौड़ियौ तिउंरै वशा दी रौउलै ताकी आमुलै सौदा री ज़िन्दगी मिला।

¹⁰आमारौ दुनिया रौ बाब ता आपणी सौमझ़ी कौरी थोड़ै दिना झ़ाऊं आमु धौमकावा आ, पर परमेश्‍वर आमारी भौलाई लै आमु धौमकावा आ, ताकी आमै भी तेसरी पवित्रा रै हक्कदार हुई।

¹¹ज़ेबी डांट मिला आ तेबी डांट आच़्छ़ी नाईं लागदी बल्कि सै डांट दु:ख दैणै वाल़ी लागा आ। पर ज़ुण धौमकाउणै कु शिक्षा पा सा बासिऐ तिउंलै आरामा आइलै धार्मिकता रौ इनाम मिला सा।

¹²एथीलै उठौ और चुस्त हुऔ,

¹³सिधी बाटा दी हांडदै थाकौ लागी ताकी ज़ो लोग तुमु पिछ़ु हाण्डा ई सै कमज़ोर और लौंगड़ै हुणै रै बावज़ूद भी सै नाश ना हुआ पर पोरु बौच़ा।

¹⁴सौभी आइलै मेल-मिलाप छ़ाड़ौ, और पवित्र ज़िन्दगी ज़िउणा लै हर तरिकै कौरी कोशिश कौरदै थाकौ लागी। ज़ासरै बिणा कोई प्रभु केबी भी नाईं देखी बौल़दौ।

¹⁵तुमै खौबरदार रौऔ कि कोई भी आदमी परमेश्‍वरा री बौड़ी दया कु दूर ना रौआ, ध्यान दैऔ कि अविश्वासा री केज़ी भी कौड़ुवी ज़ौड़ ज़ौमियौ कौष्ट ना दिया, ज़ेथ कौरी भौरी लोग अशुद्ध हुआ।

¹⁶तुमु मांझ़िऐ कोई भी ज़ौणौ गान्दै काम कौरणै वाल़ौ ना च़ांई हुणौ, या अब्राहमा रै कौनाल़डु एसावा ज़िणै पापी ना हुआ ज़ुणिऐ एकी बारै री रोटी रै बौदल़ै आपणै पेहलै ज़ेठै छ़ोहरु हुणा री ज़ागाह बेच़ी।

¹⁷तुमै ज़ाणाई कि बासिऐ ज़ेबी तिणीऐ आशीष पाइणी च़ांई ता तेसलै नाईं मिली, और लेरी-लेरीयौ आशीष मांगणै माथै भी तेसलै ज़िऊ बौदुल़णै रौ मौकौ नाईं मिलौ।

¹⁸तुमै सीन्नै पहाड़ी काऐ नाईं पौउंच़ै ज़ास देखी और छ़ुईं सौका थै, और इदै ना ता आगी री लुपी आसती और ना ता काल़ै बादल़, और ना ता भौरी न्यारौ, ना पाणी-बागुर आसतौ।

¹⁹और इदै ना ता कौरनाल़ा री बाच़, और ना बोलणै वाल़ै रै इणी बाच़ा आ ज़ास शुणियौ इस्राइली लोग औरज़ कौरा थै कि, “आबै आमु आइलै औज़ौ बुशै नाईं लाऔ।”

²⁰तिऊं लोगुऐ इणौ एथीलै बोलौ कैलैकि सै तेस हुकम नाईं सौई सौकै ज़ो परमेश्‍वरै तिउंलै दैऔ थौ, “अगर कोई जानवर भी पहाड़ी छ़ुआं ता तेस ढोल़ियाऔ।”

²¹और सेऊ दर्शण इणौ डराउणौ थौ कि मुसै बोलौ, “हाऊं भौरी डौराऊ और काम्बाउ।”

²²तुमै सिय्योना री पहाड़ी काऐ, ज़ो ज़िउंदै परमेश्‍वरा रौ इलाकौ आ पौउंच़ी गौऐ। एऊ सौरगा रौ यरुशलेम आ ज़िऐ लाखौ सौरगदूत खुशी रौ साज़ौ मौनावा ई।

²³तुमै परमेश्‍वरा रै ज़ेठै री खुम्बल़ी दी आशै औन्दै ज़ासरै नाऊं सौरगा दी लिखै औन्दै। तुमै आपु परमेश्‍वरा काऐ आशै ई ज़ुण सारेऊ रौ फैसलै कौरणै वाल़ौ आ। तुमै सौरगा री धौर्मी लोगु री आत्मा काऐ आशै ई ज़ो पाक्कै ई चाणै औन्दै।

²⁴तुमै यीशु काऐ आशै ई ज़ुण आमुलै नौऐं वायदै रौ बिशटु आ और छ़िड़काऐ औन्दै तेस लोऊ काऐ आशै ई, ज़ो हाबिला रै लोऊ कु ज़ादी आच़्छ़ी बुशै बोला सा।

²⁵खौबरदार रौइऔ, और परमेश्‍वरा री मानौ ज़ुण तुमुलै बोलदै आ लागौ औन्दौ। इस्राइला रै लोग परमेश्‍वरा री सौज़ा कु नाईं बौच़ी सौकै कैलैकि तिंउऐ हुकम नाईं मानै ज़ेबी मुसै सै खौबरदार किऐ। तैबै आमै भी सौज़ा कु किणै बौच़ी सौकी अगर आमै तेसरी नाईं मानु लै ज़ुण आमु सौरगा कु खौबरदार कौरा आ?

²⁶ज़ेबी परमेश्‍वरै सीन्नै पहाड़ी कु बुशै लाई थी सेज़ै बौगतै तेसरी बाच़ै धौतरी झ़ुंगाई, पर आबै तिणीऐ इणौ वायदौ कियौ आ कि, “एकी बारै तौंइऐ हाऊं सिरफ धौतरी नाईं पर सौरग भी झ़ुंगाउवाऊ।”

²⁷और एज़ी बूश, “एकी बारै औज़ौ” एज़ी बूश पौगड़ी कौरा आ कि चाणी ऐन्दी सारी च़िज़ै पोरु झ़ुंगाइयाई, पोरु टौल़णी ई। ज़ो च़िज़ै नाईं झ़ुंगाइंदी, सै सौदा बौणी रौआ।

²⁸आमुकै ज़ो राज़्य आ मिलौ औन्दौ सेऊ नाईं झ़ुंगाइंदौ। एथीलै आमुऐ परमेश्‍वरा रौ धन्यबाद दैंदै च़ांई थाकणौ लागी और तेसरी मौरज़ी रै मुताबिक भौक्ती और इज़्ज़ता आइलै तेसरी आराधना कौरदै थाका लागी।

²⁹कैलैकि आमारौ परमेश्‍वर छ़ार चाणनै वाल़ी आग आ।