Read Pahari, Mahasu इब्रा 4 Bible Online

इब्रा 4 - Pahari, Mahasu bible

इब्रा 4

¹परमेश्‍वरा रै आरामा री ज़ागाह दी डेउणै रौ वायदौ इबी झ़ांऊ आ। ता आमु खौबरदार रौउणौ च़ांई, कि तुमु मांझ़िऐ कु कोई भी लोग अयोग्य ना बौणा कि तिऐ ना डेई सौका।

²कैलैकि आमुकै भी तिऊं इस्राइली लोगु ज़िणौ खुशी री खौबर शुणाई। पर तिऊं लोगु लै शुणै औन्दै वचना कु कोई फाइदौ ना हुऔ। कैलैकि तिऊं लोगुऐ वचन विश्वासा आइलै ना अपणाऔ।

³पर एथीलै आमुऐ, ज़ुणिऐ परमेश्‍वरा रै वचना माथै विश्वास कियौ आ, तिऐं आरामा री ज़ागाह दी डिआई। ज़िणौ तिऊं ओरीऊ लै परमेश्‍वरै बोलौ, “मुंइऐ आपणै रोशा दी कसम खाई कि, ‘सै मैरै आरामा री ज़ागाह दी नाईं आशी बौल़दै।’ ” हालांकी धौतरी रै बौणनै रै बौगता कु तेसरै काम पुरै हुई गौऐ थै।

⁴कैलैकि सातवै दिना रै बारै दी पवित्रशास्त्रा दी इणौ आ लिखौ औन्दौ कि, “परमेश्‍वरै सातवै दिनै आपणै सारै काम खातम कौरीयौ आराम कियौ।”

⁵आमुऐ इणौ भी पौड़ौ कि, “सै मैरै आरामा री ज़ागाह दी नाईं आशी बौल़दै।”

⁶ता इऐ बूश पाक्की आ कि कुछ़ लोगु लै आरामा री ज़ागाह दी आशणै री आबै भी खुली आज़ादी आ, और ज़ासकै तेसरी खुशी री खौबर पैहलै शुणाई आ सै हुकम ना मानणै री वज़ाह कु आरामा री ज़ागाह दी नाईं आशी बौल़ै,

⁷एथीलै सेऊ केज़ौ खास दीन ठहराइयौ एती दिना बासिऐ दाऊदा री किताबी दी तेसलै “आज़ कौ दीन” बोला सा। ज़िणौ पैहलै बोलौ, “अगर आज़ तुमै तेसरी बाच़ शुणा लै, ता आपणौ मन काठौ ना कौरौ।”

⁸अगर यहोशु इस्राइलिऊ परमेश्‍वरा रै वायदै रै मुताबिक आरामा री ज़ागाह दी निआं, ता तेथ बासिऐ दुजै दिनै री बुशै नाईं हुआ थी।

⁹एथीलै इणौ ज़ाणौ कि परमेश्‍वरा रै लोगु लै इबी भी सातवै दिना रौ आरामा बाकी आ।

¹⁰कैलैकि ज़ुण तेसरै आरामा दी डेवै, तिणीऐ भी परमेश्‍वरा ज़िणै आपणै काम पुरै कौरीयौ आराम कियौ आ।

¹¹एथीलै आमुऐ तिऐं आरामा री ज़ागाह दी डेउणै री कोशिश च़ांई कौरणी, किऐ इणौ ना च़ांई हुऔ कि कोई आदमी तिऊं ज़िणै हुकम ना मानियौ पोरु लोटा।

¹²कैलैकि परमेश्‍वरा रौ वचन ज़िउंदौ और असरदार आ, सेऊ केज़ी भी दुई धारी वाल़ी तलवारा कु भी पोइनौ आ। और प्राण और आत्मा, गांठ-गांठ और गुदै-गुदै अलग कौरीयौ आर-पार छ़ोपा और मौना रै सोच़ और विच़ार पौरखा।

¹³दुनिया री कोई भी च़ीज़ परमेश्‍वरा कु च़ोरुई ऐन्दी नाईं आसती। पर तेसरी आखिऊ काऐ सारी च़िज़ै खुली और पौगड़ी ई, तेसकै आमुऐ लेखौ जा दैणौ।

¹⁴यीशु ज़ुण सौरगा दी डैऔ, मतलब परमेश्‍वरा रौ छ़ोहरु यीशु, सेऊ आमारौ परधान याजक आ। ता आशौ, आमै आपणौ विश्वास ज़ो आमै मानी ई काठै कौरी थांबी छ़ाड़ी।

¹⁵कैलैकि आमारौ इणौ परधान याजक नाईं ज़ो आमारी कमज़ोरी दी आमु आइलै दुखी ना हुई बौल़ा। पर सेऊ सारी बुशा दी आमु ज़िणौ ता पौरखुऔ, तैबै भी सेऊ बिण पापा रौ निकल़ौ।

¹⁶एथीलै आशौ, आमै हिम्मत कौरीयौ परमेश्‍वरा रै काऐ डेई, ज़ुण बौड़ी दया कौरीऐ आ भौरुऔ औन्दौ तैबै परमेश्‍वर आमु माथै दया और किरपा देखावा, और ज़ुण ज़रुरता रै बौगता दी आमारी मज़द कौरा।