Read Pahari, Mahasu इब्रा 5 Bible Online

इब्रा 5 - Pahari, Mahasu bible

इब्रा 5

¹हर एक परधान याजक लोगु मांझ़िऐ कु छ़ांटिया आ, और लोगु लै तिऊं बुशु रै बारै दी ज़ो परमेश्‍वरा कु मेल छ़ाड़ा, मानौ औन्दौ कि भेंट और पापा री बौल़ी कौरदै थाका लागी।

²कैलैकि सेऊ आपु ई कमज़ोरी रै वशा दी आ एथीलै सेऊ बिणा औकली वाल़ै, और भुलै भौटकै औन्दै लोगु आइलै कौंउल़िऐ आच़्छ़ौ बर्ताव कौरी सौका।

³परधान याजक हुणै रै नातै तेसलै ज़ुरुरी आ कि, ज़िणौ लोगु लै तिणौ ई आपुलै भी पापा री बौल़ी च़ौड़ावा।

⁴इऐ इज़्ज़ती री ज़ागाह कोई आपु कु नाईं निंदौ, ज़ेबी झ़ांऊ कि हारुना ज़िणौ परमेश्‍वरा री तौरफा कु छ़ांटिया नाईं लौ।

⁵तिणौ ई मसीहै भी परधान याजक बौणनै री बौड़ाई आपु कु नाईं कौरी, पर तेसलै तिणीऐ देई, ज़ुणिऐ तेसलै बोलौ थौ, “तू मैरौ छ़ोहरु ई, आज़ हाऊं पौगड़ौ कौराऊ कि, हाऊं तैरौ बाब ऊ।”

⁶एथीलै इणी ई सेऊ दुजै ज़ागाह दी भी बोला कि, “तू मलिकिसिदका री रीती माथै सौदा लै याजक आ।”

⁷यीशुऐ धौतरी दी रौइणै रै बौगता दी ज़ोर-ज़ोरै, औटाई-औटाइयौ और लेरी-लेरीयौ परमेश्‍वरा कु ज़ो तेस मौउता कु बौच़ाई सौका थौ, प्राथना और औरज़ की, और भौक्ती री वज़ाह कु तेसरी शुणी।

⁸हालांकी यीशु परमेश्‍वरा रौ छ़ोहरु थौ, तैबै भी तिणीऐ दुःख उठाई-उठाइयौ हुकम मानणौ शिखौ,

⁹और पाकौ बौणीयौ, आपणै सारै हुकम मानणै वाल़ेऊ लै सौदा छ़ुटकारै री वज़ाह हुई गौ,

¹⁰और तेसलै परमेश्‍वरा री तौरफा कु मलिकिसिदका री रीती माथै परधान याजका री ज़ागाह मिला।

¹¹एथरै बारै दी आमुऐ भौरी का बुशै लाइणी ई, पर इउंरौ सौमझ़ाउणौ भी कठिण आ, कैलैकि तुमै उंच़ौ शुणदै लागी गौऐ ई।

¹²सौच़्च़ी इबी झ़ाऊं ता तुमु गुरु बौणनौ च़ांई थौ। पर तुमुकै ता इबी भी कास इणै आदमी री ज़ुरत आ, ज़ुण तुमुकै दुजी बारै परमेश्‍वरा री शिक्षा री पैहली बुशै शिखावा। तुमै ता इणै हुई गौऐ आ कि तुमुलै नाज़ा रै बौदल़ै इबी झ़ांऊ दूध ई च़ांई।

¹³दूध पिणै वाल़ै लोल़डेऊ लै ता धार्मिकता री शिक्षा री पैहच़ाण नाईं औन्दी, कैलैकि सेऊ ता लोल़डौ आ।

¹⁴पर नाज़ बौड़ेऊ लै आ, ज़ासरी ज्ञाना री सौमझ़ भ्यास कौरदै-कौरदै भौलै-बुरै दी भेद कौरणै दी पाकै हुई गोई आ।