Read Pahari, Mahasu इब्रा 6 Bible Online

इब्रा 6 - Pahari, Mahasu bible

इब्रा 6

¹एथीलै आशौ आमै मसीह री शिक्षा री पैहली बुशेऊ कु औगांऊ बौड़ियौ पक्काई री भिलै तरक्की कौरी। आमुऐ बुरै कामा कु मन बौदुल़णै ज़ो मौउती भिलै निंआई, और परमेश्‍वरा माथै विश्वास कौरणै री तौंइऐ बुशै नाईं च़ांई लाइणी।

²और तुमुकै बपतिस्मा रै बारै दी, और मुंडा माथै हाथ छ़ाड़णै, मौरै औन्देऊ रौ ज़िउंणौ, और आखरी फैसलै री शिक्षा री पौई तौंइऐ पाइणै री ज़ुरत नाईं।

³अगर परमेश्‍वर च़ाहा लौ ता हाऊं तुमुलै औज़ौ भी पाक्की शिक्षा दियाऊ।

⁴ज़ो लोग आपणौ विश्वास पोरु छ़ाड़ाई तिऊं मन बौदुल़ना लै वापिस नाईं आणी सौकदै। तिंउऐ एकी बारै सौच़्च़ाई ज़ाणी ज़ो परमेश्‍वरा री तौरफा कु आशा आ और तिउंकै सौरगा रौ वरदान मिलौ आ, और तिंउऐ ओरीऊ आइलै पवित्र आत्मा भी पाई।

⁵तिंउऐ परमेश्‍वरा री तौरफा कु आशै औन्दै आच़्छ़ै वचन च़ौगरै ई, और तिंउऐ आशणै वाल़ै बौगता री शक्ति भी च़ौगरी आ।

⁶अगर सै परमेश्‍वरा कु दूर हुई गौऐ ता तिऊं वापिस आणनै रौ तरिकौ नाईं आ। कैलैकि सै परमेश्‍वरा रौ छ़ोहरु तौंइऐ क्रुसा माथै च़ड़ावा ई और सारेऊ रै सामनै तेसरौ मज़ाक कौरा ई।

⁷ज़ो लोग आच़्छ़ी शिक्षा अपणावा ई सै इणी ज़मीना ज़िणै ई ज़िऐ हर बौगतै पाणी लागा आ। अगर सै ज़बीन आच़्छ़ी आ, ता इऐ मज़दुरा कै आच़्छ़ी फसल दिया आ और इऐ परमेश्‍वरा रै देई ऐन्दी आशीष आ।

⁸दुजै लोग तिऐं ज़मीना ज़िणै ई ज़ेथदी झ़ाढ़ी और कुम्बरै लागा ई, ज़ेथरी कोई किम्मत नाईं। परमेश्‍वर तिऐं ज़बीन शापित कौरा आ, और तेथदी ज़ौमणै वाल़ी सारी बेकार झ़ाड़िऊ और कुम्बरेऊ पोरु ज़ाल़ा सा।

⁹पर ओ मैरै प्यारै भाईउओ, तुमै आच़्छ़ै काम कौरदै ई लागै औन्दै, कैलैकि परमेश्‍वरै तुमै पैहला ओउलै बौच़ाई गौऐ। एथीलै इऐ सारी खौबरदार कौरणै वाल़ी बुशै तुमुलै नाईं ई।

¹⁰कैलैकि परमेश्‍वर केबी भी गलत फैसलौ नाईं कौरदौ, कि तुमारै काम और तेस प्यार पोरु बिसरा, ज़ो तुमुऐ तेसरै नाऊं लै इणै कौरीऐ देखाल़ौ, कि तेसरै लोगु री सेवा की और कौरदै आ लागै औन्दै।

¹¹पर आमै भौरी च़ाई कि तुमु मांझ़िऐ कु हर एक आदमी आखरी झ़ांऊ पुरी आशालै इणी ई कोशिश कौरदै थाकौ लागी।

¹²ताकी तुमै आल़सी नाईं हुआ लै, पर तिऊंरौ पालन कौरौ ज़ो विश्वास और सौबरा री वज़ाह कु वायदा रै वारीस हुआई।

¹³परमेश्‍वरा कै अब्राहमा लै वायदौ दैंदी बारै, आपु कु बौड़ौ कोई नाईं थौ, ज़ेथरी सेऊ कसम खाई सौका थौ, एथीलै आपणी ई कसम खाई।

¹⁴तिणीऐ बोलौ कि, “हाऊं सौच़्च़ी ताउंलै भौरी आशीष दियाऊ, और तेरी सन्तान भौरी बौड़ाउवा ऊ।”

¹⁵और अब्राहमै भौरी बौगता झ़ाऊं सौबरा छ़ाड़णै बासिऐ वायदै री आशीष पाई।

¹⁶आदमी ता आपु कु कास बौड़ै री कसम खा ई, और तिंउरै हर एक झ़ौगड़ै रौ फैसलौ कसमा कु पाकौ हुआ सा।

¹⁷एथीलै परमेश्‍वरै भी कसम खाई, इणै कौरी सेऊ लोगु कै ज़ास आइलै तिणीऐ वायदौ थौ कियौ औन्दौ इणौ देखाउणौ च़ाहा थौ कि ज़ो तिणीऐ वायदौ कियौ आ तेस सेऊ पुरौ कौरा आ।

¹⁸ता इदै दुई बुशै ई तेसरै वायदौ और तेसरी कसम ज़ो केबी भी नाईं बौदल़िंदी, और ज़ेथरै बारै दी परमेश्‍वर केबी भी झ़ूठ नाईं बोली सौकदौ। एथीलै आमै ज़ुण परमेश्‍वरा रै नज़दीक बौच़णा लै आशै ई और ज़ो आश तिणीऐ आमुकै देई आ, तेस थांबीयौ, भौरी खुश ई।

¹⁹सै आशा आमारै प्राणालै समुन्दरा रै ज़ाहज़ा रै लांगरा ज़िणी पाक्की और टिकाऊ आ, ज़ो आमु पौरदै रै ज़ौरिऐ परमेश्‍वरा रै महान पवित्र ज़ागाह दी नियां आ,

²⁰ज़िऐ यीशु आमारी तौरफा कु आमुकु पैहलै डैऔ आ। सेऊ मलिकिसिदका री रीती दी सौदा लै परधान याजक बौणी गौ आ।