Read Pahari, Mahasu इब्रा 7 Bible Online

इब्रा 7 - Pahari, Mahasu bible

इब्रा 7

¹मलिकिसिदक शालेम इलाकै रौ राज़ौ, और परमपरधान परमेश्‍वरा रौ याजक थौ। ज़ेबी अब्राहम राज़ेऊ युद्धा दी हौराइयौ वापिस थौ आशदै लागौ औन्दौ, ता मलिकिसिदिक तिऊंकु मिलौ और तेसलै आशीष देई।

²अब्राहमै मलिकिसिदिका कै युद्धा कु ज़ीतीयौ आणी ऐन्दी सारी च़िज़ेऊ रौ दौसूवौ हिस्सौ भी दैऔ। मलिकिसिदिका रै नाऊं रौ मतलब “धार्मिकता रौ राज़ौ आ।” पर ज़ैबै कि शालेमा रै नावां रौ मतलब “शान्ति” आ ता सेऊ “शान्ति रौ राज़ौ” भी आ।

³ज़ासरौ ना बाब, ना मां, ना वंश आ, ज़ासरै दिनै रौ ना ता शुरुआत आ और ना ज़िन्दगी रौ अन्त आ। पर परमेश्‍वरा रौ छ़ोहरु रौ रूप बौणीयौ सेऊ सौदा लै याजक बौणी रौआ सा।

⁴आबै एथ माथै ध्यान कौरौ कि मलिकिसिदक केती महान थौ, ज़ासलै आमारै स्याणै अब्राहमै युद्धा दी ज़िती ऐन्दी सारी च़िज़ेऊ रौ दौसूवौ हिस्सौ भी दैऔ।

⁵मुसा रै नियम लेवी रै वंशा कै इणौ शिखावा ई कि ज़ुण याजक बौणा लौ तिणीऐ इस्राइली लोगु, मतलब ज़ो तिउंरै आपणै लोग ई तिऊं सारेऊ कु दौसूवौ हिस्सौ निणौ च़ांई। पर सै याजक और दुजै लोग भाईऊ ज़िणै ई कैलैकि सै अब्राहमा रै वंशा रै ई।

⁶पर एऊ आदमी मलिकिसिदिक ज़ुण लेवी रै वंशा कु नाईं थौ, अब्राहमा कु दौसूवौ हिस्सौ नियौं, हालांकी अब्राहमा कै परमेश्‍वरा कु वायदै थै मिलै औन्दै तेसरै बावज़ूद भी मलिकिसिदिकै तेसलै आशीष देई।

⁷आमै आच़्छ़ा कौरी ज़ाणी ई कि आशीष देणै वाल़ौ आशीष निणै वाल़ै कु बौड़ौ आ।

⁸और इदै ता मौरणै वाल़ै आदमी दौसूवौ हिस्सौ नियां आ, पर मलिकिसिदिक ज़ासकै अब्राहमै दौसवौ हिस्सौ दैऔ थौ पवित्रशास्त्र बोला आ कि सेऊ इबी झ़ाऊं ज़िउंदौ आ।

⁹ता आमै इणौ भी बोली बौल़ी ई, कि लेवी भी, ज़ो दौसूवौ भाग नियां सा, अब्राहमा रै ज़ौरिऐ दौसूवौ हिस्सौ दैऔ।

¹⁰ज़ेबी मलिकिसिदक अब्राहमा कु मिलौ तेबी ता लेवीऊ रौ ज़नम भी नाईं हुऔ थौ। कैलैकि लेवी ता सेज़ै बौगतै आपणै बाब अब्राहमा रै शरीरा दी थौ।

¹¹हालांकी मुसा रै नियमा दी इणौ आ बोलौ औन्दौ कि याजक सिरफ लेवी रै खानदाना कु हुणौ च़ांई, कैलैकि याजक कासी भी पाक्कै नाईं चाणी सौकदै। एथीलै हारुन याजका रै टौबरा रै बौदल़ै ज़ुण लेवी रै वंशा रौ थौ, मलिकिसिदका ज़िणै एक याजका री ज़ुरत आ।

¹²कैलैकि ज़ेबी याजका रौ पद बौदल़ा ई, ता नियमा रौ भी बौदुल़णौ भी ज़ुरुरी आ।

¹³आमै इऐ बुशै मसीह रै बारै दी बोली ई ज़ुण दुजै खानदानी कु थौ। कोइऐ भी तेस खानदाना मांझ़िऐ कु याजका ज़िणी तिऐं बेदी री सेवा नाईं की।

¹⁴सारै ज़ाणाई कि आमारौ प्रभु यीशु यहुदा रै खानदाना कु पैदौ हुऔ आ, और मुसै यहुदा रै खानदाना कु याजक हुणै रै बारै दी केबी कोई बुशै नाईं लाई।

¹⁵आबै आमै औज़ौ भी आच़्छ़ा कौरी सौमझ़ी बौल़ी, कैलैकि मुसा रौ नियम पैहलै कु बौदल़ुई गौ आ आबै एक नौंवौ याजक आ ज़ुण मलिकिसिदका ज़िणौ आ।

¹⁶यीशु याजक एथलै नाईं बौणौ कि नियम-कानून एक खास आदमी री तौरफा कु आशा। पर ज़िन्दगी री शक्ति कु ज़ो केबी भी नाश नाईं कौरींदी।

¹⁷कैलैकि परमेश्‍वर पवित्रशास्त्रा दी तेसरै बारै दी इणी गवाही दिया सा कि, “तू मलिकिसिदका री रीती दी सौदा लै मुख्य याजक बौणी गौ आ।”

¹⁸इणै कौरी, पैहलै मुसा रै नियम बेकार और नाकाम हुणै री वज़ाह कु बौदल़ुई गोई।

¹⁹कैलैकि मुसा रै नियमै केज़ी भी बूश पाक्की नाईं की, और इणी ज़ागाह दी आमुकै एक बौड़ी आश आ ज़ो यीशु मसीह दी आ, ज़ासरै ज़ौरिऐ आमै परमेश्‍वरा रै नज़दीक डेई बौल़ी।

²⁰और परमेश्‍वरै एक कसम खाई, ज़ेबी तिणीऐ यीशु मसीह याजक चाणौ आ,

²¹कैलैकि लेवी रै वंशा रै लोग ता बिणा कसमा कौरी याजक बौणै पर यीशु मसीह कसमा आइलै परमेश्‍वरा री तौरफा कु याजक चाणौ। ज़ुणिऐ तेसरै बारै दी इणौ बोलौ कि, “हाऊं परमेश्‍वर ज़ुण कसम खाआ आ, और हाऊं तेस फैसलै कु केबी नाईं पश्ताउंदौ, ‘तू सौदा लै याजक ई।’ ”

²²एथीलै यीशु सेऊ आ ज़ुण आमुलै भौरी महान वायदै री ज़िम्मेदारी नियां आ।

²³एक बूश औज़ौ आ, भौरी याजक बौणै कैलैकि हर एकी याजका री मौउता आइलै तेसरी सेवा खातम हुई थी।

²⁴पर यीशु जुगै-जुगै रौआ सा, एज़ी वज़ाह तेस बासिऐ कोई भी याजक नाईं बौणौ।

²⁵एथीलै ज़ो यीशु रै ज़ौरिऐ परमेश्‍वरा काऐ आशा ई, सेऊ तेसरौ पुरौ-पुरौ छ़ुटकारौ कौरी बौल़ा आ, कैलैकि सेऊ तिउंलै औरज़ कौरणै लै सौदा ज़िउंदौ आ।

²⁶ता इणौ परधान याजक आमारी ज़ुरत पुरी कौरी सौका आ, ज़ो पवित्र आ, और निष्कपट, और शुद्ध आ, और पापीऊ कु अलग रौआ, और सौरगा कु भी ज़ो उंच़ौ कियौ औन्दौ आ।

²⁷यीशु तिऊं परधान याजकु ज़िणै नाईं आ ज़ुण हारुना रै वंशा रै ई तेसलै ज़ुरुरी नाईं कि रोज़ पैहलै आपणै पापा और तैबै आपणै लोगु रै पापा कालै बौल़ी च़ड़ावा। कैलैकि यीशु एकी बारै लोगु रै पापा री खातिर आपु ई बौल़ी च़ौड़ौ।

²⁸कैलैकि मुसा रै नियम ता कमज़ोर लोगु परधान याजक चाणा आ, पर ज़ो कसम परमेश्‍वरै नियमा बासिऐ खाई आ, सै परमेश्‍वरा रौ छ़ोहरु परधान याजक चाणा आ। और सेऊ आमुलै सौदा लै पाकौ परधान याजक बौणी गौ आ।