Read Pahari, Mahasu इब्रा 9 Bible Online

इब्रा 9 - Pahari, Mahasu bible

इब्रा 9

¹तेस पैहलै वायदै दी भी परमेश्‍वरा री भौक्ती कौरणै रै पुरै नियम थै, और इऐं धौतरी माथै परमेश्‍वरा री आराधना कौरना लै एक पवित्र ज़ागाह थी चाणी ऐन्दी।

²इस्राइली लोगुऐ एक ताम्बु चाणौ और तेथरै दुई हिस्सै थै। ताम्बु रै पैहलै हिस्सै दी दिवौ, एक मेंज़, और तिऐं मेज़ा माथै भैंटा री पवित्र रोटी छ़ाड़ा थै। ताम्बु रै एज़ै हिस्सै लै पवित्र ज़ागाह बोला थै।

³और ताम्बु रौ दुजौ हिस्सौ ज़ो पौरदै भितै थौ, तेस हिस्सै लै भौरी पवित्र ज़ागाह बोला थै।

⁴तिऐं भितली ज़ागाह दी सुनै री धुड़ुस, और च़ारिया भिलै सुनै कौरी शौशौ औन्दौ वायदै रौ सुन्दूक थौ। तेस सुन्दुका भितै मन्नै कौरी भौरुऔ औन्दौ सुनै रौ ओखर, और हारुना रौ डिंगौ ज़ेथदी कौंअल़ै पाच लागी गौऐ थै, और वायदै (हुकम) रै पात्थरा रै ज़ाण्टै थै छ़ाड़ै औन्दै।

⁵एथरै अलावा सुन्दुका माथै च़ौमकिलै करूब थै बौणै औन्दै, ज़ेथरै पांखै तेस सुन्दुका माथै थै फौइलै औन्दै, ज़ो पापा री माफी री ज़ागाह आ। पर आबै आमै इऊं बुशु रौ एक-एक कौरीयौ बखाण नाईं कौरी बौल़दै।

⁶इऐ सारी च़िज़ै तैयार कौरणै बासिऐ याजक ताम्बु रै पैहलै हिस्सै दी हर बौगत सेवा रै काम पुरै कौरा थै।

⁷पर ताम्बु रै दुजै हिस्सै दी सिरफ परधान याजक बौरशा रौ एकी बारै जानवरा रौ खून नीईंयौ डिआ थौ, ज़ास सै आपणै और लोगु रै पापा लै ज़ो तिंउऐ अणज़ाणै दी किऐ थै च़ड़ावा थौ।

⁸पवित्र आत्मा इऊं बुशु साफ कौरा आ, कि ज़ेबी झ़ाऊं ताम्बु रौ पैहलौ हिस्सौ आ, तेबी झ़ांऊ भौरी पवित्र ज़ागाह दी डेउणै री बाट बन्द आ।

⁹और एऊ ताम्बु रौ पैहलौ हिस्सौ औनैणौ आ, ज़ो आज़कै बौगता री भिलै इशारौ कौरा आ, एऊ एज़ी बूश बोला आ, कि भेंट और बौल़ी च़ौड़ाइयौ आराधना कौरणै वाल़ेऊ रै ज़िऊ साफ नाईं कौरी सौकदै।

¹⁰कैलैकि इऐ बुशै ता खाणै-पिणै री और रौंगा-रौंगा री धोइणै री बिधी ई, इऐ शरीरा री बिधी सिरफ सुधार कौरणै रै बौगता झ़ाऊं मानिया ई।

¹¹पर ज़ेबी मसीह आशणै वाल़ी आच़्छ़ी-आच़्छ़ी च़िज़ेऊ रौ परधान याजक हुइयौ आशौ, ता तिणीऐ तौंइऐ भी महान और पाक्कै ताम्बु कु हुइयौ ज़ो सौरगा दी ई, बोलणै रौ मतलब ज़ो सृष्टी रौ हिस्सौ नाईं आ।

¹²और यीशु मसीह जानवरा रौ लोऊ नाईं, पर आपणौ लोऊ नीईंयौ सौदा लै एकी बारै भौरी पवित्र ज़ागाह लै डैऔ, और इणै कौरीऐ लोगु लै सौदा बौणी रौऐ औन्दौ छ़ुटकारौ हासिल कियौ।

¹³याजक जानवरा रौ लोऊ और बौल़ीऊ रौ छ़ार पापी लोगु माथै छ़िड़कावा आ, तेथ कौरी सै शरीर तौंइऐ शुद्ध हुआ आ, अगर तिउंरै लोऊ दी पवित्र कौरणै री तागत आ,

¹⁴ता मसीह रौ लोऊ ज़ुणिऐ आपुलै सौदा ज़िउंदै रौइणै वाल़ी आत्मा रै ज़ौरिऐ परमेश्‍वरा काऐ बेकसूर बौल़ी रै रुपा दी च़ौड़ाऔ, ज़िउंदै परमेश्‍वरा री सेवा कौरना लै आमारै मन पापी कामा कु ज़ो मौउती भिलै निंआई शुद्ध कैलै ना कौरदौ?

¹⁵और एज़ी वज़ाह कु मसीह नौंवै वायदै रौ बिशटु आ, ताकी ज़ो लोग औटाऐ औन्दै ई सै परमेश्‍वरा रै वायदै रै मुताबिक सौदा री ज़ायदादा रै हक्कदार बौणा। आबै मसीह तिऊं लोगु बौच़ाउणा लै मौरौ ज़ुणिऐ पाप कियौ थौ और पुराणै वायदै चोड़ी गौऐ।

¹⁶वायदौ एक वसियतनामै ज़िणी आ वसियतनामै दी इणौ साबित कौरणौ ज़ुरुरी हुआ कि ज़ुणिऐ वायदौ कियौ आ तेसरी मौउत हुई गोई आ।

¹⁷कैलैकि इणौ वायदौ मौरणै कौरी पाकौ हुआ सा, और ज़िदरा झ़ांऊ वायदै कौरणै वाल़ौ ज़िउंदौ रौआ आ तेबी झ़ाऊं वायदौ केज़ै कामा रौ नाईं औन्दौ।

¹⁸एज़ी वज़ाह आ कि पैहलौ वायदौ भी परमेश्‍वरै जानवरा रै लोऊ कौरी कियौ।

¹⁹कैलैकि ज़ेबी मुसै सौभी लोगु लै नियमा रौ हर एक हुकम शुणाऔ ता तिणीऐ जानवरा रौ लोऊ पाणी दी मिलाइयौ बेखल़ी री डाल़ी दी राती ऊन बानियौ, तिऐं नियमा री किताबी माथै और सौभी लोगु माथै छ़िड़की गौ

²⁰और मुसै बोलौ, “एऊ तेस वायदै रौ लोऊ सा, ज़ासरौ हुकम परमेश्‍वरै तुमुलै दैऔ आ।”

²¹और इणै कौरी तिणीऐ ताम्बु और आराधना रै सारै समाना माथै लोऊ छ़िड़कौ।

²²सौच़्च़ौ ता इणौ आ कि नियमा रै मुताबिक सौभी च़िज़ै लोऊ रै ज़ौरिऐ शुद्ध कौरीया ई, और बिणा लोऊ बहाइयौ पापा री माफी नाईं आ।

²³याजका लै इणौ ज़ुरुरी आ कि ताम्बु और तेसरी सारी च़िज़ै ज़ो सौरगा री च़िज़ेऊ री नकल आ, एथीलै इऊं जानवरा री बौल़ी रै ज़ौरिऐ शुद्ध कौरीया ई, पर सौरगा री च़िज़ै शुद्ध कौरना लै जानवरा रै लोऊ कु बौड़ियौ महान बौल़ी री ज़ुरत आ।

²⁴कैलैकि यीशु मसीह ज़ेज़ी पवित्र ज़ागाह दी डैऔ, सै आदमी रै हाथा कौरी नाईं थी बौणी ऐन्दी, ज़ो सौच़्च़ै पवित्र ज़ागाह रौ नौक्शौ आ, पर सौरगा दी डैऔ, ताकी आमुलै आबै परमेश्‍वरा री मौज़ूदगी दी दिशा।

²⁵इणौ नाईं कि मसीह आपु घौड़ी-घौड़ीऐ बौल़ी च़ौड़ावा, ज़िणौ कि परधान याजक हर बौरश जानवरा रौ लोऊ नीईंयौ भौरी पवित्र ज़ागाह दी डिआई,

²⁶नाईं ता दुनिया री पैहला कु तेस घौड़ी-घौड़ीऐ दु:ख उठाउणौ जा थै। पर आबै ज़ुगा रै आखरी दी सेऊ एकी ई बारै पौगड़ौ हुऔ आ, ताकी आपणी ई बौल़ी रै ज़ौरिऐ पाप दूर कौरा।

²⁷और ज़िणौ लोगु लै एकी बारै मौरणौ और तेथ बासिऐ फैसलौ हुणौ पाकौ आ,

²⁸तिणी ई मसीहा भी भौरी लोगु रै पाप आपु माथै नीईंयौ एकी बारै बौल़ी हुऔ। और ज़ो लोग तेस ज़ागा ई तिउंरै पापा री ताइंऐ मौरणा लै नाईं पर छ़ुटकारै लै दुजी बारै पौगड़ौ हुणौ आ।