Read Pahari, Mahasu याकूब 4 Bible Online

याकूब 4 - Pahari, Mahasu bible

याकूब 4

¹तुमु लोगु मांझ़िऐ लौड़ाई और झ़ौगड़ै किदरु आशी गौऐ? का तिऊं बुरै इच़्छ़ा कौरी नाईं ज़ो तुमारै शरीरा आइलै लौड़ा-झ़ौगड़िया ई?

²तुमै आश ता छ़ाड़ाई, पर तुमुलै मिलदै नाईं। एथीलै तुमै खून कौरा ई, तुमै ज़ौल़ाई पर कुछ़ भी पाई नाईं बौल़दै। पर तुमै लौड़ा और झ़ौगड़िया ई। तुमुलै एथीलै ना मिलदौ, कैलैकि तुमै इऊं च़िज़ै परमेश्‍वरा कु नाईं मांगदै।

³तुमै मांगा ई तैबै भी तुमुकै नाईं मिलदौ कैलैकि बुरी इच़्छ़ा कौरी मांगा ई, ताकी आपणै ऐश-आरामा दी उड़ावा।

⁴ओ गान्दै काम कौरणै वाल़ीयो, का तुमै नाईं ज़ाणदै कि दुनिया री च़िज़ा आइलै गोष्टीणौ परमेश्‍वरा आइलै नफरत कौरणी आ? मतलब ज़ुण धौतरी रौ गोश्टण हुणौ च़ाहा सेऊ परमेश्‍वरा रौ दुश्मना बौणा आ।

⁵का तुमै इणौ ज़ाणाई कि पवित्रशास्त्र फुकौ औ बोला आ, “ज़ेज़ी आत्मा परमेश्‍वरै आमु भितै बसाई आ, ता सेऊ इणौ च़ाहा कि आमै परमेश्‍वरा री आराधना कौरु?”

⁶पर सेऊ ता औज़ौ भी बौड़ी दया दिया। एथीलै पवित्रशास्त्रा दी इणौ लिखौ औन्दौ, “परमेश्‍वर घमण्डिऊ रौ विरोध कौरा आ, पर निउलेऊ माथै कौरा आ बौड़ी दया।”

⁷एथीलै परमेश्‍वरा रै अधीन हुऔ। शैताना रौ सामनौ कौरौ, तैबै सेऊ तुमु काऐ कु दूर भागा।

⁸परमेश्‍वरा काऐ आशौ तैबै सेऊ भी तुमु काऐ आशा आ। ओ पापीओ आपणी ज़िन्दगी कु पाप दूर कौरौ। और ओ दोगलै लोगुओ, आपणै ज़िऊ पवित्र कौरौ।

⁹तुमारै पापा री वज़ाहा कु दुखी हुऔ और शोक कौरौ। और लेरौ तुमारौ हंसणौ शोका दी, और तुमारी खुशी निराशा दी बौदल़िया।

¹⁰प्रभु काऐ निउलै बौणौ तैबै सेऊ तुमु उंच़ौ कौरा आ।

¹¹ओ मैरै प्यारै साथी विश्वासिउओ, एकी दुजै री बदनामी नाईं कौरौ, ज़ुण आपणै भाई री बदनामी कौरा या तेस माथै आरोप ला, सेऊ नियमा री बदनामी कौरा आ, और नियमा माथै आरोप लाआ। और अगर तू नियमा माथै आरोप लाअलौ, तैबै तू नियमा माथै हाण्डणै वाल़ौ नाईं पर तेथरौ फैसलै कौरणै वाल़ौ बौणा ई।

¹²नियम दैणै वाल़ौ और फैसलै कौरणै वाल़ौ ता एका आ, ज़ो बौच़ाउणै और नाश कौरणै दी शक्ति वाल़ौ आ। पर तू कुण ई ज़ुण आपणै पड़ोसी माथै आरोप लाआ?

¹³तुमै ज़ो इणौ बोलाई, “आज़ या कालै आमै केज़ै ओरी इलाकै दी डेइयौ तिऐ एक साल बिताई, और, धान्धै कौरीयौ पैसै कौमाई।”

¹⁴पर इणौ नाईं ज़ाणदै कि कालै का हुणौ। शुणौ ता, तुमारी ज़िन्दगी आसा का सा? तुमै भाफा ज़िणै ई, ज़ो थोड़ी देरा दी दिशा आ तैबै गायब।

¹⁵एथीलै तेथरै बौदल़ै तुमुऐ इणौ बोलणौ च़ांई, कि “अगर प्रभु च़ाहा लौ ता आमै ज़िउंदै रौउणै ई और एज़ौ और सेज़ौ काम भी कौरी ई।”

¹⁶पर आबै तुमै आपणै बोलणै माथै शेखी मारीयौ घमण्ड कौरा ई। इणौ सारौ घमण्ड बुरौ हुआ आ।

¹⁷एथीलै ज़ुण भौलाई कौरणी ज़ाणा और सेऊ नाईं कौरदौ ता तेसलै एऊ पाप आ।