Read Pahari, Mahasu याकूब 5 Bible Online

याकूब 5 - Pahari, Mahasu bible

याकूब 5

¹ओ सेठ अविश्वासी लोगुओ, शुणौ ता, तुमै आपणै आशणै वाल़ै दुखा लै राड़ै देई-देइयौ लेरौ।

²तुमारौ धन शौड़ी गौ आ, और तुमारै जुड़कै किड़ेउऐ खाई गौऐ।

³तुमारै सुनै-च़ांदी दी खौई लागी गोई। और सै खौई तुमारै खिलाफ गवाही दिया आ, और सै तुमारौ शरीर आगी ज़िणौ पोरु ज़ाल़ा आ। तुमुऐ आखरी जुगा दी धन-ज़यदाद कौट्ठै कि ई आ।

⁴देखौ, ज़ुणी ज़िमदारै तुमारै डोखरै लौऐ ई, तिउंरी सै मज़दुरी ज़ो तुमुऐ धोखै कौरीऐ आपुकै छ़ाड़ी गोई थी, सै ज़ीमीदार परमेश्‍वरा लै हाकै दैंदै ई लागै औन्दै, और लौइणै वाल़ेऊ री हाक सारेऊ कु शक्ति वाल़ै प्रभु रै कौन्थु दी पौउंच़ी गोई।

⁵तुमै धौतरी माथै ऐश-आरामा दी थाकै लागी और भौरी सुखी रौऐ। तुमुऐ इऐं बौल़ी रै दिना लै आपणौ ज़िऊ पापा रौ घौड़ौ भौरी गौ आ और परमेश्‍वरा री बौड़ी सौज़ा लै त्यार कियौ।

⁶तुमुऐ बेकसूर लोग, आरोपी चाणीऔ पोरु झ़ांगै ई सै तुमारौ सामनौ नाईं कौरा थै।

⁷एथीलै ओ मैरै प्यारै साथी विश्वासिउओ, प्रभु रै आशणै झ़ांऊ सौबर छ़ाड़ौ। देखौ ज़िमदार धौतरी री मैंहगी फसला री आश छ़ाड़ियौ पैहली और आखरी पाणी लागणै झ़ांऊ सौबर छ़ाड़ाई।

⁸इणी ई तुमै भी सौबर छ़ाड़ौ। और आपणी आश नाईं चोड़ौ, कैलैकि प्रभु रौ आशणौ भौरी नज़दीक आ।

⁹ओ मैरै प्यारै साथी विश्वासिउओ, एकी दुजै माथै आरोप नाईं लाऔ, ताकी तुमै आरोपी ना बौणा। देखौ फैसलै कौरणै वाल़ौ नज़दीक ई आ और आशणै वाल़ौ आ।

¹⁰ओ मैरै प्यारै साथी विश्वासिउओ, ज़ुण भविष्यवक्तुऐ प्रभु रै नावां कौरी बुशै लाई, तिऊं, दु:ख उठाउणै और सौबर छ़ाड़ना लै याद कौरौ।

¹¹देखौ, आमै शान्ति छ़ाड़णै वाल़ेऊ लै आशीष वाल़ै बोली ई, तुमुऐ अय्युबा रै सौबर छ़ाड़णै रै बारै दी ता शुणौ औलौ, और प्रभु री तौरफा कु तेथरौ नौतिज़ौ मिलौ सेऊ ज़ाणी गौ आ, ज़ेथ कौरी प्रभु री करुणा और दया पौगड़ी हुआ।

¹²ओ मैरै प्यारै साथी विश्वासिउओ, सारेऊ कु ज़ुरुरी बूश इऐ आ कि कसम ना खाणी, ना सौरगा री, ना धौतरी री, ना कास ओरी च़िज़ा री। पर तुमारी बूश हां री हां और नाईं री नाईं च़ांई हुणी, कि तुमै परमेश्‍वरा कु सौज़ा रै लायक ना बौणा।

¹³अगर तुमु मांझ़िऐ कुण दुखी आ, ता सेऊ प्राथना कौरा। अगर खुश आ ता प्रभु री बौड़ाई कौरा।

¹⁴अगर तुमु मांझ़िऐ कुण बिमार आ, ता कलिसिया रै स्याणै औटाऔ, और सै प्रभु रै नावां कौरी तेस माथै तेला लाइयौ तेसलै प्राथना कौरा,

¹⁵और विश्वासा री प्राथना कौरीयौ बिमार पोरु बौच़ा आ, और प्रभु तेस ठीक कौरा आ। और अगर तिणीऐ पाप भी औलै कौरै औन्दै, ता तिउंरी भी माफी मिला आ।

¹⁶एथीलै तुमै आपु मांझ़िऐ एकी दुजै काऐ आपणै-आपणै पाप मानौ, और एकी दुजै लै प्राथना कौरौ, ज़ेथ कौरी च़ांगै हुआ, धौर्मी आदमी री प्राथना री शक्ति कौरीऐ भौरी कुछ़ हुई सौका।

¹⁷एलियाह भविष्यवक्ता भी ता आमु बाशीऐ सुख-दु:ख भोगी आदमी थौ। और तिणीऐ लेरी-लेरीयौ प्राथना कौरी कि पाणी नाईं लागा। और साड़ै चिया साला झ़ांऊ धौतरी माथै पाणी नाईं लागौ।

¹⁸तैबै तिणीऐ प्राथना कौरी, और आसमाना कु पाणी लागौ और ज़बीन फौल़दै लागी।

¹⁹ओ मैरै प्यारै साथी विश्वासिउओ, तुमु मांझ़िया कु अगर कुण सौच़्च़ाई री बाटा कु भटका लौ, और कुण तेस वापिस आणालौ,

²⁰ता सेऊ इणौ ज़ाणालौ, कि ज़ुण कुण कास भटकौ औन्दौ पापी वापिस आणालौ, सेऊ एक प्राण सौदा री मौउता कु बौच़ावा आ और परमेश्‍वर तिंउरै भौरी पाप माफ कौरा आ।