Read Pahari, Mahasu 1 पत 4 Bible Online

1 पत 4 - Pahari, Mahasu bible

1 पत 4

¹एथीलै ज़ेबी मसीहै शरीरा दी दुःख उठाऔ, ता तुमुऐ भी दु:ख उठाउणा लै तेस स्वभाव आइलै त्यार औणौ च़ांई, ज़िणौ तेसरौ थौ, अगर तुमै मसीह लै दु:ख उठाउणा लै त्यार ई ता तुमुऐ पाक्कौ सुंच़ी ऐरौ आ कि पाप नाईं कौरणौ।

²ताकी आशणै वाल़ै बौगता दी आपणी बौच़ी ऐन्दी शारीरिक ज़िन्दगी लोगु री इच़्छ़ा रै मुताबिक नाईं पर परमेश्‍वरा री इच़्छ़ा रै मुताबिक बिताऔ।

³काफी थौ सेऊ बौगत, ज़ो तुमुऐ दुजी ज़ाती रै लोगु ज़िणौ इऊं बुरी इच़्छ़ा पुरी कौरणै दी बिताई गौ आ: गान्दै कामा री इच़्छ़ा, नशेड़ी, शराबड़ै, ऐश-मस्ती, और बुरी मुर्तिपूज़ा।

⁴सै हैरान औआ ई कि तुमै इऊं गान्दै कामा दी तिऊंरौ साथ नाईं दैंदै। एथीलै सै तुमुलै बुरौ भौलौ बोलाई ई।

⁵एकी दिनै सै ज़ुरुर आपणै लेखै दैणा लै परमेश्‍वरा काऐ खौड़ै औणै ई, और परमेश्‍वर तिऊं हरेका कु तिउंरै कामा रै बारै दी पुछ़ा ज़ो तिंउऐ इऐं धौतरी माथै किऐ ई। परमेश्‍वर ज़िउंदै और मौरै औन्देऊ रौ फैसलौ कौरा आ।

⁶इऐ वज़ाह सा की मौरै औन्दै लोगुऐ भी यीशु मसीह री खुश-खौबरी शुणी। तिउंरै शरीरै ता सारै लोगु ज़िणौ मौरणौ पौड़ौ पर आबै सै आत्मा दी परमेश्‍वरा आइलै सौदा लै रौआ ई।

⁷सारी बुशेऊ रौ खात्मौ ज़ल्दी हुणै वाल़ौ आ। एथीलै सबर हुइयौ प्राथना लै खौबरदार रौऔ।

⁸सारेऊ कु ज़ुरुरी बूश एज़ी सा कि एकी दुजै कु भौरी प्यार छ़ाड़ौ, कैलैकि प्यार कई पाप दुमा आ।

⁹बिण कुड़कुड़ाऐ एकी-दुजै री आदर-खातर कौरौ।

¹⁰ज़ासकै ज़ो वरदान आ मिलौ औन्दौ, सेऊ तेस परमेश्‍वरा रै कई रौंगा री बौड़ी दया रै भौलै खज़ान्च़ीऊ ज़िणौ एकी दुजेऊ री ज़ुरतै पुरी कौरना लै एथरौ इस्तेमाल कौरा।

¹¹अगर तुमुकै परचार कौरणै रौ वरदान आ ता तुमै परमेश्‍वरा रै वचना रौ परचार कौरौ। अगर तुमुकै दुजै लोगु री मज़द कौरणै रौ वरदान आ ता तुमै पुरी तागती कौरी दुजेऊ री मज़द कौरौ ज़ो परमेश्‍वर तुमुलै दिया आ। तुमै ज़ो कुछ़ कौरा ई ता परमेश्‍वरा लै यीशु मसीह रै ज़ौरिऐ महिमा दियाई। सारी महिमा और तागत सौदा लै परमेश्‍वरा री आ। आमीन

¹²ओ मैरै प्यारै साथी विश्वासिउओ, इऊं दु:ख दैणै वाल़ी च़िज़ु रै बारै दी हैरान ना हुऔ कैलैकि तुमै मसीहा रै ई। पर इऐ च़िज़ै इणै देखणा लै ई औन्दै लागी ऐन्दी कि तुमै सौच़्च़ी परमेश्‍वरा माथै विश्वास कौरा ई कि नाईं। ता इणौ ना सुंच़ौ कि तुमु आइलै कुछ़ अजीब आ औन्दै लागौ औन्दौ।

¹³पर ज़िणै-ज़िणै मसीह रै दुखा दी साथी औआ ई, खुशी मौनाऔ, ज़ेथकु तेसरी बौड़ाई रै पौगड़ौ औणै रै बौगता ई भी खुश और मगन रौऔ।

¹⁴तैबै अगर मसीह रै नावां लै तुमारी बेइज़्ज़ती कौरा ई ता तुमै आशीषित ई, कैलैकि तुमु दी परमेश्‍वरा री महिमा री आत्मा रौआ सा।

¹⁵तुमु मांझ़िऐ कुण आदमी खून कौरणै वाल़ौ या च़ोरी कौरणै वाल़ौ या बुरै काम कौरणै वाल़ौ या पराऐ कामा दी हाथ पाइणै री वज़ाह कु दुःख नाईं उठाउंदै।

¹⁶पर अगर मसीह हुणै री वज़ाह कु दु:ख उठावा ई, ता तुमै नाईं शौरमिंयौ, पर एज़ी बुशु लै परमेश्‍वरा री बौड़ाई कौरौ।

¹⁷कैलैकि सेज़ौ बौगत आशी गौ कि पैहलै परमेश्‍वरा रै लोगु रौ फैसलौ कौरीया। और ज़ेबी कि फैसलै री शुरुआत आमु मांझ़िऐ हुआ ली ता तिऊंरौ का हाल औणौ आ ज़ुण परमेश्‍वरा री खुश-खौबरी नाईं मानदै?

¹⁸ज़िणौ पवित्रशास्त्र बोला आ कि, “अगर धौर्मी आदमी परेशानी कु छ़ुटकारौ पा आ लौ, ता भौक्ती नाईं कौरणै वाल़ौ और पापी रौ का औणौ आ?”

¹⁹एथीलै ज़ो परमेश्‍वरा री मौरज़ी रै मुताबिक दुःख उठावा ई, सै आपणै-आपणै प्राण विश्वासा रै लायक दुनिया चाणनै वाल़ै परमेश्‍वरा रै हाथा दी सांभा लै। और भौलै काम कौरदै थाका लागी।