Read Pahari, Mahasu 2 पत 1 Bible Online

2 पत 1 - Pahari, Mahasu bible

2 पत 1

¹हाऊं शमौन पतरस ज़ुण यीशु मसीह रौ दास और प्रेरित ऊ तुमुलै लिखाऊ। हाऊं तिऊं सारेऊ लै लिखा ज़ुणिऐ आमारै परमेश्‍वर और छ़ुटकारै देणै वाल़ै यीशु मसीह री धार्मिकता रै ज़ौरिऐ आमु ज़िणौ किमत्ती विश्वास पाऔ आ।

²हाऊं प्राथना कौराऊ कि ज़िणौ तुमै परमेश्‍वर और आमारै प्रभु यीशु रै ज्ञाना दी बौड़दै लागै औन्दै, ता परमेश्‍वर तुमुलै ज़ादै कु ज़ादी बौड़ी दया और शान्ति दिया।

³परमेश्‍वरै आपणी शक्ति रै ज़ौरिऐ आमुकै भौक्ती वाल़ी ज़िन्दगी ज़िउणा लै सै सारी च़िज़ै देई गोई, ज़ेथकु सेऊ खुश औआ आ। इणौ हुई सौका आ कैलैकि आमै ज़ाणी ई परमेश्‍वरा सा सेऊ ज़ुणिऐ आमै आपणी महिमा और सदगुणा रै ज़ौरिऐ आमै आपणै लोगु औणा लै औटाऐ ई।

⁴ज़ेथरै ज़ौरिऐ तिणीऐ आमुलै भौरी किमती और महान वायदौ दैऔ आ। ताकी आमै दुनिया री बुरी इच़्छ़ा कु बौच़ा, ज़ो लोगु नाश कौरा सा, और परमेश्‍वरा रै स्वभाव दी शामिल औआ।

⁵एज़ी वज़ाह कु तुमै पाक्कौ कौरौ कि तुमै ना सिरफ मसीह माथै विश्वास कौरदै पर आच़्छ़ी ज़िन्दगी ज़िउंदै भी लागै औन्दै। तुमै सिरफ तेसी ना कौरौ ज़ो आच़्छ़ौ आ, पर तुमै इणै आदमी बौणौ ज़ुण ज़ाणा सा कि किणी सौमझ़दारी कौरी च़ांई बरताव कौरणौ।

⁶तुमुकै ना सिरफ सौमझ़दारी रौ पौतौ च़ांई हुऔ, बल्कि आपु माथै काबु भी छ़ाड़ौ। ना सिरफ आपु माथै काबु पर मुसीबता दी सौबर च़ांई छ़ाड़णी। ना सिरफ सौबर, बल्कि तुमु इणी ज़िन्दगी च़ांई ज़िउणी ज़ेथ कौरी परमेश्‍वर खुश औआ सा।

⁷और ना सिरफ इणी ज़िन्दगी ज़िउणी पर आपु मांझ़िऐ भाईच़ारौ छ़ाड़ौ। और ना सिरफ आपु मांझ़िऐ भाईच़ारौ पर सारै लोगु आइलै भी प्यारा कौरौ।

⁸अगर तुमु दी इऐ गुण मौज़ूद ई और तुमु दी इऐ गुण बौड़दै ई लागै औन्दौ, ता एथरी वज़ाह कु तुमै आमारै प्रभु यीशु मसीह रै ज्ञाना दी निकामै और निष्फल नाईं औन्दै।

⁹कैलैकि ज़ासदी इऐ बुशै नाईं, सेऊ शेड़ौ आ, ज़ुण धुन्धलौ देखा आ, और सेऊ आपणै पुराणै पापा कु शुद्ध हुणौ बिसरी गौ आ।

¹⁰एज़ै कारणै ओ मैरै प्यारै साथी विश्वासिउओ, तुमै आपुकै और दुजै लोगु कै देखाउणा लै औज़ौ भी आच़्छ़ै तरिकै कौरीऐ बरताव कौरणै री कोशिश कौरौ कि परमेश्‍वरै सौच़्च़ी ई तुमै चुनै ई और तुमै आपणै लोग औणा लै औटाऐ ई। अगर तुमै इणौ कौरा ई ता तुमै पाक्कैऐ केबी भी परमेश्‍वरा कु अलग नाईं औणै।

¹¹और परमेश्‍वर भी तेस राज़्य दी तुमारौ आच़्छ़ै कौरी स्वागत कौरा आ ज़िऐ यीशु मसीह ज़ुण आमारौ प्रभु और छ़ुटकारै दैणै वाल़ौ आ, सौदा लै राज़ै ज़िणौ राज़ कौरा आ।

¹²हाऊं इऊं बुशु रै बारै दी तुमुकै याद लगातार दिलाउणै च़ाहा ऊ, हालांकी तुमै इऊं बुशेऊ पैहला कु ज़ाणाई और पाक्कौ विश्वास भी कौरा ई कि इऐ सौच़्च़ी ई।

¹³ज़ेबी झ़ाऊं हाऊं ज़िउंदौ ऊ, तुमु तिऊं बुशु रै बारै दी याद दिलाइयौ खौबरदार कौरणौ ठीक सौमझ़ा ऊ। कि तुमै इऊं बिसरा नाईं।

¹⁴हाऊं इणौ ज़ाणाऊ कि हाऊं ज़ल्दी मौरा ऊ कैलैकि आमारै प्रभु यीशु मसीहीऐ मुकै इयौ साफ-साफ बोलौ आ।

¹⁵एथीलै हाऊं इणी कोशिश कौराऊ कि मैरै मौरणै बासिऐ तुमै इऊं सारी बुशै सौदा लै याद छ़ाड़ी बौल़ा।

¹⁶ज़ेबी आमु प्रेरितुऐ तुमुकै आमारै प्रभु यीशु मसीह री तागती रौ, और आशणै रै बारै दी बोलौ थौ, ता आमुऐ तुमुकै च़ालाकी कौरी चाणी ऐन्दी काआणी री बूश नाईं बोली थी। बल्कि आमुऐ आपणी आखिऊ कौरीऐ मसीह री महिमा देखी थी।

¹⁷कैलैकि ज़ेबी तिणीऐ परमेश्‍वर बाबा कु इज़्ज़त, और महिमा पाई, तैबै तिऐं शक्ति वाल़ी महिमा मांझ़िऐ कु इऐ आवाज़ आशी कि, “एऊ मैरौ सौभी कु गौरतौ छ़ोहरु आ, ज़ासकु हाऊं खुश ऊ।”

¹⁸ज़ेबी आमै तेस आइलै पवित्र पहाड़ी माथै थै, ता आमुऐ सौरगा कु एज़ी आवाज़ आशदै शुणी।

¹⁹एथीलै भविष्यवक्तु रौ वचन औज़ौ भी ज़ादौ विश्वासा रै लायक बौणी गौ आ। तेथ माथै तुमारौ ध्यान दैणौ ठीक तिणी ई भौलौ आ ज़िणौ न्यारै दी ज़ौल़ै औन्दै दिवै माथै ध्यान दैणौ आ, ज़ेबी झ़ाऊं दोउत ना औन्दी। मसीह दोतकौ तारौ तुमारै ज़िवा दी च़ौमका आ।

²⁰पर सारेऊ कु पैहलै इणौ ज़ाणौ कि पवित्रशास्त्रा री केज़ी भी भविष्यवाणी आपु भविष्यवक्तु रै आपणै बिच़ार नाईं ई।

²¹कैलैकि केज़ी भी भविष्यवाणी आदमी री इच़्छ़ा कौरी केबी ना हुई, पर पवित्र आत्मा तिऊं आखर बोलणा प्रेरित कौरा सा, ज़ास परमेश्‍वर बोलणौ च़ाहा थौ।