Read Pahari, Mahasu 2 पत 2 Bible Online

2 पत 2 - Pahari, Mahasu bible

2 पत 2

¹भौरी पैहलै इस्राइली लोगु मांझ़िऐ झ़ुठै भविष्यवक्ता थै, ता तुमु मांझ़िऐ भी झ़ुठै शिक्षा दैणै वाल़ै औणै ई। सै सुल-सुलै आशणै ई और परमेश्‍वरा रै बारै दी नाश कौरणै वाल़ै झ़ूठ बोलाई। सै मसीह आपणै प्रभु रै रुपा दी भी नाईं मानदै ज़ो तिऊं पापा कु आज़ाद कौरा आ, इणै कौरी सै आपणी ज़िन्दगी रौ शिगरी नाश कौरा ई।

²भौरी लोगुऐ आपणै बुरै तरिकै मानणै ई, और दुजेऊ लै सौच़्च़ाई रै बारै दी झ़ूठ बोलणै री वज़ाह बौणनै ई।

³इऐ शिखाउणै वाल़ै लाल़च़ी औणै ई, और इऐ तुमारी च़िज़ेऊ निणा लै बणाउटी काअणिऊ बोलीयौ तुमुलै धोखौ दियाई। परमेश्‍वरै भौरी पैहलै फैसलौ कियौ कि सेऊ इउंलै सौज़ा दिया आ और सेऊ इणै कौरना लै त्यार आ। सेऊ पाक्कौ तिऊं नाश कौरा आ।

⁴तुमै ज़ाणाई कि भौरी पैहलै परमेश्‍वरै सै सौरगदूत, ज़ुणिऐ पाप कौरणौ नाईं छ़ाड़ौ, नौरका दी भेज़ीयौ न्यारै कुण्डा दी पाई गौऐ ताकी सै तिऐ फैसलै रै दिना झ़ांऊ बन्द रौआ।

⁵तुमै इणौ भी ज़ाणाई कि भौरी पैहलै ज़ेज़ै लोग थै सै परमेश्‍वरा कु नाईं डौरा थै और तिंउऐ सै बुरै काम नाईं छ़ाड़ै ज़ो सै कौरा थै। एथीलै परमेश्‍वरै पुरी धौतरी लै, पाणी कौरी डुबाउणै री सौज़ा देई ताकी सै नाश औआ। पर तिणीऐ तिऊं मांझ़िया कु नूह और तेस आइलै आठ लोग बौच़ाऐ, ज़ुणिऐ परमेश्‍वरा आइलै धार्मिकता री ज़िन्दगी बिताउणै रै बारै दी परचार कियौ थौ।

⁶परमेश्‍वरै सदोम और अमोरा रै शैहरा लै सौज़ा देई कि सै तेबी झ़ाऊं थाका ज़ौल़दै लागी ज़ेबी झ़ाऊं तिऊंरौ छ़ार ना बौणा. इणै कौरी परमेश्‍वरै तिऊं लोगु खौबरदार कौरना औनैणौ चाणौ कि तिऊं आइलै का औणौ आ ज़ुण तेसरै हुकम नाईं मानदै।

⁷पर परमेश्‍वरै धौर्मी लूत बौच़ाऔ, ज़ुण तिऊं अधर्मिऊ रै अशुद्ध च़ालच़लना कु भौरी दुखी थौ।

⁸कैलैकि सेऊ धौर्मी तिंउरै बिच़ा दी रौइयौ और तिंउरै अधर्मा रै काम देखी-शुणियौ, हर दिनै आपणौ मन दुखी कौरा थौ।

⁹ता प्रभु आपणै भौगतु मुसीबता कु गाड़नौ और अधर्मिऊ रौ फैसलै रै दिना झ़ांऊ सौज़ा री हालती दी छ़ाड़णौ भी ज़ाणा सा।

¹⁰परमेश्‍वर पाक्कौ तिऊं झ़ुठै शिखाउणै वाल़ेऊ लै सौज़ा दिया आ ज़ुण आपणी गान्दै कामा री इच़्छ़ा कौरा ई और ज़ुण आपु माथै परमेश्‍वरा रै हक्‍का रौ इनकार कौरा ई। सै भौरी ढीठ, और ज़िद्दी ई। सै सौरगा रै महिमा वाल़ै प्राणीऊ री बुराई कौरणै कु नाईं डौरदै।

¹¹हालांकी सौरगदूत भी ज़ुण शक्ति दी तिऊंकु बौड़ै ई, प्रभु काऐ तिउंलै बुरौ-भौलौ बोलीयौ तिऊं माथै आरोप नाईं लाइंदै।

¹²पर इऐ लोग बेअकलै जानवरा ज़िणै ई, ज़ुण शिकार औणा लै और नाश औणा लै पैदै औआ ई। और ज़ेज़ी बुशै सै ज़ाणदै भी नाईं तिंउरै बारै दी बुरौ-भौलौ बोलाई। इऐ भी इऊं जानवरा बाशीऐ नाश औणै ई।

¹³सै इणै कौरी आपणै बुरै कामा री सौज़ा पा आ ई। तिउंकै दुसदुपारै ऐश-मौस्ती कौरणी आच़्छ़ी लागा सा। सै कलंकित और आरोपी ई, और तिऊं लोगु कै तुमु आइलै खांदी-पिन्दी बारै धोखै वाल़ी बुरी बुशु लाइणै दी मौज़ौ आशा सा।

¹⁴तिउंरी आखी गान्दै कामा कौरी भौरुई औन्दी, और सै पाप कौरणौ नाईं छ़ाड़दै। सै तिऊं लोगु फसावा ई, ज़ुण विश्वासा दी पाक्कै नाईं ई। तिउंरै ज़िवा दी लोभ-लाल़च़ आ भौरुऔ औन्दौ। शापित संतान ई।

¹⁵तिंउऐ आच़्छ़ै काम कौरणै पोरु छ़ाड़ी गौऐ और तिणी ई बुरै काम कौरणै शुरु कौरी गौऐ ज़िणै बओरा रै छ़ोहरु बिलामै भौरी बौगत पैहलै किऐ थै। तिणीऐ गलत काम कौरीयौ पैसै कौमाउणै आच़्छ़ौ सौमझ़ौ थौ।

¹⁶पर परमेश्‍वरै सेऊ तिऐं बुराई लै धौमकाऔ ज़ो तिणीऐ की थी। तेसरै गाधैऐ आदमी ज़िणी बुशै लाइयौ सेऊ बालाम भविष्यवक्ता गलत तरिकै कौरी काम कौरना कु रोकौ।

¹⁷इऐ झ़ुठै शिखाउणै वाल़ै लोग शुकै औन्दै कुंऐ, और बागुरा कौरी उड़ाऐ ऐन्दै बादल़ा ज़िणै ई, तिउंलै सौदा रौ न्यारौ आ छ़ाड़ौ औन्दौ।

¹⁸ज़ेबी सै लोगु कै शिखावा ई ता सै बेकार और घमण्डा री बुशै लाआ ई। सै लोगु कै बोलाई कि सै बेशर्मी वाल़ै काम कौरी सौका ई ज़ो तिउंरै शरीर कौरणै च़ाहा ई और सै लोगु पाप कौरना लै धोखौ दियाई, ज़ुण इबड़ी पा इणी बुरी ज़िन्दगी कु बौच़ियौ निकल़ै ई।

¹⁹सै तिउंलै आज़ाद कौरणै रौ वायदौ कौरा ई, हालांकी सै आपु ई विनाशा रै गुलाम ई। कैलैकि आदमी तेसी रौ गुलाम बौणा सा ज़ासकु सेऊ हारा सा।

²⁰अगर सै प्रभु और छ़ुटकारै दैणै वाल़ै यीशु मसीह री पैहच़ाणा कौरी धौतरी री रौंगा-रौंगा री अशुद्धता कु बौच़ियौ निकल़ालै, और तैबै तिऊंदी फौसियौ हारी गौऐ, ता तिउंरी हालत पैहलै कु भी बुरी हुई गोई आ।

²¹आच़्छ़ौ हुआ थौ कि तिउंकै धार्मिकता रै बारै दी पौतौ ना हुआ थौ बज़ाय एथरै की सै तेस ज़ाणनै बासिऐ ज़ो पवित्र हुकम तिउंकै सांबै औन्दै थै तेथकु पोरु हटा।

²²तिऊं माथै एज़ी कहावत ठीक बोशा आ कि, “कुकुर आपणी उल़टी री तौरफा दी और धोआई ऐन्दी सुंगरी गारी मांझ़िऐ पौड़ना लै तौंइऐ डिआ आ।”