Read Pahari, Mahasu 2 पत 3 Bible Online

2 पत 3 - Pahari, Mahasu bible

2 पत 3

¹ओ मैरै प्यारै साथी विश्वासिउओ, आबै हाऊं तुमुलै दुजी चिट्ठी लिखाऊ, और इऊं दुइआ चिट्ठीऊ रै ज़ौरिऐ हाऊं तुमुकै ठीक तरिकै कौरी सुंच़णा लै खौबरदार कौराऊ, ज़ो तुमुऐ पैहलै भी शिखौ आ।

²कि तुमै तिऊं बुशु, ज़ो पवित्र भविष्यवक्तुऐ पैहलै कु बोली थी, और प्रभु, और छ़ुटकारै दैणै वाल़ै तिऊं हुकम याद कौरौ, ज़ो तुमुलै प्रेरितु रै ज़ौरिऐ देई थी।

³सारेऊ कु पैहलै तुमुकै इणौ ज़ाणनौ ज़ुरुरी आ, कि आखरी बौगता दी हौसणै वाल़ै और मज़ाक उड़ाउणै वाल़ै आशा ई, ज़ो आपणी इच़्छ़ा रै मुताबिक च़ाला ई,

⁴और बोलालै कि, “प्रभु रै आशणै रौ वायदौ किऐ डैऔ आ? कैलैकि बाब-दादै रै मौरणै कु इबी झ़ाऊं सारै कुछ़ तिणी ई आ च़ालदै लागौ औन्दौ, ज़िणौ धौतरी री शुरुवाता कु थौ।”

⁵सै ज़ाणी-बुज़ियौ इऊं बुशु नाईं मानदै, कि परमेश्‍वरै आपणै वचना रै ज़ौरिऐ आसमान चाणौ। और आपणै ई वचना रै ज़ौरिऐ धौतरी भी पाणी कु अलग कौरी और शुकी ज़बीन पाणी कु बाइरै गाड़ी।

⁶इऊं बुरै लोगु रै ज़ौरिऐ तेस जुगा री धौतरी पाणी दी डुबियौ नाश हुई गोई।

⁷पर आज़कालकै बौगता रौ आसमान और धौतरी तेस वचना रै ज़ौरिऐ एथीलै आ छ़ाड़ी ऐन्दी कि पोरु ज़ाल़ीया, और फैसलै रै दिना दी अधर्मिऊ रै नाश हुणा लै सौंभाल़ियौ ई छ़ाड़ी ऐन्दी।

⁸ओ मैरै प्यारै साथी विश्वासिउओ, इऐं बूश तुमै केबी ना बिसरेऊ कि, प्रभु रै काऐ एक दीन हज़ार बौरशा रै बराबर आ, और हज़ार बौरश ई एक दिना रै बराबर।

⁹प्रभु आपणै वायदै रै बारै दी बेर नाईं पाइंदौ, ज़िणौ कुछ़ लोग सौमझ़ा ई। पर तुमारै बारै दी सबर कौरा सा, और नाईं च़ांहादौ कि कोई नाश हुआ लौ। पर इणौ च़ाहा सा कि सौभीऊ लै मन बौदुल़णै रौ मौकौ मिला।

¹⁰पर परमेश्‍वरा रौ दीन च़ोरा बाशीऐ आशा आ, सेज़ै दिनै सौरग ज़ोरै गुड़णै री आवाज़ा कौरी नाश औणौ आ, और सारी चीज़ै भौरी तौपीयौ पौगल़ा, और धौतरी और धौतरी माथै रै काम ज़ौल़ाई।

¹¹ज़ैबै कि इऊं सारी च़िज़ु रौ इणी रीती कौरी नाश औणौ ज़ुरुरी आ, ता तुमुकै पाक्कौ पौतौ च़ांई औणौ कि तुमारौ च़ाल-च़लण किणौ च़ांई औणौ। तुमारौ च़ाल-च़लण ठीक और हरेक च़ीज़ ज़ो तुमै कौरा ई तेथदी परमेश्‍वर खुश च़ांई औणौ।

¹²ज़िणौ कि तुमै सेज़ौ दीन ज़ागा ई ज़ेबी परमेश्‍वर दुनिया रौ फैसलै कौरना लै आशा सा, तेस दिना रै शिगरी आशणा लै आच़्छ़ी कोशिश कौरौ। सेज़ै दिनै आग ज़ौल़णी आ और आसमान नाश औणौ आ, आसमाना रै तारै तौपीयौ पोरु गौल़ाई।

¹³पर तेसरै वायदै रै मुताबिक आमै एक नौंवौ आसमान और नौईं धौतरी ज़ागी ई, ज़ेथदी धार्मिकता वासीआ आ।

¹⁴एथीलै ओ मैरै प्यारै साथी विश्वासिउओ, ज़ेबी तुमै सेज़ै दीन ज़ागदै लागै औन्दै ज़ेबी परमेश्‍वर दुनिया रौ फैसलौ कौरा आ, ता कोशिश कौरौ कि तुमै प्रभु री नौज़री दी बेकसूर, बेदाग बौणा और तुमु दी तेसरी शान्ति औआ।

¹⁵इणौ भी ज़ाणौ कि आमारै प्रभु री सौबर ई आमुलै छ़ुटकारौ आ, ठीक तिणी ई ज़िणौ आमारै प्यारै विश्वासी भाई पौलुसै आपणै ज्ञाना रै मुताबिक ज़ो तेसलै मिलौ आ, तुमुलै लिखौ आ।

¹⁶ज़िणौ तिणीऐ आपणी सारी चिट्ठीऊ दी भी इऊं बुशु रै बारै दी लिखौ आ, तिऊं चिट्ठीऊ दी कुछ़ बुशै इणी ई ज़ो सौमझ़णा लै मुश्कल़ ई। अणज़ाण और सै लोग ज़ुण विश्वासा दी टेकी नाईं रौउंदै एथरौ मतलब पोरु बिगाड़ा ई, ज़िणौ सै पवित्रशास्त्रा री ओरी बुशु आइलै भी कौरा ई ज़ेथ कौरी सै आपणौ नाश कौरा ई।

¹⁷एथीलै ओ मैरै प्यारै साथी विश्वासिउओ, तुमै पैहलै कु इऊं बुशै ज़ाणियौ खौबरदार रौऔ, ताकी अधर्मिऊ रै चकरा दी फौसियौ आपणी मज़बुती हाथा कु पोरु ना च़ांई छ़ुटी।

¹⁸पर आमारै प्रभु, और छ़ुटकारै दैणै वाल़ै यीशु मसीह री बौड़ी दया और पैहच़ाणा दी बौड़दै थाकौ लागौ। तेसरी महिमा आबै भी च़ांई हुई, और सौदा लै औन्दै थाका लागी। आमीन।