Read Pahari, Mahasu 1 यहुन्ना 2 Bible Online

1 यहुन्ना 2 - Pahari, Mahasu bible

1 यहुन्ना 2

¹ओ मैरै लोल़डेउओ, हाऊं इऊं बुशै तुमुलै एथीलै लिखाऊ कि तुमै पाप नाईं कौरा। और अगर कुण पाप कौरालौ, ता परमेश्‍वर बाबा काऐ आमारौ मज़दगार आ, ज़ुण आमारै पापा री माफी री ताइंऐ परमेश्‍वरा कु प्राथना कौरा आ मतलब धौर्मी यीशु मसीह।

²और सेऊ आमारै पापा री माफी लै बौल़ी हुऔ, सिरफ आमारै नाईं बल्कि सारी धौतरी रै लोगु रै पापा लै भी।

³अगर आमै तेसरै हुकम मानु लै, ता एथ कौरी आमुकै पौतौ लागा की आमुऐ सेऊ ज़ाणी गौ आ।

⁴ज़ुण-कुण इणौ बोला आ, कि “हाऊं तेस ज़ाणाऊ,” और तेसरै हुकम नाईं मानदौ, सेऊ झ़ुठौ आ और परमेश्‍वरा री सौच़्च़ाई ज़िणै नाईं ज़िउंदौ।

⁵पर ज़ुण परमेश्‍वरा रै वचन माना आ, तेसदी सौच़्च़ी परमेश्‍वरा रौ प्यार पौगड़ौ हुऔ आ। एथीई कौरी आमै ज़ाणी की आमै तेसदी ई।

⁶और ज़ुण-कुण इणौ बोला आ कि हाऊं तेसदी पाकौ ऊ, तिणीऐ तिणौ च़ांई ज़िउणौ ज़िणौ यीशु ज़िऔ आ।

⁷ओ मैरै प्यारै साथी विश्वासिउओ, हाऊं तुमुलै कोई नौंवौ हुकम नाईं लिखदौ, पर सेई पुराणै हुकम ज़ो पैहला ओउलै तुमुलै मिलै ई। इऐ पुराणै हुकम सै वचन ई ज़ो तुमुऐ शुणेई ज़ेबी तुमुऐ यीशु मसीह माथै विश्वास कियौ।

⁸तैबै हाऊं तुमुलै नौऐं हुकम लिखाऊ, और एथरी सौच़्च़ाई मसीहा दी और तुमु दी भी दिशा आ। कैलैकि न्यारौ आबै खातम थाका औन्दै लागी और सौच़्च़ाई रौ प्याशौ लागा च़मकदै।

⁹ज़ुण-कुण इणौ बोला कि हाऊं प्याशै दी ज़िआऊ, पर आपणै विश्वासी भाई आइलै छ़ाड़ा दुश्मनी, ता सेऊ इबी झ़ांऊ भी न्यारै दी ज़िआ आ।

¹⁰ज़ुण छ़ाड़ा आपणै भाई आइलै प्यार, सेऊ रौआ प्याशै दी और तेसदी ठोकर नाईं लागदी।

¹¹पर ज़ुण आपणै भाई आइलै दुश्मनी छ़ाड़ा आ, सेऊ न्यारै दी आ और न्यारै दी ज़िआ आ, और नाईं ज़ाणदौ कि किऐ डिया, कैलैकि न्यारै तेसरी आखी शेड़ी कौरी गोई।

¹²ओ लोल़डेउओ, हाऊं तुमुलै एथीलै लिखाऊ, कि यीशु मसीह रै नावां कौरी तुमारै पाप माफ हुऐ ई।

¹³ओ स्याणेउओ, हाऊं तुमुलै एथीलै लिखाऊ, ज़ो पैहला ओउलै तुमै तेस ज़ाणाई। ओ ज़वानो, हाऊं तुमुलै एथीलै लिखाऊ कि तुमै तेस दुष्टा (शैताना) कु ज़िते ई। ओ लोल़डेउओ, मुंइऐ तुमुलै एथीलै लिखौ आ कि तुमुऐ परमेश्‍वर बाब रवाई गौ आ।

¹⁴ओ स्याणेउओ, मुंइऐ तुमुलै एथीलै लिखौ आ कि ज़ो शुरु ऊ कु आ, तुमुऐ सेऊ रवाई गौ आ। ओ ज़वानो, मुंइऐ तुमुलै एथीलै लिखौ आ कि तुमै तागत वाल़ेई और परमेश्‍वरा रौ वचन तुमु दी रौआ सा, और तुमै तेस बुरै शैताना कु ज़िते ई।

¹⁵तुमुऐ ना ता दुनिया कु और ना दुनिया री च़िज़ा कु प्यार कौरौ। अगर कुण दुनिया कु प्यार छ़ाड़ा आ, ता तेसदी परमेश्‍वर बाबा रौ प्यार नाईं आ।

¹⁶कैलैकि ज़ो एस धौतरी दी आ मतलब शरीरा री इच़्छ़ा और आखी रौ लाल़च़ और कौमाई रौ घमण्ड, एऊ परमेश्‍वर बाबा री तौरफा कु नाईं पर दुनिया री तौरफा कु आ।

¹⁷सण्सार और तेसरी इच़्छ़ा दुइया खातम हुआई, पर ज़ुण परमेश्‍वरा री इच़्छ़ा माथै हाण्डा सेऊ सौदा ज़िउंदौ रौआ।

¹⁸ओ लोल़डेउओ, एऊ आखरी बौगत आ। और ज़िणौ तुमुऐ शुणौ आ कि मसीही रौ दुश्मन आशणै वाल़ौ आ, तेस ज़िणै ओर भी कई मसीह विरोधी उठीयौ खौड़ै हुऐ ई। एथ कौरी आमुकै पौतौ लागा कि एऊ आखरी बौगत आ।

¹⁹मसीह रै विरोधी निकल़ै ता ई आमु मांझ़िया कु, पर आमारै आपणै नाईं थै। अगर सै आमु मांझ़िया रै औआ थै, ता आमु आइलै रौआ थै। सै एथीलै निकल़ी गौऐ ताकी इणौ पौगड़ौ औआ कि सै आमु मांझ़िया रौ नाईं ई।

²⁰पर तुमुकै ता सै “पवित्र आत्मा” मसीहीऐ देई आ और तुमै सारौ कुछ़ ज़ाणाई।

²¹मुंइऐ तुमुलै एथलै नाईं लिखौ कि तुमै सौच़्च़ाई ज़ाणदै नाईं पर एथलै लिखौ, कि तुमै ज़ाणाई, और एथीलै कि कोई भी झ़ूठ सौच़्च़ाई री तौरफा कु नाईं।

²²झ़ुठौ कुण आ? सिरफ सेऊ ज़ुण यीशु, मसीही नाईं मानदौ। और मसीह रौ विरोधी सेऊ आ, ज़ुण परमेश्‍वर बाब और छ़ोहरु नाईं मानदौ।

²³ज़ुण छ़ोहरु नाईं मानदौ तेसकै परमेश्‍वर बाब भी नाईं आसतौ ज़ुण माना छ़ोहरु, तेसकै आ परमेश्‍वर बाब भी।

²⁴ध्याना कौरी शुणौ, ज़ेबी तुमुऐ मसीह यीशु माथै विश्वास कियौ आ और तिऐं सौच़्च़ाई रौ वचन शुणौ, सेऊ च़ांई तुमु दी रौइणौ। ज़ो तुमुऐ पैहले कु शुणौ आ अगर सेऊ आ तुमुकै, ता तुमै भी छ़ोहरु आइलै और बाबा आइलै रौआ ई।

²⁵और ज़ेथरौ परमेश्‍वरै आमु आइलै वायदौ कियौ आ सै सौदा री ज़िन्दगी आ।

²⁶मुंइऐ इऐ बुशै तुमुलै तिंउरै बारै दी लिखी आ, ज़ुण तुमु बहकावा ई।

²⁷पर तुमुकै ता सै “पवित्र आत्मा” यीशु मसीहीऐ देई आ सेऊ तुमु दी रौआ आ, तुमुकै एथरी ज़ुरत नाईं आ कि कुण तुमुकै शिखावा। हालांकी तुमुकै ता सै “पवित्र आत्मा” मसीहीऐ देई आ, तुमुकै सारी बुशै शिखावा आ, और पवित्र आत्मा सौच़्च़ौ आ झुठौ नाईं, ज़िणौ तिणीऐ तुमुकै शिखाऔ आ तिणी ई तुमै तेसदी बौणी रौआ ई।

²⁸ओ लोल़डेउओ, तेस आइलै रौऔ, ज़ेबी यीशु मसीह दुजी बारै पौगडौ औआ लौ तेबी तुमु दी हिम्मत औआ, और आमै तेसरै आशणै रै बौगतै तेसकु शौरमिंया नाईं।

²⁹अगर तुमै ज़ाणाई, कि मसीह धौर्मी आ, ता इणौ भी ज़ाणाई कि ज़ुण भौलाई रै काम कौरा सै परमेश्‍वरा रै लोल़डै ई।