Read Pahari, Mahasu 1 यहुन्ना 3 Bible Online

1 यहुन्ना 3 - Pahari, Mahasu bible

1 यहुन्ना 3

¹सुंच़ौ ता एरी, परमेश्‍वर बाबै आमु आइलै किणौ प्यार कियौ आ, कि आमै परमेश्‍वरा रै वारीस बौणै। और आमै आसती भी। पर एज़ै सण्सारा रै लोग इणौ नाईं ज़ाणदै कि आमै परमेश्‍वरा रै लोल़डै ई, कैलैकि तिंउऐ सेऊ भी ना रवावौ।

²ओ मैरै प्यारै साथी विश्वासिउओ, आबै आमै परमेश्‍वरा रै वारीस ई, इबी झ़ांऊ इणौ पौगड़ौ नाईं हुऔ कि आमै का कुछ़ औणै ई! आमै एती ज़ाणी कि ज़ेबी यीशु मसीह पौगड़ौ औलौ ता आमै तेस ज़िणै औणै ई, कैलैकि तेस तिणी ई देखी ई ज़िणौ सेऊ आसा आ।

³और ज़ुण मसीह माथै आश छ़ाड़ा आ, सेऊ आपु इणौ पवित्र कौरा आ, ज़िणौ सेऊ आ पवित्र। पर तुमुकै ता सै “पवित्र आत्मा” मसीहीऐ देई आ

⁴ज़ुण-कुण पाप कौरदै थाका लागी, सेऊ परमेश्‍वरा रै नियमा रौ विरोध कौरा आ। और नियमा रौ विरोध कौरणौ ई पाप आ।

⁵तुमै ज़ाणाई कि यीशु मसीह एथीलै आशौ कि पाप दूर कौरा। और तेसदी कोई पाप नाईं।

⁶ज़ुण तेस आइलै रौआ आ, सेऊ पाप कौरदै नाईं थाकदौ लागी। और ज़ुण कौरा आ पाप तिणीऐ नाईं सेऊ देखौ और नाईं तेस ज़ाणदौ।

⁷लोल़डेउओ, तुमुलै कुण धोखौ ना दिया। ज़ुण भौलाई रै काम कौरा आ, सेऊ ई मसीह ज़िणौ धौर्मी आ।

⁸ज़ुण पाप कौरदै थाका लागी सेऊ शैताना री तौरफा कु आ। कैलैकि शैतान पैहला ओउलै पाप थाका कौरदै लागी, परमेश्‍वरा रौ छ़ोहरु एथीलै पौगड़ौ हुऔ कि शैताना रै काम नाश कौरा।

⁹ज़ुण-कुण परमेश्‍वरा रै लोल़डै ई सेऊ पाप कौरदै नाईं थाकदौ लागी। कैलैकि परमेश्‍वरा री ज़िन्दगी रौआ आ सेऊ पाप कौरी ना बौल़दौ कैलैकि सेऊ परमेश्‍वरा रौ छ़ोहरु आ।

¹⁰एथीई कौरी शैताना रै वारीस और परमेश्‍वरा रै वारीस पराणिया ई। ज़ुण-कुण भौलाई रै काम नाईं कौरदौ सेऊ परमेश्‍वरा कु नाईं आ, और ना सेऊ ज़ुण आपणै भाई आइलै प्यार नाईं कौरदौ।

¹¹ज़ो खुशी री खौबर तुमुऐ पैहला कु शुणी आ, सै एज़ी आ कि आमै एकी दुजै आइलै प्यार कौरा।

¹²और आदमा रौ छ़ोहरु कैना ज़िणौ नाईं बौणौ, ज़ुणिऐ शैताना री बूश मानी आ, और आपणौ भाई झ़ांगौ आ। सेऊ केज़ै कारणै झ़ांगौ आ? एथीलै कि तेसरै काम बुरै थै, और तेसरै भाई रै काम थै धौर्मा रै।

¹³ओ भाईओ, अगर सण्सारा रै लोग तुमु आइलै दुश्मनी छ़ाड़ाई ता हैरान नाईं हुणी।

¹⁴आमै ज़ाणी कि आमै मौउता री तागती लांगीयौ सौदा री ज़िन्दगी दी पौउंच़ै ई, कैलैकि आमै भाईऊ आइलै प्यार छ़ाड़ी ई। ज़ुण प्यार नाईं छ़ाड़दौ सेऊ मौउता रै वशा दी आ।

¹⁵ज़ुण-कुण भाईऊ आइलै नफरत छ़ाड़ा आ सेऊ खुनी आ। और तुमै ज़ाणाई कि कासी भी खुनी दी सौदा री ज़िन्दगी नाईं औन्दी।

¹⁶आमुकै प्यारा रौ पौतौ यीशु मसीह कु लागौ की, तिणीऐ आमारी ताइंऐ आपणी ज़ान देई। एथीलै आमुऐ भी आपणै भाईऊ लै ज़ान देणी च़ांई।

¹⁷और ज़ास कासी कै धौतरी री ज़यदाद औली और एऊ आपणौ भाई गरीब देखीयौ तेस माथै दया कौरणी नाईं च़ाहा लौ ता तेसदी परमेश्‍वरा रौ प्यार किणै कौरी रौआ आ?

¹⁸ओ प्याऐ लोल़डेउओ, आमै वचन और ज़िभा कौरी नाईं पर काम और सौच़्च़ाई कौरीऐ भी प्यार कौरा।

¹⁹ज़ेबी आमै दुजेऊ आइलै प्यार कौरी ई ता आमै ज़ाणी की आमै सौच़्च़ाई रै ई और आमारै ज़िवा दी परमेश्‍वरा री नौज़री दी शान्ति हुआ आ।

²⁰एथीलै ज़ेज़ी बुशा दी आमारौ ज़िऊ आमु माथै आरोप लाआ लौ, ता आमै ज़ाणी कि परमेश्‍वर आमारै ज़िवा कु बौड़ौ आ, और सब कुछ़ ज़ाणा आ।

²¹ओ मैरै प्यारै साथी विश्वासिउओ, अगर आमारौ ज़िऊ आमुलै आरोप नाईं दिया लौ, ता आमुकै परमेश्‍वरा काऐ हिम्मत औआ आ।

²²और ज़ो कुछ़ आमै मांगी ई, सेऊ आमुकै तेसकु मिला आ, कैलैकि आमै तेसरै हुकम मानी ई, और ज़ो तेसकै आच़्छ़ौ लागा आ तेसी कौरी ई।

²³तेसरै हुकम इऐ ई कि आमै तेसरै छ़ोहरु यीशु मसीह रै नावां माथै विश्वास कौरा, और ज़िणौ तिणीऐ आमुलै हुकम दैऔ आ, ता तिणी ई आपु मांझ़िऐ प्यार छ़ाड़ौ।

²⁴ज़ुण तेसरै हुकम माना आ, सेऊ परमेश्‍वरा दी और परमेश्‍वरा तिऊं आइलै रौआ आ और एथीई कौरी, मतलब तिऐं पवित्र आत्मा कौरी ज़ो तिणीऐ आमुकै देई आ, आमै ज़ाणी ई की सेऊ आमु आइलै रौआ आ।