Read Pahari, Mahasu 1 यहुन्ना 4 Bible Online

1 यहुन्ना 4 - Pahari, Mahasu bible

1 यहुन्ना 4

¹ओ मैरै प्यारै साथी विश्वासिउओ, हर एक माथै विश्वास नाईं ज़ुण पवित्र आत्मा कौरी बोलणै रौ दावौ कौरा आ, पर आत्मा पौरखौ कि सै परमेश्‍वरा री तौरफा कु आसती कि नाईं। कैलैकि भौरी झ़ुठै भविष्यवक्ता धौतरी दी ई।

²परमेश्‍वरा री आत्मा तुमै इणै कौरी पौरखी सौका ई: ज़ुण आत्मा माना की यीशु मसीह शरीरा रै रुपा दी आशौ आ, सै परमेश्‍वरा री तौरफा कु आ,

³ज़ो आत्मा यीशु नाईं मानदी, सै परमेश्‍वरा री तौरफा कु नाईं आ। और सेई ता मसीह रै विरोधी आत्मा सा, ज़ेथरै बारै दी तुमुऐ शुणौ भी आ कि सेऊ आशणै वाल़ौ आ और इबी भी धौतरी दी आ,

⁴ओ लोल़डेउओ, तुमै परमेश्‍वरा रै ई और तुमै झ़ुठै भविष्यवक्ता माथै ज़िते ई। कैलैकि ज़ो पवित्र आत्मा तुमु दी आ सेऊ तेस शैताना कु बौड़ौ आ ज़ो इऐं धौतरी माथै राज़ कौरा आ,

⁵सै झ़ुठै भविष्यवक्ता धौतरी रै ई, एथीलै सै धौतरी री बुशै बोलाई, और धौतरी रै लोग तिउंरी शुणा आ।

⁶आमै परमेश्‍वरा रै ई। ज़ुण परमेश्‍वर ज़ाणाई, सेऊ आमारी शुणा आ। ज़ुण परमेश्‍वर नाईं ज़ाणदौ सै सेऊ आमारी नाईं शुणदौ। इणै कौरीऐ आमै सौच़्च़ाई री और झ़ुठी आत्मा पौरखी ई।

⁷ओ मैरै प्यारै साथी विश्वासिउओ, आपु मांझ़िऐ प्यार छ़ाड़ौ। कैलैकि प्यार परमेश्‍वरा कु आ। ज़ुण दुजेऊ आइलै प्यार कौरा सेऊ परमेश्‍वरा रौ छ़ोहरु आ और परमेश्‍वर रवावा आ।

⁸ज़ुण दुजेऊ आइलै प्यार नाईं कौरदौ सेऊ परमेश्‍वर नाईं पराणदौ, कैलैकि परमेश्‍वर प्यार आ।

⁹ज़ो प्यार परमेश्‍वर आमुकु कौरा आ, सेऊ एथकु पौगड़ौ हुऔ कि परमेश्‍वरै आपणौ एकलौतौ छ़ोहरु धौतरी दी भेज़ौ आ ताकी आमुलै तेस कौरी सौदा री ज़िन्दगी मिला।

¹⁰प्यार एथ कौरी नाईं कि आमुऐ परमेश्‍वरा आइलै प्यार कियौ आ, पर एथ कौरी कि तिणीऐ आमु आइलै प्यार कियौ आ। और आमारै पापा री माफी रै बौदल़ै आपणौ छ़ोहरु भेज़ौ।

¹¹ओ मैरै प्यारै साथी विश्वासिउओ, ज़ैबै परमेश्‍वरै आमु आइलै इणौ प्यार कियौ, ता आमुऐ भी आपु मांझ़िऐ प्यार छ़ाड़णौ च़ांई।

¹²परमेश्‍वर केबी भी कोइऐ ना देखौ। पर ज़ैबै आमै आपु मांझ़िऐ प्यार छ़ाड़ुलै, ता परमेश्‍वर आमुदी रौआ आ, और तेसरौ प्यार आमुदी पौगड़ौ हुई गौ आ।

¹³एथीई कौरी आमै ज़ाणी कि आमै तेसी दी ज़िवी ई, और सेऊ आमुदी। कैलैकि तिणीऐ आपणी पवित्र आत्मा आमुलै दैऔ आ।

¹⁴और आमुऐ छ़ोहरु देखी भी गौ आ और गवाही देई ई, कि परमेश्‍वर बाबै आपणौ छ़ोहरु धौतरी रै लोगु रै पापा कु छ़ुटकारै दैणा लै भेज़ौ।

¹⁵ज़ुण-कुण इणौ माना आ, कि यीशु परमेश्‍वरा रौ छ़ोहरु आ, परमेश्‍वर तेसदी ज़िवा, और सेऊ परमेश्‍वरा दी।

¹⁶ज़ो प्यार परमेश्‍वर आमु आइलै कौरा आ, तेस आमै ज़ाणी ई, और आमुकै तेसरौ विश्वास आ। परमेश्‍वर प्यार आ और ज़ुण प्यारा दी ज़िवा आ, सेऊ परमेश्‍वरा दी ज़िवा आ, और परमेश्‍वर तेसदी।

¹⁷एथीई कौरी प्यार आमुदी पाकौ हुऔ कि आमुकै फैसलै रै दिना दी हिम्मत औआ। ज़िणौ यीशु मसीह परमेश्‍वरा आइलै कौट्ठै हुइयौ रौआ आ तिणी आमुऐ भी इऐं दुनिया दी परमेश्‍वरा आइलै कौट्ठै च़ांई रौअणौ।

¹⁸प्यारा दी डौर नाईं औन्दौ, बल्कि आच़्छ़ौ प्यार डौर दूर कौरा आ। कैलैकि डौरा रौ रिश्तौ सौज़ा आइलै औआ आ, और ज़ुण डौरा सेऊ प्यारा दी आच़्छ़ौ नाईं आ।

¹⁹आमै परमेश्‍वरा आइलै और एकी दुजै आइलै एथीलै प्यार कौरी ई, कैलैकि परमेश्‍वरै पैहलै आमु आइलै प्यार कियौ आ।

²⁰अगर कुण बोलालौ कि हाऊं, “परमेश्‍वरा आइलै प्यार कौराऊ” पर आपणै विश्वासी भाई आइलै छ़ाड़ा लौ दुश्मनी ता सेऊ झ़ुठौ आ। कैलैकि ज़ुण आपणै विश्वासी भाई आइलै ज़ो तिणीऐ देखौ आ प्यार नाईं छ़ाड़दौ, ता सेऊ परमेश्‍वरा आइलै ज़ो तिणीऐ नाईं देखौ प्यार किणौ कौरी बोल़ा आ।

²¹तेसकु आमुलै इणौ हुकम मिलौ आ, कि ज़ुण परमेश्‍वरा आइलै प्यार कौरा आ, सेऊ आपणै विश्वासी भाई आइलै भी प्यार कौरा।