Read Pahari, Mahasu 3 यहुन्ना 1 Bible Online

3 यहुन्ना 1 - Pahari, Mahasu bible

3 यहुन्ना 1

¹मुं स्याणै री तौरफा कु तेस आच़्छ़ै गयुसा रै नावां दी, ज़ास आइलै हाऊं सौच़्च़ौ प्यार कौराऊ।

²ओ आच़्छ़ै भाई, हाऊं इणी प्राथना कौराऊ, कि ज़िणौ तू आत्मा दी बौड़दै लागौ औन्दौ तिणी ई तू सारी बुशु दी भी बड़, और भौलौ च़ांगौ रौऊ।

³कैलैकि ज़ैबै भाईउऐ आशीयौ, तेरी सै सौच़्च़ाई री गवाही देई, ज़ास माथै तू सौच़्च़ी हाण्डा ई ता हाऊं भौरी खुश हुऔ।

⁴मुलै एथकु बौड़ियौ औज़ौ केज़ी खुशी नाईं, कि हाऊं शुणु, कि मैरै लोल़डै सौच़्च़ाई माथै हाण्डा ई।

⁵ओ आच़्छ़ै भाई, ज़ो कुछ़ तू तिऊं भाईऊ आइलै भौलै काम कौरा ई, ज़ास तुमै नाईं ज़ाणदै, तिऊं आइलै विश्वासिऊ ज़िणी भौलाई कर।

⁶तिंउऐ कलिसिया दी तैरै प्यारा रै बारै दी गवाही देई थी, अगर तू तिऊं तिणौ विदा कौरालौ ज़िणौ परमेश्‍वरा रै लोगु लै ठीक आ ता आच़्छ़ौ कौरा ई।

⁷कैलैकि सै मसीह रै काम कौरना लै निकल़ै ई, और दुजी ज़ाती कु कुछ़ नाईं निंदै,

⁸एथीलै इणेऊ रौ स्वागत च़ांई कौरणौ, ज़ेथकु आमै भी सौच़्च़ाई रै पौक्षा दी तिऊं रै साथी हुआ।

⁹मुंइऐ कलिसिया लै चिट्ठी लिखी थी, पर दियुत्रिफेस ज़ो तिऊं मांझ़िऊ बौड़ौ बौणनौ च़ाहा आ, आमु नाईं अपणाउंदौ।

¹⁰ज़ेबी हाऊं आशु लै, ता तेसरै कामा लै ज़ो सेऊ कौरदै आ लागौ औन्दौ याद दिलावाऊ, कि सेऊ आमारै बारै दी बुरी-बुरी बुशै भौका आ। और एथ माथै भी तसल्ली नाईं कौरीयौ आपु ई भाईऊ नाईं अपणाउंदौ। और ज़ास कलिसिया अपणाउणै च़ाहा ई, तिउंलै भी कौरा नाईं। और कलिसिया कु गाड़ा आ पोरु।

¹¹ओ आच़्छ़ै भाईओ, बुराई रै नाईं, पर भौलाई रै साथी बौणौ, ज़ुण भौलाई कौरा ई, सै परमेश्‍वरा री तौरफा कु ई। पर ज़ुण कौरा ई बुराई, तिणीऐ परमेश्‍वर नाईं देखौ।

¹²देमेत्रियुसा रै बारै दी सारेउऐ बल्कि सौच़्च़ाईऐ भी आपु ई गवाही देई: और आमै भी गवाही देई, और तू ज़ाणाई, कि आमारी गवाही सौच़्च़ी आ।

¹³मुंइऐ ताउंलै भौरी कुछ़ लिखणौ थौ, पर सियाई और कलमा कौरी लिखणौ नाईं च़ांहादौ।

¹⁴पर मुकै आश आ कि हाऊं ताऊं कु फेटी मिला ऊ: तैबै आमै आमनै-सामनै बुशै लाई

¹⁵ताउंलै शान्ति मिलदै रौआ। इदलै गोश्टण ताउंलै ढाल कौरा ई: तिदलै गोश्टणु लै नाऊं नींई-नियौं ढाल बोलै।