Read Pahari, Mahasu प्रकाशित 17 Bible Online

प्रकाशित 17 - Pahari, Mahasu bible

प्रकाशित 17

¹ज़ेज़ै सात सौरगदूता कै सै सात खोरु थै, तिऊं मांझ़िया कु एकीऐ आशीयौ मुकै इणौ बोलौ, “ओरु आश, हाऊं ताउंकै देखावा कि परमेश्‍वर तिऐं बौड़ी गान्दै काम कौरणै वाल़ी लै किणी सौज़ा दिया आ, ज़ो इणी ज़ागाह दी आ बोशी ऐन्दी ज़िऐ भौरी नौंई ई,

²ज़ास आइलै धौतरी रै राज़ेउऐ गान्दै काम किऐ ई। और धौतरी रै रौइणै वाल़ै तिंयारी सूर पीई आ मतलब गान्दै कामा दी बहकी गौऐ थै।”

³तैबै तिणीऐ हाऊं आत्मा दी शुनशान ज़ागाह दी नियौं, तिऐ मुंइऐ रातै रौंगा रै बुरै जानवरा माथै एक छ़ेउड़ी बोशी औन्दी देखी। सेऊ बुराई रै नावां कौरीऐ थौ भौरुऔ औन्दौ और ज़ासरै सात मूंड और दस शींग थै।

⁴इंऐ छ़ेउड़ीऐ बैंगनी और रातै रौंगा रै जुड़कै थै भिड़ै औन्दै, और सुनै और भौरी मैंहगै मौणी और मोती कौरीऐ थी सौज़ी ऐन्दी, और तियांरै हाथा दी थौ एक सुनै रौ खोरु ज़ो जौगरी च़िज़ेऊ कौरी और तियांरै बुरै कामा री अशुद्ध च़िज़ेऊ कौरी थौ भौरौ औन्दौ।

⁵तियांरै कौपाल़ा दी एऊ नाऊं, और एक राज़ थौ लिखौ औन्दौ, “बेबीलौना बौड़ै शैहर धौतरी री वेश्या और गान्दै काम कौरणै वाल़ेऊ री मां।”

⁶और मुंइऐ सै छ़ेउड़ी परमेश्‍वरा रै लोगु रौ लोऊ और यीशु रै गवाही रौ लोऊ पीईयौ माच़ी ऐन्दी देखी। तिंया देखीयौ हाऊं हैरान हुई गौ।

⁷तैबै तिणी सौरगदूतै मुलै बोलौ, “तू हैरान कैलै हुऔ? हाऊं इऐं छ़ेउड़ी और तेस जानवरा रौ ज़ास माथै सै बोशी ऐन्दी आ और ज़ासरै सात मूंड और दस शींग ई, ताउंकै भेद बोलाऊ।

⁸ज़ो जानवर ताइंऐ देखौ आ, सेऊ पैहलै ता थौ पर आबै नाईं आ, और अधोलोका कु निकल़ियौ मौउता दी पौड़ा आ। और धौतरी रै रौइणै वाल़ै ज़ासरै नाऊं धौतरी रै बौणनै रै बौगता कु ज़िन्दगी री किताबी दी नाईं लिखै, एस जानवरा री इणी हालत देखीयौ कि पैहलौ थौ और आबै नाईं आ और तौंइऐ आशा आ, हैरान हुआ लै।

⁹“ताऊं कै इऊं निशाणिऊ सौमझ़णा लै बौड़ी सौमझ़दारी कौरी सुंच़णौ ज़ुरुरी आ। सै सात मूंड सात टिरै ई ज़ास माथै सै छ़ेउड़ी बोशी ऐन्दी आ।

¹⁰सै सात राज़ै भी ई, तिऊं मांझ़िया कु पांज़ राज़ै ता मौरी भी गौऐ ई, और तिऊं मांझ़िया कु एक इबी राज़ौ आ, और एक इबी झ़ांऊ नाईं आशौ, ज़ेबी आशा लौ ता कुछ़ बौगता झ़ांऊ तेसरौ रौइणौ भी ज़ुरुरी आ।

¹¹ज़ो जानवर पैहलै थौ, और आबै नाईं आ, सेऊ आपु ई आठवौ आ और तिऊं सातिआ मांझ़िया कु पैदौ हुऔ, ज़ुण आखरी दी नाश हुणौ आ।

¹²ज़ो दस शींग ताइंऐ देखै सै दस राज़ै ई ज़ुणिऐ इबी झ़ांऊ राज़ नाईं कियौ, पर तेस जानवरा आइलै थोड़ै ई बौगता लै राज़ेऊ ज़िणौ हक्क पा लौ।

¹³इऐ सौभी एक मन हुणेई, और सै आपणी-आपणी शक्ति और हक्क तेस जानवरा कै दिआई।

¹⁴“सै गाबड़ु आइलै पिटिआ ई, और गाबड़ु तिऊंकु ज़िता लौ, कैलैकि सेऊ प्रभु रौ प्रभु और राज़ेऊ रौ राज़ौ आ, और ज़ो औटाऐ औन्दै और छ़ांटै औन्दै और विश्वासी ई सै तिऊं आइलै ई। सै भी ज़िता ई।”

¹⁵तैबै तिणीऐ मुलै बोलौ, “ज़ो पाणी ताइंऐ देखौ, ज़ास माथै वेश्या बोशी ऐन्दी आ। सै लोग और भीड़ और ज़ाती और बोली ई।

¹⁶“ज़ो दस शींग ताइंऐ देखै, सै और जानवर तिऐं वेश्या कु नफरत छ़ाड़ाई, और तिऐं लाच़ार और नांगै कौरालै, और तिंआरौ मांस खा लै, और तिंआ आगी कौरी ज़ाल़ा लै।

¹⁷ज़ेज़ी छ़ेउड़ी ताइंऐ देखी आ, सै भौरी बौड़ौ शैहर आ ज़ो दुनिया रै सारै राज़ेऊ माथै राज़ कौरा आ। इऐ बुशै तिऐं छ़ेउड़ी आइलै हुई गोई ई कैलैकि परमेश्‍वरै तिंउरै मन आपणै मकसद पुरै कौरना लै च़ौलाऐ थै। एथीलै कि ज़ेबी झ़ाऊं परमेश्‍वरा री बोली ऐन्दी बुशै पुरी ना हुआ ली तेबी झ़ाऊं तिऊं सारेउऐ आपणौ हक्क तेस बुरै जानवरा कै देई गौ थौ।”