Read Pahari, Mahasu प्रकाशित 19 Bible Online

प्रकाशित 19 - Pahari, Mahasu bible

प्रकाशित 19

¹एथ बासिऐ मुंइऐ सौरगा दी ज़िणी बौड़ी भीड़ उंच़ी बाच़ा दी इणौ बोलदै शुणी, “हाल्लेलुय्याह! छ़ुटकारौ और बौड़ाई और शक्ति आमारै परमेश्‍वरा री ई आ।

²कैलैकि तेसरै फैसलै सौच़्च़ै और ठीक ई। एथीलै कि तिणीऐ तिऐं बौड़ै बुरै काम कौरणै वाल़ी रौ, ज़ो आपणै गान्दै कामा कु धौतरी नाश कौरा थी, फैसलौ कियौ और तियांकु आपणै सेवका रै लोऊ रौ बौदल़ौ निऔं आ।”

³तैबै दुजी बारै तिंउऐ बोलौ, “हाल्लेलुय्याह! तिंआरै ज़ौल़णै रौ धुंऔ पीड़ी-पीड़ी झ़ांऊ थाका आ उठदै लागी।”

⁴तैबै चौब्बिस स्याणेउऐ और च़ार प्राणिउऐ धौनी पौड़ीयौ परमेश्‍वरा कै ढाल की, ज़ुण राज़गद्दी माथै थौ बोशौ औन्दौ, और बोलौ, “आमीन! हाल्लेलुय्याह!”

⁵तैबै राज़गद्दी कु एक बाच़ निकल़ी, “ओ मैरै परमेश्‍वरा कु डौरणै वाल़ै लोगुऔ, का छ़ोटै, का बौड़ै। तुमै सारै तेसरी स्तुति कौरौ।”

⁶तैबै मुंइऐ बौड़ी भीड़ा ज़िणौ और भौरी पाणी ज़िणी बाच़, और गुड़णै री बौड़ी बाच़ शुणी: “हाल्लेलुय्याह! कैलैकि प्रभु आमारौ परमेश्‍वर सौभी कु शक्ति वाल़ौ राज़ कौरा सा।

⁷आशौ, आमै खुश और मगन हुई, और तेसरी बौड़ाई कौरी, कैलैकि गाबड़ु री शादी आशी गोई आ, और तेसरी लाड़ी त्यार हुई गोई आ।

⁸और तेसकै शुद्ध और च़मकदार मलमला रै जुड़कै भिड़णै रौ हक्क देई गौ आ, कैलैकि तेस नांदै धागै वाल़ै मलमला रौ मतलब परमेश्‍वरा रै लोगु रै धौर्मा रै काम ई।”

⁹और तिणी सौरगदूतै मुलै बोलौ, “एस लिख, कि आशीष वाल़ै ई सै, ज़ुण गाबड़ु री शादी री रोटी खान्दै ई औटाऐ औन्दै।” तैबै तिणीऐ मुलै बोलौ, “इऐ वचन परमेश्‍वरा रै सौच़्च़ै वचन ई।”

¹⁰और हाऊं तेसकै ढाल कौरना लै तेसरै बांगणै माथै पौड़ौ। तिणीऐ मुलै बोलौ, “देख, इणौ नाईं कर, हाऊं तैरै और तैरै भाई रौ गवाह ऊ, ज़ुण यीशु री गवाही दैणा लै आ टेकौ औन्दौ परमेश्‍वरा कै ढाल कर।” कैलैकि यीशु री गवाही भविष्यवाणी री आत्मा आ।

¹¹तैबै मुंइऐ सौरग खुलौ औन्दौ देखौ। और देखौ कि एक शेतौ घोड़ौ आ। तेस माथै एक सवारी आ, ज़ुण भरोसैमंद सौच़्च़ौ सेवादार आ। और सेऊ धौर्मा आइलै फैसलौ और लड़ाई कौरा आ।

¹²तेसरी आखी आगी रौ प्याशौ आ। और तेसरै मुंडा माथै भौरी ताज़ ई। और तेस माथै एक नाऊं आ लिखौ औन्दौ, ज़ास तेसरै सिवाऐ ओर कोई ना ज़ाणदौ।

¹³तिणीऐ लोऊ कौरी छ़िड़काऐ औन्दै जुड़कै ई भिड़ै औन्दै: और तेसरौ नाऊं परमेश्‍वरा रौ वचन आ।

¹⁴सौरगा री फौज़ शेतै घोड़ै माथै बोशियौ और शेतै और शुद्ध मखमला भिड़ीयौ तेस पिछ़ु-पिछ़ु आ।

¹⁵ज़ाती-ज़ाती झ़ांगणा लै तेसरै मुंआ कु एक च़ोखी तलवार निकल़ा आ। और सेऊ लोहै रौ राज़ दण्ड आणियौ तिऊं माथै राज़ कौरा, और सारेऊ कु शक्ति वाल़ै परमेश्‍वरा रै भयानक रोशा री जलना री सूरा रै कुंडा दी अंगूर फेंच़ा ई।

¹⁶तेसरै जुड़कै और जांघा दी एऊ नाऊं आ लिखौ औन्दौ: “राज़ेऊ रौ राज़ौ और प्रभु रौ प्रभु।”

¹⁷तैबै मुंइऐ सौरगा रौ एक दूत सुरजा माथै खौड़ौ देखौ। तिणीऐ बौड़ी हाका मारीयौ आसमान दी उड़णैवाल़ै सौभी च़िड़ु-च़ौटकेरु लै बोलौ, “आशौ, परमेश्‍वरा रै बौड़ै भोज़ा लै कौठै हुऔ,

¹⁸ज़ेथ कौरी तुमै राज़ेऊ रौ मांस, और शक्ति वाल़ै आदमी रौ मांस, और घोड़ेऊ रौ और तिऊं माथै बोशै औन्देऊ रौ मांस, और का आज़ाद का सेवक, का छ़ोटै का बौड़ै, सारै लोगु रौ मांस खाऔ।”

¹⁹तैबै मुंइऐ सेऊ जानवर, और धौतरी रै राज़ेऊ और तिउंरी फौज़ तेस घोड़ै माथै बोशै औन्दै और तेसरी फौज़ा आइलै लौड़णा लै कौठै देखै।

²⁰सेऊ बुरौ जानवर, और तेस आइलै सेऊ झ़ुठौ भविष्यवक्ता पाकड़ुऔ ज़ुणिऐ तेस काऐ इणी निशाणी देखा ई थी ज़ास कौरी तिणीऐ सै अज़माऐ थै ज़ास माथै तेस बुरै जानवरा री छ़ाप थी और ज़ो तेसरी मूर्ती री पुज़ा कौरा थै। इऐ दुइआ ज़िउंदै ई तिंआ आगी दी पाऐ ज़ो गन्धका कौरी ज़ौल़ा थी।

²¹बाकी ज़ो लोग बौच़ै औन्दै थै सै तिणीऐ, ज़ो घौड़ै माथै बोशौ औन्दौ थौ ज़ासरै मुंआ कु तलवार निकल़ा थी, झ़ांगै। और सारै च़िड़ु-च़िटकेरु तिंउरै मांसा खाइयौ डौटी गौऐ।