Read Pahari, Mahasu प्रकाशित 20 Bible Online

प्रकाशित 20 - Pahari, Mahasu bible

प्रकाशित 20

¹तैबै मुंइऐ सौरगा कु एक सौरगदूत उतुरदै देखौ, ज़ासरै हाथै दी अधोलोका री ताल़टी और एक बौड़ी शांगल़ थी।

²तिणीऐ तेस अजगरा लै मतलब पुराणै सापा लै, ज़ो इबलीस और शैतान आ, सेऊ पाकड़ियौ हज़ार बौरशा लै बानी ऐरौ,

³और तेस अधोलोका दी पाइयौ बन्द कौरी ऐरौ, और तेस माथै मुहर लाई कि एऊ हज़ार बौरश पुरै हुणै झ़ांऊ ज़ाती-ज़ाती रै लोगु औज़ौ नाईं पौरखा लौ। तेत बासिऐ ज़ुरुरी आ तेस कुछ़ बौगता लै औज़ौ खोला।

⁴तैबै मुंइऐ राज़गादी देखी, और तिऊं माथै लोग बोशी गौऐ, और तिउंकै फैसलै कौरणै रौ हक्क दैऔ। मुंइऐ तिउंरी आत्मा भी देखी, ज़ासरै मूंड यीशु री गवाही दैणै और परमेश्‍वरा रै वचना री वज़ाह कु काटै औन्दै थै, और ज़ुणिऐ ना तेस जानवरा री, और ना तेसरी मूर्ती री पुज़ा की थी, और ना तेसरी छ़ाप आपणै कौपाल़ा और हाथा दी लाई थी। सै ज़िउंदै हुइयौ मसीह आइलै हज़ार बौरशा झ़ांऊ राज़ कौरदै रौऐ।

⁵ज़ेबी झ़ांऊ इऐ हज़ार बौरश पुरै ना हुआ लै तेबी झ़ांऊ बाकी मौरै औन्दै लोग ज़िउंदै ना हुआ लै। एऊ ता पैहलौ ज़िउंदौ हुणौ आ।

⁶आशीष वाल़ै और पवित्र ई सै, ज़ो एज़ै पैहलै ज़िउंदै हुणै रै साथा दी ई। इणेऊ माथै दुजी मौउता रौ कुछ़ भी हक्क नाईं, पर सै परमेश्‍वर और मसीहा रै याजक हुआई और तेस आइलै हज़ार बौरशा रौ राज़ कौरा ई।

⁷ज़ैबै हज़ार बौरश पुरै हुआ लै ता शैतान कैदा कु पोरु छ़ाड़ाई।

⁸सेऊ तिऊं ज़ातीऊ लै ज़ो पुरी दुनिया दी हुआ लै, मतलब गोग और मागोगा लै ज़ासरी गिनती समुन्दरा रै बाल़ु रै बराबर हुआ आ, बहकाइयौ लड़ाई लै कौट्ठै कौरना लै निकल़ा लौ।

⁹सै सारै धौतरी माथै फैअलियौ परमेश्‍वरा रै लोगु री छ़ावनी और आच़्छ़ौ इलाकौ घेरा। और आग सौरगा कु उतरियौ तिऊं भस्म कौरा आ।

¹⁰तिंउरौ बहकाउणै वाल़ौ शैतान आग और गन्धका री तिऐं झ़िला दी, ज़ासदी सेऊ जानवर और झ़ुठौ भविष्यवक्ता भी हुआ, तेथदी पा आ ई। और सै राची-दिनै सौदा झ़ांऊ दुखा दी तौड़फदै रौआ ई।

¹¹तैबै मुंइऐ एक बौड़ी शेती राज़गाद्दी और सेऊ देखौ ज़ो तेथ माथै थौ बोशौ औन्दौ। तेस काऐ कु धौतरी और सौरग भागी गौऐ, और तिउंकै ज़ागाह नाईं मिली।

¹²तैबै मुंइऐ छ़ोटै-बौड़ै सारै मौरै औन्दै राज़गाद्दी काऐ खौड़ै देखै, और किताब खोली गोई। तैबै औज़ौ एक किताब खोली, मतलब ज़िन्दगी री किताब। और ज़िणौ तिऊं किताबी दी थौ लिखौ औन्दौ, तिणी ई तिंउरै कामा रै मुताबिक मौरै औन्देऊ रौ फैसलौ कियौ।

¹³समुन्दरै सै मौरै औन्दै ज़ो तेथदी थै देई गौऐ और मौत और अधोलोकै सै मौरै औन्दै ज़ो तेथदी थै देई गौऐ। और तिऊं मांझ़िआ कु हर एकी रौ तिंउरै कामा रै मुताबिक फैसलौ कियौ।

¹⁴मौत और अधोलोक भी आगी री झ़िला दी पाऐ। इऐ आगी री झ़ील दुजी मौत आ।

¹⁵और ज़ास कासी रौ नाऊं ज़िन्दगी री किताबी दी लिखौ औन्दौ नाईं मिला लौ, सेऊ आगी री झ़िला दी पाऔ।