Read Pahari, Mahasu प्रकाशित 21 Bible Online

प्रकाशित 21 - Pahari, Mahasu bible

प्रकाशित 21

¹तैबै मुंइऐ नौंउऔ सौरग और नौंउई धौतरी देखी, कैलैकि पैहलौ सौरग और पैहली धौतरी डेउंदै थाकी लागी, और समुन्दर भी नाईं रौऔ।

²तैबै मुंइऐ पवित्र शैहर नौंवौ यरुशलेम सौरगा कु परमेश्‍वरा काऐ कु उतुरदै देखौ। सै तिंया लाड़ी ज़िणी थी ज़ो आपणै बोउटै लै सौज़ी औन्दी हुआ।

³तैबै मुंइऐ राज़गाद्दी कु कोई उंच़ी बाच़ा दी इणौ औटाउंदै शुणौ, “देखौ, परमेश्‍वरा रौ डेरौ लोगु मांझ़िऐ आ। सेऊ तिऊं आइलै डेरौ कौरा, और सै तेसरै लोग औलै, और परमेश्‍वर आपु तिऊं आइलै रौआ, और तिऊंरौ परमेश्‍वर हुआ।

⁴सेऊ तिउंरी आखी कु सारै आशु घुशा। और तेत बासिऐ मौउत नाईं रौउंदी, और ना शोक, ना लेरणौ, ना दुःख रौआ लौ। पैहली बुशै डेउंदै थाकी लागी।”

⁵ज़ो राज़गाद्दी माथै थौ बोशौ औन्दौ, तिणीऐ बोलौ, “देख, हाऊं सारौ कुछ़ नौंउऔ कौराऊ।” तैबै तिणीऐ बोलौ, “पोरु लिख, कैलैकि एऊ वचन विश्वासा रै लायक और सौच़्च़ौ आ।”

⁶तैबै तिणीऐ मुलै बोलौ, “इऐ बुशै पुरी हुई गोई आ। हाऊं अलफा और ओमेगा, शुरुवात और आखरी ऊ। ज़ुण-कुण भी चिशौ औलौ हाऊं तिंउलै सौदा री ज़िन्दगी दैणै वाल़ै पाणी रै ज़ौल़ा मांझ़िआ कु सेंत मेंत पिलावा ऊ।”

⁷ज़ुण-कुण तिऊं सारी बुरी तागती ऊ हरावा लौ सेऊ इऊं च़िज़ा रौ वारीस हुआ लौ, और हाऊं तिंउरौ परमेश्‍वरा रौउलौ, और सेऊ मैरौ छ़ोहरु हुआ।

⁸पर डरपोक, और अविश्वासिऊ, बुरै, और हत्यारै और गान्दै काम कौरणै वाल़ेऊ, और ज़ादु-टोन्है कौरणै वाल़ै, और मूर्ती पुज़णै वाल़ै, और सारै झ़ुठेऊ रौ हिस्सौ तिऐं झ़िला दी मिला ई ज़ो आग और गन्धका कौरी ज़ौल़दै रौआ ई: इऐ दुजी मौत आ।

⁹तैबै ज़ेज़ै सात सौरगदूता कै पिछ़लै दुखा कौरी भौरै औन्दै सात कटोरै थै, तिऊं मांझ़िआ कु एक मुकाऐ आशौ, और मुं आइलै बुशै लाइऔ बोलौ, “ओरु आश, हाऊं ताउंकै लाड़ी मतलब गाबड़ु री बोउटी देखाल़ा ऊ।”

¹⁰तैबै तिणीऐ हाऊं आत्मा दी एक बौड़ी और उंच़ी टिरा माथै निऔं, और पवित्र इलाकौ यरुशलेम सौरगा कु परमेश्‍वरा काऐ कु उतुरदै देखाल़ौ।

¹¹परमेश्‍वरा री महिमा तेथदी थी, और तेसरौ प्याशौ भौरी किमत्ती ढोल़, मतलब बिल्लौरा रै ज़िणौ यशबा ज़िणी साफ थी।

¹²तेसरी शहरपनाह भौरी उंच़ी थी, तेसरै बाराह बौड़ै दार और बौड़ै दारा माथै बाराह सौरगदूत थै। और तिऊं बौड़ै दारा माथै इस्राइलिऊ रै बाराह गोत्रा रै नाऊं थै लिखै औन्दै।

¹³पुर्वा री तौरफा दी चीन बौड़ै दार, उतरा री तौरफा दी चीन बौड़ै दार, दक्षिणा री तौरफा दी चीन बौड़ै दार, और पश्चिमा री तौरफा दी भी चीन बौड़ै दार थै।

¹⁴इलाकै री शहरपनाह री बाराह पौई थी, और तिऊंदी गाबड़ु रै बारह प्रेरिता रै नाऊं थै लिखै औन्दै।

¹⁵ज़ो मुं आइलै बुशै लाइंदै थौ लागौ औन्दौ तेसकै इलाकै और तेसरै बौड़ै दार और तेसरी शहरपनाह नापणा लै सुनै रौ एक गज़ थौ।

¹⁶सेऊ इलाकौ च़ार कुणै दी थौ बौसौ औन्दौ और तेसरी लम्बाई, च़ौड़ाई रै बराबर थी। और तिणीऐ तेस गज़ा कौरी सेऊ इलाकौ नापौ, ता साड़ै सात शौ कोसा रौ निकल़ौ तेसरी लम्बाई और च़ौड़ाई और उंच़ाई बराबर थी।

¹⁷तिणीऐ तेसरी शहरपनाह आदमी रै मतलब सौरगदूता रै नावां कौरी नापौ, ता एक शौ दुई बिऐ च़ार हाथ निकल़ौ।

¹⁸तेसरी शहरपनाह यशबा री थी बौणी औन्दी, और इलाकौ इणै च़ोखै सुनै रौ थौ ज़ो साफ शिशै रौ थौ बौणौ औन्दौ।

¹⁹तिऊं इलाकै री पौई भौरी रौंगा रै किमत्ती ढोल़ा कौरी थी सौज़ाई ऐन्दी। पैहली पौई यशबा री, दुजै नीलमणी री, चीजी लालड़ी री, च़ौथी मरकता री,

²⁰पांज़वी गोमेदका री, छ़ौउवी माणिक्या री, सातवी पीतमणि री, आठवी पेरिजा री, नौंवी पुखराजा री, और दसवी लहसनिऐ री, ग्यारवी धूम्रकान्ता री, और बारुवी याकूता री थी।

²¹बारह बौड़ै दार बाराह मोतिऊ रै थै: एक-एक बौड़ै दार एक-एक मोती रौ थौ चाणौ औन्दौ। इलाकै री सौड़क साफ शिशै ज़िणै च़ोखै सुनै री थी

²²मुंइऐ तेसदी कोई मन्दिर नाईं देखौ, कैलैकि सारेऊ कु शक्ति वाल़ौ प्रभु-परमेश्‍वर और गाबड़ु तेसरौ घौर ई।

²³तेस इलाकै दी सुरज और ज़ुना रै प्याशै री ज़ुरत नाईं, कैलैकि परमेश्‍वरा रै प्याशै कु तेसदी प्याशौ आ लागदै लागौ औन्दौ, और गाबड़ु तेसरौ दिवौ आ।

²⁴धौतरी रै लोग तेसरै प्याशै दी आण्डा-फिरा ई, और धौतरी रै राज़ै आपणै-आपणै प्याशै रौ समान तेसदी आणाई।

²⁵तेसरै बौड़ै दार केबी भी दुसै बन्द नाईं औन्दै, और तिऐ राच नाईं औन्दी।

²⁶लोग धौतरी रौ प्याशौ और सुखा रौ समान तेसदी आणाई।

²⁷पर तेसदी कोई खराब च़ीज़, या गान्दै काम कौरणै वाल़ौ, या झ़ूठ बोलणै वाल़ौ किणै तरिकै कौरी नाईं डेई बौल़दौ, पर सिरफ सै लोग ज़ासरै नाऊं गाबड़ु रै जीवना री किताबी दी ई लिखै औन्दै।