Read Pahari, Mahasu प्रकाशित 22 Bible Online

प्रकाशित 22 - Pahari, Mahasu bible

प्रकाशित 22

¹तैबै तिणीऐ मुलै बिल्लौरा री ज़िणी च़ौमुक्दी, सौदा री ज़िन्दगी रै पाणी री नौं देखाल़ी, ज़ो परमेश्‍वर और गाबड़ु री राज़गाद्दी कु निकल़ियौ

²तेस इलाकै री सौड़की रै बिच़ा दी बौआ थी। तिऐं नौईं वार-पारभिलै ज़िन्दगी रै पेड़ थै। तिऊं पेड़ा दी बाराह रौंगा रै फल़ लागा थै, और सै हर मिहनै फौल़ा थै। और तिऊं पेड़ा रै पाचा कौरी धौतरी रै लोग ठीक हुआ थै।

³तेस शैहरा दी रौइणै वाल़ै लोगु माथै परमेश्‍वरा रौ श्राप ना हुआ लौ, और परमेश्‍वरा री राज़गाद्दी और गाबड़ु आपु तेस इलाकै दी हुआई और परमेश्‍वरा रै सेवक तेसरी भौक्ती कौरा ई।

⁴सै तेस आमनै-सामनै देखा ई, और तेसरौ नाऊं तिंउरै हाथाई हुआ लिखौ औन्दौ।

⁵तैबै राच नाईं औन्दी, और तिउंलै दिवै और सुरजा रै प्याशै री ज़ुरत नाईं औन्दी, कैलैकि प्रभु परमेश्‍वर तिउंलै प्याशौ दिआ, और सै सौदा राज़ कौरा ई।

⁶तैबै तिणीऐ मुलै बोलौ, “इऐ बुशै विश्वासा रै लायक और सौच़्च़ी ई। प्रभुऐ, ज़ो भविष्यवक्तु री आत्मा रौ परमेश्‍वर आ, आपणै सौरगदूत एथीलै भेज़ै कि सै बुशै, ज़ासरौ हुणौ शिगरी आ, देखाल़ा।”

⁷“देख, हाऊं शिगरी आशणै वाल़ौ ऊ! आशीष वाल़ै ई सै लोग ज़ुण इऊं किताबीऊ री भविष्यवाणी माना ई।”

⁸हाऊं सेऊ यहुन्ना ऊ, ज़ो इऊं बुशै शुणा और देखा थौ। ज़ेबी मुंइऐ शुणौ और देखौ ता ज़ो सौरगदूत मुकै इऊं बुशै देखाल़ा थौ, हाऊं तिंउरै बांगणै माथै ढाल कौरना लै धौनी पौड़ौ।

⁹पर तिणीऐ मुलै बोलौ, “देख, इणौ नाईं कर। कैलैकि हाऊं तैरौ, और तैरै भाई भविष्यवक्तु, और इऐं किताबी री बुशै मानणै वाल़ेऊ रौ साथी सेवक ऊ। परमेश्‍वरा लै ढाल कर।”

¹⁰तैबै तिणीऐ मुलै बोलौ, “इऐं किताबी री भविष्यवाणी री बुशै लोगु कु नाईं च़ोर। कैलैकि इऊं बुशु रौ पुरै हुणै रौ बौगत आशी गौ आ।

¹¹ज़ो अन्याय कौरा आ, सेऊ अन्याय ई कौरदै रौआ। और ज़ो दुष्ट आ, सेऊ दुष्ट बौणी रौआ। और ज़ो धौर्मी आ, सेऊ धौर्मी बौणी रौआ। और ज़ो पवित्र आ। सेऊ पवित्र बौणी रौआ।”

¹²तैबै प्रभु यीशुऐ बोलौ “शुण, हाऊं शिगरी आशणै वाल़ौ ऊ। और हर एकी रै कामा रै मुताबिक बौदल़ौ देणा लै फल़ मुकै आ।

¹³हाऊं अलफा और ओमेगा, शुरुवात और आखरी, सौभी कु पैहलै और अन्त ऊ।

¹⁴आशीष वाल़ै ई सै, ज़ो आपणै जुड़कै धोआई, कैलैकि तिउंलै शैहरा रै दारा बाटीऐ भितरै आशणै रौ हक्क आ दैऔ औन्दौ, और तिउंकै तेस पेड़ा रै फल़ खाणै रौ हक्क आ दैऔ औन्दौ ज़ेथ खाइयौ सौदा री ज़िन्दगी मिला आ।”

¹⁵पर कुकुर, और ज़ादु-टोन्है, और गान्दै काम कौरणै वाल़ै, और खून कौरणै वाल़ै और मूर्ती पुज़णै वाल़ै, और हर एक झ़ूठ बोलणै वाल़ै और गढ़णैवाल़ै बाइरै रौआ।

¹⁶“हाऊं यीशु ऊ! और मुंइऐ आपणौ सौरगदूत एथीलै भेज़ौ कि तुमारै औगांऊ कलिसिया रै बारै दी इऊं बुशु री गवाही दिया। हाऊं दाऊदा रौ मूल और वंश, और दोतकौ च़ौमुकणै वाल़ौ तारौ ऊ।”

¹⁷परमेश्‍वरा री आत्मा और गाबड़ु री लाड़ी दुइआ मसीह लै बोलाई, “आश!” और शुणनै वाल़ै भी बोलाई, “आश!” ज़ुण चिशौ आ सेऊ आशा, और ज़ुण भी च़ाहा लौ सेऊ ज़िन्दगी रौ पाणी सेंत मेंत नियां।

¹⁸हाऊं यहुन्ना हर एकी लै, ज़ो इऐं किताबी री भविष्यवाणी शुणा आ, गवाही दियाऊ, अगर कुण आदमी इऊं बुशु दी कुछ़ बड़ावा ता परमेश्‍वर तिऊं बुराई, ज़ो इऐं किताबी दी आ लिखी ऐन्दी, तेस माथै बड़ावा आ।

¹⁹अगर कुण इऐं भविष्यवाणी री किताबी कु कुछ़ गाड़ा लौ, ता परमेश्‍वर तेस ज़िन्दगी रै पेड़ा और पवित्र इलाकै मांझ़िआ कु, ज़ेथरै बारै दी इऐं किताबी दी आ लिखौ औन्दौ, तेसरौ भाग पोरु गाड़ा।

²⁰ज़ो इऊं बुशु री गवाही दिआ आ सेऊ इणौ बोला आ, “ओ, हाऊं शिगरी आशणै वाल़ौ ऊ।” आमीन। ओ प्रभु यीशु आश!

²¹प्रभु यीशु री बौड़ी दया परमेश्‍वरा रै लोगु आइलै रौआ। आमीन