Read Pahari, Mahasu प्रकाशित 3 Bible Online

प्रकाशित 3 - Pahari, Mahasu bible

प्रकाशित 3

¹तिणीऐ मुलै इणौ भी बोलौ कि, “सरदीस शैहरा री कलिसिया रै दूता लै इणी खौबर लिख, कि ज़ासकै परमेश्‍वरा री सात आत्मा और सात तारै ई, सेऊ इणौ बोला आ, कि हाऊं तैरै काम ज़ाणाऊ, कि ताउंलै ज़िउंदौ ता बोलाई, पर आसा तू मौरौ औन्दौ।”

²“उज़ीई रौऔ, तिऊं च़िज़ेऊ लै ज़ो बाकी रौई गोई ई, और ज़ो मिटणै वाल़ी थी, तिऊं पाक्की कौरौ। कैलैकि मुंइऐ तुमै केज़ै कामा लै आपणै परमेश्‍वरा रै नज़दीक नाईं पाऐ।

³ता याद कर, कि तांइऐ किणी रीती कौरी शिक्षा पाई थी और शुणी थी, और तेसदी बौणी रौऊ, और मन बौदुल़: और अगर तू उज़ीई नाईं रौआ लौ। ता हाऊं च़ोरा ज़िणौ आशाऊ और तू केबी भी ना ज़ाणी सौका लौ, कि हाऊं केज़ै बौगतै ताऊं कई आशाऊ।

⁴पर हां, सरदीसा दी तैरै कुछ़ इणै लोग ई, ज़ुणिऐ आपणै-आपणै जुड़कै गांदै नाईं किऐ सै शैतै जुड़कै भिड़ीयौ मुं आइलै घुमाई कैलैकि सै इणै लायक आ।

⁵ज़ुण ज़िता लौ, तेसकै इणी ई शेतै जुड़कै भिड़ाइणै ई, और हाऊं तेसरौ नाऊं ज़िन्दगी री किताबी कु केज़ी भी रीती कौरी नाईं काटू लौ, पर तेसरौ नाऊं आपणै बाब और तेसरै सौरगदूतु काऐ मानु लौ।

⁶अगर सौमझ़णै च़ाहा ई ता ध्यान देइयौ सुंच़ेऊ कि आत्मा कलिसिया लै का बोला सा।”

⁷तिणीऐ मुलै इणौ भी बोलौ कि, “फिलदिलफिया शैहरा री कलिसिया रै दूता लै इणी खौबर लिख कि, हाऊं ऊ ज़ुण पवित्र और सौच़्च़ौ ऊ, और ज़ुण दाऊदा ज़िणौ हक्क छ़ाड़ाऊ, ज़ासरौ खोलौ औन्दौ कोई बन्द नाईं कौरी बौल़दौ और बन्द कियौ औन्दौ कोई नाईं खोली बौल़दौ, सेऊ इणौ बोला आ, कि

⁸हाऊं तैरै काम ज़ाणाऊ, देख मुंइऐ ताऊं कालै एक दार उगाड़ी आ छ़ाड़ौ औन्दौ, ज़ास कोई बन्द नाईं कौरी बौल़दौ कि तेरी शक्ति थोड़ीई आ, और ताइंऐ मैरौ वचना रौ पालन कियौ आ और मैरै नावां लै नाईं मुकरौ।

⁹देख, हाऊं शैताना रै तिऊं खुंबल़ी वाल़ेऊ तैरै वशा दी कौराऊ ज़ो यहुदी ई बौणै औन्दै, पर आसतै नाईं, और झ़ूठ बोलाई-देख हाऊं इणौ कौराऊ, कि सै ताऊं काऐ आशीयौ तैरै बांगणै माथै पौड़ीयौ ताउंकै ढाल कौरा ई, और इणौ ज़ाणाई, कि मुंइऐ ताऊं कु प्यार छ़ाड़ौ आ,

¹⁰ताइंऐ मैरै सौबरा रै वचन पाकड़ी छ़ाड़ै ई, एथीलै हाऊं भी ताऊं मुसीबता रै बौगतै बौच़ाई छ़ाड़ाऊ, ज़ो धौतरी माथै रौइणै वाल़ेऊ परखणा लै धौतरी दी आशणै वाल़ौ आ।

¹¹हाऊं शिगरी ई आशणै वाल़ौ ऊ। ज़ो कुछ़ ताऊं कै आ, तेस पाकड़ी छ़ाड़ै, ताकी कोई तैरौ ताज़ ना छ़ुड़ावा।

¹²ज़ुण ज़िता लौ, तेस हाऊं आपणै परमेश्‍वरा रै घौरा दी एक खाम्बौ चाणाऊ। और सेऊ केबी भी बाइरै नाईं निकल़ा लौ। और हाऊं आपणै परमेश्‍वरा रौ नाऊं, और आपणै परमेश्‍वरा रौ इलाकौ, मतलब नौऐं यरुशलेमा रौ नाऊं, ज़ो मैरै परमेश्‍वरा काऐ कु सौरगा कु आशणै वाल़ौ आ और आपणै नौंवौ नाऊं तेस माथै लिखाऊ।

¹³अगर सौमझ़णै च़ाहा ई ता ध्यान देइयौ सुंच़ेऊ कि आत्मा कलिसिया लै का बोला आ।”

¹⁴तिणीऐ मुलै इणौ भी बोलौ कि, “लौदीकिया शैहरा री कलिसिया रै दूता लै इणी खौबर लिख कि, ज़ो आमीन, और विश्वासा रै लायक, और सौच़्च़ौ गवाह सा, और परमेश्‍वरा री धौतरी रौ मूल़ कारण आ, सेऊ इणौ बोला आ

¹⁵कि हाऊं तैरै काम ज़ाणाऊ कि तू ना ता शेल़ौ, और ना ता तातौ, भौलौ हुआ थौ कि तू शेल़ौ या तातौ हुआ थौ।”

¹⁶एथीलै कि तू गुनगुनौ ई, और ना शेल़ौ ना तातौ हाऊं ताऊं आपणै मुआं कु फिराउणै वाल़ौ ऊ।

¹⁷तू ज़ो बोलाई, कि हाऊं अमीर ऊ, और अमीर हुई ऐरौ ऊ, और मुलै केज़ी भी च़िज़ा री कामी नाईं, पर इणौ नाईं ज़ाणदौ, कि तू अभागौ और बेकार, कंगाल, शेड़ौ, और नांगौ ई।

¹⁸एथीलै हाऊं ताउंलै सलाह दिआऊ कि आगी दी तौपाऔ औन्दौ सुनौ मुकु मोल निऊं, कि तू अमीर हुआ लौ। और शेतै जुड़कै निऊं कि तिऊं भिड़ीयौ तू बेइज़्ज़त ता नाईं हुआ लौ। और आपणी आखी दी लाइणा लै सुरमौ निऊं, कि तू देखदै लागा।

¹⁹हाऊं ज़ास-ज़ासकु प्यार छ़ाड़ाऊ, तिऊं सौभी लै औकल और ताड़ना दिआऊ, एथीलै जोशिलै हुऔ, और मन बौदल़ौ।

²⁰देख, हाऊं दारा काऐ खौड़ौ हुइयौ खटखटावा ऊ। अगर कुण मेरी बाच़ शुणियौ दार खोलालौ, ता हाऊं तेस काऐ भितै आशीयौ तेस आइलै रोटी खाआ ऊ, और सेऊ मुं आइलै रोटी खाआ।

²¹ज़ुण ज़िता लौ, हाऊं तेस आपु आइलै आपणै राज़गादी माथै बोशाल़ा ऊ, ज़िणौ हाऊं भी ज़ीतीयौ आपणै बाबा आइलै तेसरी राज़गादी माथै बोशी गौ ऊ।

²²अगर सौमझ़णै च़ाहा ई ता ध्यान देइयौ सुंच़ेऊ कि आत्मा कलिसिया लै का बोला आ।