Read Pahari, Mahasu प्रकाशित 9 Bible Online

प्रकाशित 9 - Pahari, Mahasu bible

प्रकाशित 9

¹ज़ैबै पांज़वै सौरगदूतै कौरनाल़ फुकरी ता मुंइऐ सौरगा कु धौतरी माथै एक तारौ लोटदै देखौ, और तेसकै अधोलोका री ताल़टी देई आ।

²तिणीऐ पौइताल़ खोलौ, और अधोलोका कु बौड़ै कुण्डा रै ज़िणौ धुंऔ उठौ, और कुण्डा रै धुंऐ कौरी सुरजा रौ प्याशौ और सौरग नाईं थौ दिशदै लागै औन्दौ।

³तेस धुंऐ मांझ़िऐ कु धौतरी माथै भौरी का किड़ै-किमलै टिड्डी निकल़ी, और तिउंकै सेई शक्ति देई ज़ो धौतरी रै बिच़्छ़ु दी औआ।

⁴तिउंलै बोलौ कि ना धौतरी रै घास, ना कासी हरियाली, ना ता कासी पेड़ा रौ नुकसान कौरेऊ, सिरफ तिऊं लोगु रौ, ज़ासरै कौपाल़ा दी परमेश्‍वरा री मुहर नाईं आ।

⁵तिउंकै लोगु झ़ांगणा लै ता नाईं पर पांज़ मिहनै झ़ांऊ दु:ख दैणै रौ हक्क दैऔ आ: और तिउंरी बौथा इणी थी ज़िणी बिच़्छ़ु रै काटणै कु लोगु कै हुआ आ।

⁶सेज़ै बौगता दी लोग मौरणै रै तरिकै लोड़ाई पर सै नाईं मौरदै। और मौरणै री इच़्छ़ा कौरा ई, पर मौत तिऊंकु पोरु भागा ली।

⁷सै टिड्डी इणै थै ज़िणै लौड़ाई लै त्यार कियै औन्दै घौड़ै औआ ई, और तिंउरै मुंडा माथै सुनै रै ज़िणै ताज़ थै। और तिंउरै मूंह लोगु ज़िणै थै।

⁸तिंउरै बाल़ छ़ेउड़ीऊ रै बाल़ा ज़िणै और दांद बरागा रै दांदा ज़िणै थै।

⁹तिंउऐ लोहै रै जुड़कै थै भिड़ै औन्दै: और तिंउरै पाखेऊ री बाच़ इणी थी ज़िणी रथ और भौरी घोड़ेऊ री लौड़ाई दी दौड़दी बारै औआ सा।

¹⁰तिउंरी पूंछ़ बिच़्छ़ु ज़िणी थी, और तिऊंदी ज़ैहर थौ, और तिउंकै पांज़ मिहनै झ़ांऊ लोगु लै दु:ख दैणै री ज़ो शक्ति थी मिली ऐन्दी, सै तिंउरै पूंछ़ा दी थी।

¹¹अधोलोका रौ दूत तिऊं माथै राज़ौ थौ। तेसरौ नाऊं इब्रानी बोली दी अबद्दोन, और युनानी बोली दी अपुल्लयोन आ।

¹²पैहलै मुसीबत टौल़ी एरी, शुणौ, आबै एथ बासिऐ दुई मुसीबत औज़ौ आशणै वाल़ी ई।

¹³ज़ैबै छ़ौउवै सौरगदूतै कौरनाल़ फुकरी ता सुनै री बेदी ज़ो परमेश्‍वरा रै सामनै आ तिंयारै च़ारिया कुणै रै शिंगा मांझ़िया कु मुंइऐ इणी बाच़ शुणी,

¹⁴ज़िणौ कोई छ़ौउवै सौरगदूता लै, ज़ासकै कौरनाल़ थी, बोलदै थौ लागौ औन्दौ, “तिऊं च़ार दूता लै ज़ो बौड़ी नौंई फुराता काऐ बानै औन्दै ई, तिऊं पोरु खोल।”

¹⁵सै च़ार दूत खोली गौऐ ज़ो तेबी, और सेज़ै दिनै, और मिहनै, और बौरशा लै लोगु री एक तिहाई हिस्सै रै पोरु झ़ांगणा लै तैयार थै किऐ औन्दै।

¹⁶तिंउरै फौज़ा रै सवारीऊ री गिनती एक बिऐ करोड़ थी। मुंइऐ तिउंरी गिनती शुणी।

¹⁷और मुकै एज़ै दर्शणा दी घोड़ै और तिंउरै इणी सवारी दिशी ज़ासरै जुड़कै आग ई, और लाल रौंगा री गहरी आग, और गन्धका ज़िणी थी, और तिऊं घोड़ै रै मूंड़ बरागा ज़िणै थै। और तिंउरै मुंहा कु आग, धुंऔ और गान्दी बास निकल़ा थी।

¹⁸इऊं चिनी ई माहामारीऊ मतलब आग, धुंऔ और गान्दी बासा कौरी, ज़ो तिंउरै मुंहा कु निकल़ा थी धौतरी माथा रै एक तिहाई हिस्सै रै लोग पोरु झ़ांगै।

¹⁹कैलैकि तिऊं घोड़ेऊ री शक्ति तिंउरै मुंहा और तिउंरी पूंछ़ा दी थी। एथीलै कि तिउंरी पूंछ़ सापा ज़िणी थी, और तिऊं पूंछ़ा रै मूंड भी थै और इऊं कौरी सै टुका थै।

²⁰बाकी आदमीउऐ ज़ो तिऊं माहामारीऊ कौरी नाईं मौरै थै, आपणै हाथा रै कामा कु मन नाईं बौदल़ा, कि बुरी आत्मा री, सुनै और च़ांदी और पितल़ और ढोल़ और काठा री मुर्तिऊ री पुज़ा नाईं कौरौ, ज़ो ना देखदै, ना शुणदै, ना हाण्डी बौल़दै,

²¹और ज़ो लोऊ, और ज़ादु-टोणो, और बुरै काम, और च़ोरी तिंउऐ कौरी थी, तिऊंकु ज़िऊ नाईं बौदल़ौ।