Read Paikoka Marcos 5 Bible Online

Marcos 5 - Paikoka bible

Marcos 5

¹Jaira je tëꞌhuina ti̱ꞌareña, Gadara quëꞌrona.

²Yohuëpi Jesús ja̱ꞌa tu̱maquëna, ju̱ꞌisicohuaꞌire ta̱ hue̱ꞌñapi teꞌi ë̱më huati quëꞌipi sa̱ñope daquëña.

³Huati quëꞌi cato, ju̱ꞌicohuaꞌire ta̱ hue̱ꞌñare paꞌiquë paquëña, quë̱na meapi hue̱ñuꞌu cajëtaꞌa hue̱ñe peoquëpi.

⁴Jë̱ña nëcañoa co̱ni jaiye hue̱toje̱ i̱pi naë tëte je̱aëña. I̱ jerepa tutu neñe peouña.

⁵Ñami, muꞌse ju̱ꞌisicohuaꞌire ta̱ hue̱ꞌñare ai cu̱tihuëre paꞌi cuiquë quë̱na pë̱api coꞌye huai yoꞌoquë paquëña.

⁶Soꞌopi Jesure ñani huëꞌhuëni Jesús nëca macana ti̱ꞌani Jesús mëꞌëpi jerepa tutu paquë cani doꞌre jaꞌruña.

⁷Doꞌre jaꞌruna Jesupi caëña, huatire: “Iye ë̱mëre etajë̱ꞌë.” Caquëna, ai tutu caquë se̱quëña: “Jesús, Diusu ti ëjaërepa mamaquë ai yoꞌoyete yëꞌëre i̱simaꞌë paꞌijë̱ꞌë.”

⁹Se̱ina, Jesupi ja̱ëte caëña: “¿I̱que mami aꞌni?” Caquëna, sehuouña: “Yëꞌë mami cato jai pa̱i aꞌë.”

¹⁰Cani Jesure ai se̱quëña: “Iye huatiohuaꞌire yequë hue̱ꞌñana jëjo saomaꞌë, i̱ñore paꞌija̱jë.”

¹¹Caquëna, jaꞌyere jai se̱se dohuë cu̱ti perepëre a̱ijë paꞌijëna,

¹²Huatiohuaꞌipi asani se̱teña: “Se̱se quëꞌrona jëjo saojë̱ꞌë. Yëquëre ja̱ohuaꞌina cacañuꞌu.”

¹³Careña, deꞌoji saijë̱ꞌë caëna, etani sani se̱sena cacareña. Cacarena, siꞌa dos mil se̱se huëꞌhuëjë jai huaꞌque të̱ꞌtëpapi to̱mejë jairana dutu ju̱teña.

¹⁴Ju̱tena, se̱sere ñacaicohuaꞌipi ñani huëꞌhuëni pa̱i daripëna siꞌaye quëareña, i̱ti yoꞌoseꞌe. Quëarena, pa̱ipi asani dateña.

¹⁵Jesús paꞌi hue̱ꞌñana ti̱ꞌani ñajëna, huati quëꞌi paꞌisiquëpi ca̱ña su̱ñasiquëpi deꞌo cocare caquë ñuquëña. Ñuꞌina, i̱te ñani siꞌaohuaꞌi caꞌrareña.

¹⁶Caꞌrajëna, se̱se ñacaicohuaꞌipi Jesús yoꞌoseꞌere quëareña, huati quëꞌire yoꞌoseꞌe cuiꞌne se̱sere yoꞌoseꞌe co̱ni.

¹⁷Ja̱je quëajëna, asani Jesure saijë̱ꞌë, i̱ño paꞌimaꞌë cajë, se̱ huëoreña.

¹⁸Carena, Jesupi yohuëna aya mëni sai huëoquëna, huati quëꞌi paꞌisiquëpi ai se̱quëña, Jesure mëꞌë ja̱ꞌre co̱ni sani pasiꞌi caquë.

¹⁹Caquëna, Jesupi pa̱ni sehuouña: “Mëꞌë huëꞌena saijë̱ꞌë. Sani mëꞌë cajeohuaꞌire quëajë̱ꞌë, mëꞌë ëjaëpi oi ñani necaiseꞌere.”

²⁰Caëna, saquëña. Sani siꞌa jë̱ña daripë̱a quëa huëouña. I̱re Jesús necaiseꞌere quëaquëna, asani ai deꞌoye yoꞌoseꞌe paꞌiji, careña. Ju̱ꞌicopi Jairo Mamaco Jesús Ca̱ꞌcore Patoye

²¹Jesupi yohuëja̱ꞌa cuiꞌnaëpi yequë te̱ꞌtena je̱ꞌesi maca jai pa̱i tsiꞌsi dateña. Ja̱je yoꞌojëna, jaira të̱ꞌtëpare paꞌina.

²²Ja̱ maca pa̱i tsiꞌsi hue̱ꞌña cua̱ñequëpi Jesús paꞌi hue̱ꞌñana Jairo hueꞌequëpi i̱te ñani doꞌre jaꞌruni,

²³caëña: “Yëꞌë mamacopi ju̱ni huesëco. Sani mëꞌë jë̱tëpi pato coꞌyacaijë̱ꞌë.”

²⁴Se̱ina, Jesupi i̱ ja̱ꞌre co̱ni saquëña. Saina, jai pa̱i cuiꞌne sateña. Ja̱je paꞌijë i̱te quiꞌi huesoreña.

²⁵Ja̱je jai pa̱i paꞌi hue̱ꞌñare teꞌo nomio doce o̱metëca ju̱ꞌico pacoña. Siꞌanë tsie cajequëna, ai yoꞌoco pacoña.

²⁶I̱ote siꞌa jujucohuaꞌi yoꞌo jujajëna, ai yoꞌoco paꞌico pacoña. Siꞌaye i̱o paye juju doꞌina sa̱i saosico pacoña. Siꞌaye ja̱ co̱ñe pa̱ëña, i̱ote. Coa ai jerepa ai yoꞌoco pacoña, coꞌyaye peoyerepa.

²⁷Ja̱je paꞌiopi Jesús cayere cajëna, asani dani jeteyoꞌjeja̱ꞌa i̱ juꞌi ca̱na patoña.

²⁸Coa i̱ juꞌi ca̱na patoni coꞌyasico paꞌija̱ꞌcoaꞌë, caco.

²⁹Pato macarepa tsie cajeye je̱ouña. Ja̱ maca asaoña, tsoe i̱o ca̱pë coꞌyasico paꞌiye.

³⁰Ja̱je yoꞌosi maca Jesupi asaëña, i̱ tutupi ju̱ꞌicore jujuseꞌe. Ja̱je paꞌina, coꞌye po̱nëni pa̱ire ñani caëña: “¿Nepi yëꞌë juꞌi ca̱na patoreꞌni?”

³¹Caquëna, i̱ yeꞌyacohuaꞌipi careña: “Tsoe mëꞌëpi pa̱i quiꞌiyerepa paꞌiye ñaquëtaꞌa, ¿nepi patoreꞌni se̱quëꞌni?”

³²Ja̱je catoje̱ Jesús cato siꞌa hue̱ꞌña po̱nëquë ñaëña, nepi patoreꞌni caquë.

³³Ñaquëna, ti coꞌyasicopi asani caꞌraco tsasico dani i̱ nëca hue̱ꞌñana ta̱ni i̱o yoꞌoseꞌe nuñerepa quëaoña.

³⁴Quëacona, Jesús ja̱ore caëña: “Huau maca yëꞌëre cuasaseꞌepi ne coꞌyahuë. Se̱ñaco saijë̱ꞌë. Iye ju̱ꞌiñe ti ne coꞌyahuë, mëꞌëre.”

³⁵Ja̱ caquëna, yecohuaꞌipi dateña, pa̱i tsiꞌsi huëꞌe cua̱ñequë huëꞌepi. Dani Jairore careña: “Mëꞌë mamaco tsoe ju̱ꞌisico pacoꞌë. Yeꞌyaquëre jerepa jo̱sa camaꞌë paꞌijë̱ꞌë.”

³⁶Caquëna, Jesupi asasiquëtaꞌa asa maꞌñeje paꞌipi tsiꞌsi huëꞌe cua̱ñequëre caëña: “Caꞌramaꞌpë paꞌijë̱ꞌë. Maijaꞌquëpi necaiquë api cuasajë̱ꞌë.”

³⁷Jesupi saina, Pedro co̱ni Jacobo co̱ni cuiꞌne Jacobo yoꞌjei Juan co̱ni sateña. Yecohuaꞌi co̱ni saiye ë̱seiña.

³⁸Tsiꞌsi huëꞌe cua̱ñequë huëꞌena ti̱ꞌani ai yoꞌoye ñaëña, pa̱ipi ai cuijë oijëna.

³⁹Ja̱je oijëna, huëꞌe cacani ja̱ohuaꞌire caëña: “¿Me neni mësaru ai yoꞌojë cajë cuiꞌne ai oiyeꞌni? I̱ mamaco ju̱ꞌimaꞌo pacoꞌë. Coa ca̱ico.”

⁴⁰Caquëna, ja̱ohuaꞌipi i̱re soreña. Sojëna, Jesús siꞌaohuaꞌire hueꞌsena eto saouña. Coa pëca jaꞌquëpi cuiꞌne pëca jaꞌcopi co̱ni ju̱ꞌisico paꞌi hue̱ꞌñana cacareña.

⁴¹Cacani ju̱ꞌisico jë̱tëna tse̱ani i̱ote caëña: “Talita cumi.” Mai coca cato “tsihuaꞌo huëijë̱ꞌë” caye aꞌë.

⁴²Ja̱je ca macarepa doce o̱metëca pacopi tsihuaꞌo huëni cucoña. Ja̱je cuꞌiona, ñani deꞌoquëre papi yoꞌoji cuasareña.

⁴³Ja̱je jujusiquëtaꞌa ai ë̱seiña, yecohuaꞌire quëaye pa̱jëꞌë caquë. Tsihuaꞌore sani a̱ore a̱ojëꞌë, caëña.