Read Paikoka Lucas 13 Bible Online

Lucas 13 - Paikoka bible

Lucas 13

¹Ja̱re ja̱ muꞌseña Pilatopi Galilea acohuaꞌire huani je̱ani, cuiꞌne i̱ohuaꞌi ëojë se̱ñuꞌu cajë huaisicohuaꞌi tsiena pa̱i tsiepi co̱ꞌmeni yoꞌoseꞌere, yecohuaꞌipi quëahuë, Jesure.

²Quëajëna, capi: “¿Mësarupi cuasani huani je̱osicohuaꞌipi Galilea pa̱ire se̱ña maca coꞌacohuaꞌi paëꞌë, cuasaye?

³Pa̱ni. Ja̱je paꞌina, cayë, mësaru. Ja̱ꞌrë yoꞌoyere je̱oni po̱nëmaꞌcohuaꞌi pani siꞌa pa̱i mësaruje̱ ja̱je yoꞌo cua̱ñojaꞌcohuaꞌi aꞌë.

⁴Mësarupi cuasani Jerusalén paꞌicohuaꞌire se̱ña maca coꞌacohuaꞌini, diez y ocho pa̱ire Siloé tupëpi quë̱o hue̱aꞌcoꞌë, cuasaye.

⁵Pa̱ni. Nuñerepa cayë. Ja̱je paꞌina, mësarupi huajëye paꞌiye po̱nëmaꞌcohuaꞌi pani ja̱re cuiꞌne yoꞌo cua̱ñojaꞌcohuaꞌi aꞌë.” Higuera Ñë Ayere Quëaye

⁶Ja̱ maca Jesús pa̱i yoꞌoyeje̱ paꞌye neni quëaquë capi: “I̱ yejana ta̱si ñë paquëpi quë̱imaꞌo paco caquë sani ñaquëna, quë̱imaꞌco pajiꞌi.

⁷Paꞌina, ñani ja̱ maca yeja ñaquëre capi: ‘i̱na, toaso̱ o̱metëca daiyë, i̱ti ca̱ quë̱iseꞌe ñasiꞌi caquë. Daiquëtaꞌa ti̱ꞌamaꞌë paꞌiyë, quë̱isico paꞌiona. Ja̱je paꞌito cue̱ni je̱ojëꞌë. Me nesiꞌco coa yejare que̱ꞌeñe nëcacoꞌni.’

⁸Caquëna, i̱ti yeja ñacaiquëpi sehuopi: ‘Ëjaë iye o̱metëcahuëseꞌe paꞌija̱ꞌco, a̱ꞌji yeja neni yequë coꞌamañapi o̱a ñasiꞌi, quë̱ijaꞌcore.

⁹Ja̱je nerutaꞌa quë̱ti̱ꞌñe paꞌio i̱ti ca̱. Ja̱je neruje̱ quë̱imaꞌona, ña jujani ja̱ macataꞌa cue̱ni je̱ojëꞌë,’ capi.” Jesupi Nomiore Jujupi, Huajë Muꞌse Paꞌina

¹⁰Huajë muꞌse pa̱i tsiꞌsi hue̱ꞌñana yeꞌyaquëna,

¹¹ja̱rote pacoꞌë, teꞌo nomio diez y ocho o̱metëca ju̱ꞌico, huatipi ne quëꞌca̱sicopi ti nuiñe nëcaye peocopi.

¹²Paꞌiona, ñani Jesupi soini capi: “Nomio mëꞌë ju̱ꞌi dahuë tsoe je̱opi. Deꞌoye paꞌijë̱ꞌë.”

¹³Caquë ja̱ maca i̱ jëñapi i̱ona pato maca ja̱re i̱ti macapi nuñerepa nëcaco po̱nëni, Maijaꞌquë deꞌoquë api, sihuaco ca huëo.

¹⁴Ja̱je Jesús huajë muꞌse jujuna, ñani pa̱i tsiꞌsi huëꞌe ñacaiquë ëjaëpi iyere ñani pë̱i, pa̱ire capi: “Seis muꞌseña paꞌiji, coꞌamaña ne muꞌseña. Ja̱ muꞌseña ja̱je paꞌito dani juju cua̱ñojëꞌë, pa̱ni huajë muꞌse juju cua̱ñoñe.”

¹⁵Caquëna, ja̱ maca Ëjaëpi sehuopi: “¡Coa cacohuaꞌi pa̱i! ¿Joyemaꞌcohuaꞌini mësaru acohuaꞌi je̱ꞌquë, huajë muꞌse paꞌina, mësaru duruhue̱quëpi pa̱nitaꞌa burropi oco u̱cuja̱ꞌquëre?

¹⁶¿Ico nomio cato Abraham tsëcapë aconi Satanáspi diez y ocho o̱metëca hue̱seꞌeje̱ paꞌioni, joyeye coꞌaquë huajë muꞌse paꞌi doꞌire?”

¹⁷Ja̱je Jesús caëna, i̱te sa̱ñope cacohuaꞌipi huajëyaꞌyerepa maire caëꞌni cuasahuë. Ja̱je cuasajëtaꞌare siꞌa pa̱i sihuahuë, Jesús pa̱i yoꞌo ti̱ꞌa maꞌñere deꞌoye yoꞌoquëna, ñani. Mostaza Ca̱ Ayere Yeꞌyaye

¹⁸Ja̱ maca capi: “¿I̱queje̱ paꞌye aꞌni, Maijaꞌquë te̱ꞌte aye? ¿I̱quena cuiꞌne paꞌye neni i̱ñoraꞌye?

¹⁹Ja̱je cani capi, aꞌri mostaza ca̱re ta̱quëpi yejana ta̱ëna, ai deꞌoni jai so̱quë yë deꞌona pi̱ꞌapi i̱ti ñë capë̱ana tsianoa nejë payeje̱ paꞌye aꞌë.” Pan Ne Pore Ayere Yeꞌyaseꞌe

²⁰Ja̱je cani yequeje̱ capi, Jesús: “¿I̱quepi co̱ni cuiꞌne paꞌyeje̱ ne i̱ñoraꞌye, Maijaꞌquë te̱ꞌte aye yoꞌoye?

²¹Cani capi: Pan necopi harinare toaso̱ jai ji̱ꞌso neni cuiꞌne oꞌsa mëiñere aꞌri maña i̱ona co̱ꞌmeni i̱ona siꞌa së̱pë juju mëicoa. Ja̱ juju mëiñeje paꞌye yoꞌoye aꞌë, Maijaꞌquë te̱ꞌte ayeje̱.” Aꞌri Ja̱to Saꞌro

²²Jerusalénna sai, pa̱i daripë̱a cuiꞌne aꞌri daripë paꞌicohuaꞌire yeꞌyaquë sa tëto sajiꞌi.

²³Ja̱ro paꞌiquëpi se̱jiꞌi, i̱te: “Ëjaë, ¿aꞌri pa̱i maña paꞌiyë, huaso cua̱ñocohuaꞌi?” Caquëna, i̱pi sehuopi:

²⁴“Aꞌri ja̱to saꞌroja̱ꞌa cacasiꞌi cani siꞌa më cuasayepi yoꞌojë̱ꞌë. Ja̱je paꞌina, cayë mësarute pa̱i cacayere yëja̱ꞌcohuaꞌi aꞌë. Ja̱je yëjëtaꞌa caca ti̱ꞌamaꞌpë paꞌija̱ꞌcohuaꞌi aꞌë.

²⁵Ja̱ maca i̱ti huëꞌe aquëpi huëni ja̱to saꞌro si̱osi maca, mësaru hueꞌse paꞌisicohuaꞌipi caja̱ꞌcohuaꞌi aꞌë ja̱to saꞌrona tëꞌcajë ‘Ëjaë, huiꞌyojë̱ꞌë’. Ja̱je cajëna, i̱pi casipi ‘ñamaꞌquë aꞌë, mësarute. Jero acohuaꞌi aꞌni.’

²⁶Caquëna, mësarupi ca huëoja̱ꞌcohuaꞌi aꞌë: ‘Mëꞌë ja̱ꞌre co̱ni a̱ijë cuiꞌne u̱cujë yoꞌosicohuaꞌi aꞌë cuiꞌne ja̱re mëꞌëpi paꞌi hue̱ꞌñana dani yeꞌyasiquë aꞌë.’

²⁷Cajëna, sehuoja̱ꞌquë api: ‘Tsoe cahuë ñamaꞌquë aꞌë, mësarute. Jero acohuaꞌi aꞌni. Saijë̱ꞌë, coꞌayeseꞌe yoꞌocohuaꞌi.’

²⁸Ja̱je casi maca Maijaꞌquë te̱ꞌtere Abraham, Isaac, Jacobo, cuiꞌne Maijaꞌquë yoꞌo ja̱ꞌñere quëajë paꞌisicohuaꞌi paꞌijëna, ñani mësarupi hueꞌsena je̱ocosicohuaꞌi paꞌijë cu̱ji qui̱ꞌcojë oija̱ꞌcohuaꞌi aꞌë.

²⁹Ja̱ maca daija̱ꞌcohuaꞌi aꞌë ë̱mëjeꞌe te̱ꞌte cuiꞌne huëꞌehuë te̱ꞌte, ë̱së mëi hue̱ꞌña cuiꞌne sa̱ꞌnihuë pa̱ipi Maijaꞌquë quëꞌrona tsiꞌsini a̱o a̱ijaꞌcohuaꞌipi.

³⁰Ja̱ maca yure teaye paꞌiohuaꞌi paꞌisicohuaꞌi jerepa paꞌiohuaꞌi paꞌija̱ꞌcohuaꞌi aꞌë cuiꞌne yure jerepa paꞌiohuaꞌi paꞌisicohuaꞌipi teaye paꞌiohuaꞌi paꞌija̱ꞌcohuaꞌi aꞌë.” Jerusalén Pa̱ire Jesús Ñaquë Oiye

³¹Ja̱re ja̱ muꞌse daëꞌë, fariseo pa̱i dani i̱te cahuë: “Saijë̱ꞌë, Herodes mëꞌëre huani je̱osiꞌi caji.”

³²Cajëna, i̱pi sehuopi: “Sani cajë̱ꞌë, ja̱ëte coꞌaquë ta̱ꞌñe asamaꞌquëre: ‘Yure, cuiꞌne ñaminaꞌa huatiohuaꞌire eto saoquë yoꞌoni cuiꞌne ju̱ꞌicohuaꞌire juju tëjini ñaminaꞌa jerepa muꞌse saosiꞌi.’

³³Ja̱je paꞌiquëtaꞌare ja̱ yëꞌtaꞌa yoꞌoja̱ꞌquë aꞌë yure, ñaminaꞌa cuiꞌne se ñatasi muꞌseje̱. Coꞌaji, Maijaꞌquëre quëacaiquëpi Jerusalén peo hue̱ꞌñana ju̱ꞌito.

³⁴¡Jerusalén Maijaꞌquë yoꞌo ja̱ꞌñe quëacaicohuaꞌire huani je̱o daripë! Cuiꞌne Maijaꞌquë mëꞌëni caquë jëjo daocohuaꞌire quë̱na pë̱api je̱a daripë. Jaiye mësarute oi cura mamajëre oio capë̱a huëꞌehuëna coyeje̱ yoꞌosiꞌi caquë yoꞌoquëna, coehuë.

³⁵Mësarute Maijaꞌquëpi je̱ocoja̱ꞌquë api. Cuiꞌne yëꞌëre ña co̱ñe peoja̱ꞌcohuaꞌi aꞌë, ‘mësarupi deꞌoquëre paꞌni Ëjaë mamirepa hueꞌequë daiquë’ ca maca ti̱ꞌañe pa̱to.”