Read Paikoka Lucas 19 Bible Online

Lucas 19 - Paikoka bible

Lucas 19

¹Ja̱ maca Jericó daripëna Jesús cacani tëto saina,

²cuiꞌne ja̱rote jaiye coꞌamaña paquë Zaqueo hueꞌequëje̱ pajiꞌi, curiquë paꞌi doꞌi se̱cohuaꞌi ëjaëpi.

³Ja̱ë cato Jesure ñañe yëquë pajiꞌi. Ja̱je yëquëtaꞌa me ñaquëꞌni pa̱i jaꞌi maña paꞌijëna, Zaqueo nëhuiquë pajiꞌi.

⁴Ja̱je paꞌipi duꞌru huëꞌhuëni so̱quë yëna mëjiꞌi, Jesús jaꞌye tëto saija̱ꞌtona ñani.

⁵Ja̱ maca Jesús ja̱roja̱ꞌa saiquëpi ñani Zaqueore capi: “Esa cajejë̱ꞌë, yure mëꞌë huëꞌena sani pëaja̱ꞌquëpi saiyë.”

⁶Ja̱ maca Zaqueo esa cajeni sihuaquë Jesure i̱ huëꞌena sai sapi.

⁷Ja̱ maca iyere yecohuaꞌi ñani siꞌahuaꞌi deꞌoye yoꞌomaꞌajiꞌi cahuë, Jesupi coꞌaye yoꞌoquë huëꞌena pëasiꞌi caquë, saquëna.

⁸Ja̱ maca Zaqueopi huëni nëcani capi, Ëjaëre: “I̱na Ëjaë, yëꞌë paye jopore paja̱ꞌa i̱sisiꞌi coꞌamaña peocohuaꞌire, cuiꞌne yëꞌë coa cosoquë jerepa neseꞌe paꞌito coꞌyosiꞌi cuatro paꞌye jerepa yëꞌë se jiosiquëre.”

⁹Ja̱je caquëna, Jesupi capi, i̱te: “Iye muꞌse ti̱tapi iye huëꞌe huasoye cuiꞌne iye ë̱më cato Abraham tsëcapë aquë api.

¹⁰Ja̱je paꞌina, Pa̱i Mamaquë dajiꞌi, ne huesësicohuaꞌire coꞌequë huasosiꞌi caquë.” Curiquë Yoꞌoseꞌe Ayere Quëaye

¹¹Ja̱ yëꞌtaꞌa Jesús cayere pa̱i asajë cuasahuë, yure Maijaꞌquë cua̱ñe te̱ꞌte ti̱ꞌajaꞌcoa cajë. Ja̱je cuasahuë, Jesupi Jerusalén jaꞌyere paꞌi doꞌire ñajë. Ja̱je cuasajëna, i̱pi pa̱i yoꞌoyeje̱ paꞌye caquë quëa huëopi.

¹²Ja̱ maca capi: “Pajiꞌi, teꞌe pa̱i deꞌo tsëcapë aquë. Ja̱ëpi soꞌo yejana sajiꞌi, pa̱i ëjaëre nesi maca, pa̱i ëjaë deꞌoni cuiꞌnaëpi coꞌi co̱siꞌi caquë.

¹³Ja̱ yëꞌtaꞌa saimaꞌnë, diez paꞌiohuaꞌire i̱ joꞌya acohuaꞌini soini, pa̱i ñapere i̱sipi jai doꞌi curiquë të̱ꞌñare teꞌe të̱ꞌñaseꞌe i̱siquë capi: ‘Iye curiquëpi se hueroni yeque jaiye nejëꞌë, yëꞌë coꞌi macaja̱ꞌa.’

¹⁴Ja̱je casiquëtaꞌare i̱ yeja paꞌi pa̱ipi i̱te coejë, i̱ saisi jeteyoꞌje jëjo saohuë, quëaja̱ꞌcohuaꞌipi: ‘Coeyë, mëꞌëre yëquë ëjaë deꞌoye’ cajë.

¹⁵Ja̱je casicohuaꞌitaꞌare pa̱i ëjaë deꞌosiquëpi coꞌipi, i̱ yejana. Ti̱tani cua̱ñe saopi, i̱ curiquë i̱sisicohuaꞌire quërëja̱ijëꞌë caquë. Asasiꞌi, je jaꞌye pa̱i ñape ja̱ curiquëpi nereꞌni caquë.

¹⁶Soina, duꞌru macarepa ti̱taquëpi capi: ‘Ëjaë, mëꞌë curiquëpi diez paꞌye jerepa se ne co̱huë.’

¹⁷Pa̱i ëjaëpi sehuopi: ‘Ai deꞌoji, mëꞌë deꞌo joꞌyaëꞌë. Mëꞌë aꞌri mañare deꞌoye ñacaisi doꞌire, mëꞌëre diez daripë̱a cua̱ñequëre neñë.’

¹⁸Yequëpi dani capi: ‘Ëjaë, mëꞌë curiquëpi cinco paꞌye jerepa nehuë.’

¹⁹Cuiꞌne iquëreje̱ sehuopi: ‘Mëꞌë cato cinco daripë̱a cua̱ñequë paꞌijë̱ꞌë.’

²⁰Ja̱ maca yequëpi dani capi: ‘Ëjaë, iye paꞌiji, mëꞌë curiquë pañuelo ca̱ꞌtipëna deani deꞌhuaseꞌe.

²¹Mëꞌëpi pa̱ire oimaꞌë yoꞌoquë mëꞌë i̱si maꞌñere tsiꞌsoni, cuiꞌne mëꞌë ta̱ maꞌñere coa tëaquë, yoꞌoquëni caꞌraquë pa̱huë.’

²²Caquëna, pa̱i ëjaëpi capi: ‘Coꞌa joꞌyaë, ja̱re mëꞌë caseꞌepi i̱ñoji, mëꞌë coꞌaquë paꞌiye. Ja̱je yëꞌë pa̱ire oimaꞌë yoꞌoquëpi yëꞌë ne maꞌñere tsiꞌsoquë cuiꞌne yëꞌë ta̱ maꞌñere coa tëaquë yoꞌoye asaquë sëte.

²³¿Me yoꞌoquë curiquë i̱sirena, i̱tipi ne doꞌire coꞌye sa̱i hue̱ꞌñana tëomaꞌë paquëꞌni, yëꞌë dani i̱ti mañaque nejaꞌquëtaꞌare huëꞌe ti̱tasi maca?’

²⁴Ja̱je cani i̱ti maca paꞌicohuaꞌire capi: ‘Jiojë̱ꞌë, curi tëꞌquire. Jioni i̱sijë̱ꞌë, diez të̱ꞌña paquëna.’

²⁵Caquëna, ja̱ohuaꞌipi cahuë, i̱te: ‘¿Ëjaë, tsoe diez të̱ꞌña paquëre me ai jerepa i̱siyeꞌni?’

²⁶Cajëna, pa̱i ëjaëpi sehuopi: ‘Nuñerepa cayë, paquëni ai jerepa se i̱siye paꞌiji. Ja̱je paꞌina, cuiꞌne peoquëni coa ai jerepa se jio co̱ñe paꞌiji, siꞌaye i̱ payeje̱ peo hue̱ꞌñarepa.

²⁷Cuiꞌne yecohuaꞌi yëꞌëre ëjaë deꞌoye coesicohuaꞌire quërëja̱ni i̱ñona dani yëꞌëque ñaquëna, huani je̱ajëꞌë,’ capi.” Jesupi Jerusalén Cacaseꞌe

²⁸Ja̱je iye se ca tëjini Jesús Jerusalénna sajiꞌi.

²⁹Tsoe Betfagé cuiꞌne Betania daripë̱a cuiꞌne Olivos hueꞌyosi cu̱tihuë̱a ti̱ꞌañe jaꞌi maca paꞌi i̱ yeꞌyacohuaꞌire cayaohuaꞌire jëjo saopi.

³⁰Ñeje caquë: “Ja̱ maca jaꞌye daripëna saijë̱ꞌë. Ti̱ꞌa maca ja̱rote paꞌija̱ꞌquë api, burro sëasiquëpi, pa̱ije ja̱ yëꞌtaꞌa tuimaꞌquëpi. Ti̱ꞌani joyeni dajë̱ꞌë.

³¹Joyejëna, yecohuaꞌipi me nejaꞌquëni sayeꞌni se̱cohuaꞌi paꞌito, cajë̱ꞌë, Ëjaëpi yoꞌoye paꞌiji.”

³²Ja̱ maca i̱ yeꞌyacohuaꞌipi sani Jesús caseꞌeje̱ ti̱ꞌahuë.

³³Ti̱ꞌani burroni joyejëna i̱ti tse̱ acohuaꞌipi se̱iꞌë: “¿Me neñuꞌju joyeyeꞌni?”

³⁴Cajëna, i̱ohuaꞌipi sehuohuë: “Ëjaëpi yoꞌoye paꞌiji, caëna, yoꞌoyë.”

³⁵Ja̱je quëani joyeni Jesús quëꞌrona sahuë. Sani ca̱ñapi burro jetena jajeni Jesure mëo ñohuë.

³⁶Ja̱ maca ñuꞌi sajiꞌi. Saina, pa̱i ca̱ñare i̱ saija̱ꞌa maꞌana jajehuë.

³⁷Olivos cu̱tihuë perepë cajeye jaꞌi macare paꞌina, siꞌahuaꞌi i̱te asani tuicohuaꞌipi Maijaꞌquëre sihuajë cui huëohuë, pa̱i yoꞌo ti̱ꞌa maꞌñere yoꞌoquëna, ñasicohuaꞌipi.

³⁸Ñeje cajë: “Deꞌoquëre papi pa̱i Ëjaë daiji, Maijaꞌquë jëjo daoquëre papi, deꞌoye paꞌiyere papi co̱ni. Ja̱je paꞌito sihuañuꞌu, i̱te maꞌtëmo acohuaꞌije̱ sihuajëna.”

³⁹Ja̱ maca fariseohuaꞌi pa̱i jopore co̱ni paꞌicohuaꞌipi cahuë, i̱te: “Yeꞌyaquë, mëꞌëre tuicohuaꞌire camaꞌpë cajë̱ꞌë.”

⁴⁰Ja̱je cajëna, Jesupi sehuopi: “Nuñerepa cayë. Icohuaꞌipi cuiye je̱ocohuaꞌi paꞌito quë̱na pë̱api cuija̱ꞌcoa.”

⁴¹Ja̱ maca Jesús Jerusalén quë̱no maca ti̱ꞌaquë i̱ti daripëre ñani ojiꞌi.

⁴²Ñeje caquë: “¡Iye muꞌse mëꞌë deꞌhue asato yëꞌë i̱siye deꞌoraꞌpi. Mëꞌë deꞌoye paꞌiye ti̱ꞌaraꞌhuë, i̱siyere! Ja̱je paꞌiquëtaꞌare yure cato yahueseꞌe paꞌiji. Ja̱je paꞌina, mëꞌë ña ti̱ꞌañe peoji.

⁴³Coꞌa muꞌse ti̱ꞌajaꞌcoa, mëꞌëre. Mëꞌëre sa̱ñope yoꞌocohuaꞌipi quë̱na tëhuopaje̱ paꞌiore tëꞌyaja̱icohuaꞌi aꞌë. Ja̱je yoꞌoni coa siꞌa te̱ꞌñapi etaye peoja̱jë cajë yoꞌocohuaꞌi aꞌë.

⁴⁴Ja̱je yoꞌojë yejana siꞌaye quë̱na pë̱a ne ta̱o o̱ajaꞌcohuaꞌi aꞌë, huani je̱ajaꞌcohuaꞌi aꞌë, mëꞌë mamajëre, huesë paꞌisi doꞌire Maijaꞌquë mëꞌëre doꞌi daisi maca.” Jesupi Maijaꞌquë Huëꞌere Tsoa To̱seꞌe

⁴⁵Ja̱ maca Jesús Maijaꞌquëre huëꞌena cacani i̱ti huëꞌena coꞌamaña i̱sijë cuiꞌne huerojë yoꞌocohuaꞌire peo hue̱ꞌñarepa eto saopi, hueꞌsena.

⁴⁶Yoꞌoquë capi, ja̱ohuaꞌire: “Toyaseꞌe caji, ñeje: ‘Yëꞌë huëꞌe cato Maijaꞌquëre se̱ huëꞌe aꞌë.’ Ja̱je paꞌiotaꞌare mësaru cato, coꞌamaña ñaohuaꞌi tuꞌaro neni yoꞌoyë.”

⁴⁷Siꞌa muꞌseña Jesús yeꞌyapi, Maijaꞌquëre se̱ huëꞌena. Ja̱je yeꞌyaquëna, Maijaꞌquë huëꞌe ñacaicohuaꞌi ëjaohuaꞌi cuiꞌne cua̱ñeseꞌe yeꞌyacohuaꞌi cuiꞌne pa̱i daripë ëjaohuaꞌije̱ me neni huani je̱ojaꞌcohuaꞌi aꞌni cuasajë coꞌehuë, i̱ti yoꞌo ja̱ꞌñere.

⁴⁸Ja̱je coꞌejëtaꞌa ti̱ꞌamaꞌpë paëꞌë, i̱te ne ja̱ꞌñere. Siꞌa pa̱i i̱seꞌere asajë cuiꞌne sehuojë yoꞌojëna, ñajë.