Read Paikoka Lucas 23 Bible Online

Lucas 23 - Paikoka bible

Lucas 23

¹Ja̱ maca ja̱je cani siꞌahuaꞌi huëni Jesure sahuë, Pilato quëꞌrona.

²Ja̱rona coꞌaquëre papi ca huëohuë, ñeje cajë: “Iquë coꞌaye yoꞌoye ti̱ꞌahuë, yëquë pa̱ini coꞌa deꞌhuaquë cuiꞌne pa̱i doꞌi sa̱imaꞌpë paꞌijë̱ꞌë, romano pa̱i ëjaëre caquë. Cuiꞌne, ja̱re i̱pi yëꞌë Cristo, pa̱i ëjaëre paꞌë caquë api.”

³Ja̱je caquëna, Pilatopi se̱jiꞌi, i̱te: “¿Mëꞌë aꞌë, judío pa̱i ëjaë?” Caquëna, Jesupi sehuopi: “Ja̱je paꞌijë̱ꞌë, mëꞌë caseꞌeje̱.”

⁴Caquëna, ja̱ maca Pilato capi, ja̱ohuaꞌire Maijaꞌquë huëꞌe ñacaicohuaꞌi ëjaohuaꞌire, cuiꞌne pa̱ire: “Iquë coꞌaye yoꞌoye ti̱ꞌamaꞌë paꞌiyë.”

⁵Caquëna, i̱ohuaꞌipi ai tutu cahuë: “I̱ yeꞌyapi siꞌa Judea pa̱ire coꞌa deꞌhuaquë sa̱ñope ëjaohuaꞌire, yoꞌocohuaꞌire nequë api. Ja̱je paꞌipi yure i̱ñona cuiꞌne yoꞌoji, Galileapi huëosiquëpi.” Herodesna Jesure I̱siye

⁶Pilatopi ja̱re asani, ja̱je paꞌito iquë Galilea aquë aꞌë capi.

⁷Ja̱je paꞌina, mësarupi ja̱ro aquë api carena, Herodes quëꞌrona jëjo saosiꞌi, Galilea daripë cua̱ñequëna, capi. Ja̱ muꞌseña cato ja̱ëje Jerusalénre pajiꞌi.

⁸Sarena, Herodespi ñani ai sihuaquë ai tsoe coa ña ëa ju̱ꞌi paꞌiquëpi i̱ yoꞌoyeseꞌe cajëna, asaquë pajiꞌi. Ja̱je paꞌipi pa̱i yoꞌo ti̱ꞌa maꞌñere yoꞌoquëna, ñasiꞌi caquë paꞌiquë pajiꞌi.

⁹Ja̱je paꞌipi jaiye se̱jiꞌi. Se̱quëtaꞌare Jesús teꞌoreje̱ sehuomaꞌë pajiꞌi.

¹⁰Cuiꞌne ja̱rote Maijaꞌquë huëꞌe ñacaicohuaꞌi ëjaohuaꞌipi cuiꞌne cua̱ñeseꞌe yeꞌyacohuaꞌipi ja̱ohuaꞌipi i̱te ai sa̱ñope cacohuaꞌi paëꞌë.

¹¹Ja̱ maca Herodes cuiꞌne i̱ soldado pa̱i tea ju̱ꞌijë coꞌaye yoꞌohuë. Coa i̱ni cueꞌcueñuꞌu cajë su̱ñahuë, deꞌo ca̱ñare pa̱i ëjaohuaꞌi juꞌi ca̱re. Ja̱ jeteyoꞌje cuiꞌnaëni Pilato quëꞌrona jëjo saopi.

¹²Ja̱ muꞌse Pilato cuiꞌne Herodes cajeohuaꞌi deꞌohuë, ja̱ꞌrë pë̱icohuaꞌi paꞌisicohuaꞌipi. Jesure Huaiye Paꞌiji, Caye

¹³Ja̱ maca Pilato Maijaꞌquë huëꞌe ñacaicohuaꞌi ëjaohuaꞌire cuiꞌne pa̱i ëjaohuaꞌire tsiꞌsoni,

¹⁴capi: “Mësarupi dahuë, iquëre yëꞌë quëꞌrona coꞌaye pa̱ire yoꞌoji cajë. Ja̱je paꞌiquëtaꞌare yëꞌëpi se̱ni asasiꞌi caquë mësarupi ñajëna, yoꞌohuë. Ja̱je paꞌina, tsoe mësarupi ñahuë, doꞌi peoquë paꞌina. Ja̱je paꞌito i̱que doꞌire i̱te coꞌaye cayeꞌni.

¹⁵Ja̱je paꞌina, Herodesje̱ ti coꞌaye yoꞌomaꞌquë paꞌina, ña jujani jëjo daopi. Ja̱je paꞌina, iquëre huani je̱oñe peoji.

¹⁶Ja̱je paꞌina, coa siꞌseni jeteyoꞌje joye saoja̱ꞌquë aꞌë, paꞌija̱ꞌquëre.”

¹⁷Ja̱je fiesta muꞌseña cosicohuaꞌire teꞌire eto saoquë pajiꞌi, pa̱ire deꞌoye yoꞌosiꞌi caquë.

¹⁸Ja̱je caquëna, siꞌahuaꞌi cui huëohuë: “¡Ja̱ëte huani je̱oñe paꞌiji! ¡Barrabásni eto saojë̱ꞌë!”

¹⁹Iquë Barrabás cato pa̱ire huaisiquëni cosiquë pajiꞌi. Cuiꞌne ja̱ daripë pa̱i i̱ohuaꞌi ëjaohuaꞌire uihuaye huëoquëpi.

²⁰Pilato cato Jesuni etoye yëpi. Ja̱je paꞌina, ti̱jupë ca co̱pi.

²¹Caquëna, ai jerepa tutu cuihuë: “¡Que̱jaꞌquë api, que̱jaꞌquë api!”

²²Toaso̱ñe aye Pilato capi, ja̱ohuaꞌire: “¿I̱quere coꞌaye yoꞌo uꞌni, i̱? Yëꞌë i̱ coꞌaye yoꞌoseꞌe ti̱ꞌamaꞌë paꞌiyë. Ja̱je paꞌire ¿me coa huaiyeꞌni? Ja̱je paꞌina, coa ai siꞌseni jëjo saosiꞌi, paꞌija̱ꞌquëre.”

²³Ja̱je caquëna, ai jerepa tutu cuihuë, que̱jaꞌquë api cajë. Ja̱je ai cui doꞌipi Maijaꞌquë huëꞌe ñacaicohuaꞌi ëjaohuaꞌi caseꞌe ja̱ yoꞌoye ti̱ꞌahuë.

²⁴Ja̱ maca Pilato i̱ohuaꞌi yëjë cayeje̱ yoꞌoseꞌe paꞌija̱quë cuasapi.

²⁵Cuasani ja̱je i̱ohuaꞌi casiquëni eto saopi, pa̱ire huaiquë coꞌaquëni. Ja̱ maca Jesuni i̱ohuaꞌi yëyeje̱ huaija̱ꞌquëre i̱sipi. I̱te Que̱seꞌe

²⁶Ja̱ maca Jesure que̱jaꞌquëre sajëna, Cirene aquëpi Simón hueꞌequëpi sa̱ñope daina, ti̱ꞌani tse̱ani cua̱ñehuë, Jesure que̱jaꞌcore cruzu hueꞌequë saja̱ꞌquëre cajë Jesupi duꞌru saina.

²⁷Ja̱je saina, jai pa̱i tuëꞌë. Cuiꞌne nomiohuaꞌije̱ jai pa̱i oijë cuijë saëꞌë, i̱ni coꞌa ju̱ꞌijë.

²⁸Ja̱je oijëna, Jesús ñani capi, ja̱ohuaꞌire: “Jerusalén nomiohuaꞌi oimaꞌpë paꞌijë̱ꞌë, yëꞌëre. Coa ai jerepa mësaruja̱ꞌa cuiꞌne mësaru mamajëni oijë̱ꞌë.

²⁹Yequë muꞌse ñeje caye ti̱ꞌajaꞌcoa: ‘Nomiohuaꞌi mamajëre peocohuaꞌi, tsi̱ pamaꞌpë paꞌisicohuaꞌi, cuiꞌne ojeje̱ tso̱samaꞌpë paꞌisicohuaꞌi jerepa sihuaja̱ꞌcohuaꞌi aꞌë.’

³⁰Cajëna, pa̱ipi ca huëoja̱ꞌcohuaꞌi aꞌë, ai cu̱tire: ‘Yëquëna quë̱ñojëꞌë’ cuiꞌne aꞌri cu̱tihuë̱are caja̱ꞌcohuaꞌi aꞌë, ‘Yahuejë̱ꞌë, yëquëre.’

³¹Huajë so̱quë yëje̱ paꞌini yëꞌëre jaiye yoꞌoni me mësarute pa̱jaꞌcohuaꞌi aꞌni cue̱nisi so̱quë yëje̱ paꞌiohuaꞌire.”

³²Jesús ja̱ꞌre co̱ni huaija̱ꞌcohuaꞌire caya pa̱ire sahuë, coꞌamaña yahue ñacohuaꞌire.

³³Ja̱ maca Pa̱i Si̱opë hueꞌyosi hue̱ꞌñana ti̱ꞌani Jesure que̱huë. Cuiꞌne caya coꞌa pa̱ire co̱ni, yequëni i̱ ëja te̱ꞌtena cuiꞌne yequëni i̱ ari te̱ꞌtena nëcohuë.

³⁴Ja̱ maca i̱te que̱jëna, Jesupi capi: “Jaꞌquë oijë̱ꞌë, ja̱ohuaꞌire i̱ohuaꞌi yoꞌoye huesëjë yoꞌocohuaꞌire.” Soldado pa̱ipi Jesús juꞌi ca̱re dutani sa̱ꞌñe i̱ohuaꞌija̱ꞌa nepi, i̱ote paja̱ꞌcohuaꞌi aꞌni cajë yoꞌohuë.

³⁵Ja̱je yoꞌojëna, pa̱ipi ai ñahuë. Cuiꞌne pa̱i ëjaohuaꞌique cueꞌcuejë cahuë: “Yecohuaꞌire huasopi. Yuretaꞌa coꞌye huasoyere paji, nuñerepa Cristo Maijaꞌquë tse̱quërepa pani coꞌye huasoye paꞌini.”

³⁶Cuiꞌne soldado pa̱ije cueꞌcuejë i̱te oꞌsa cuiyaꞌi co̱nore o̱cuasiꞌi cajë yoꞌohuë.

³⁷Ja̱je yoꞌojë i̱te cahuë: “Judío pa̱i ëjaë pani mëꞌëjaꞌa coꞌye huasojë̱ꞌë.”

³⁸Cuiꞌne i̱ si̱opë ë̱mëjeꞌere toyasico pacoꞌë, griego, latín cuiꞌne hebreo cocapi ñeje: IQUË JUDÍO PA̲I ËJAËPI.

³⁹Coꞌaye yoꞌocohuaꞌi aquëre que̱ deosiquëpi i̱ti maca dequëpi tea ju̱ꞌi coꞌaye capi, ñeje: “Mëꞌëpi Cristorepa pani mëꞌëjaꞌa coꞌye huasoni jeteyoꞌje yëquëre huasojë̱ꞌë.”

⁴⁰Ja̱je caquëna, yequëpi i̱ cajeire capi camaꞌë: “¿Maijaꞌquëre caꞌramaꞌquë, mëꞌëje cuiꞌne ju̱ꞌijaꞌquë me casiꞌni?

⁴¹Mai cato nuñerepa coꞌaye yoꞌocohuaꞌipi yoꞌo cua̱ñoñë, ja̱re mai coꞌaye yoꞌosi doꞌire sa̱ijë. Ja̱je paꞌiquëtaꞌare iquë ti coꞌaye yoꞌomaꞌquëpi yoꞌo cua̱ñoji, ñaquë mëꞌë.”

⁴²Cani ja̱ maca capi: “Jesús hua̱nëyemaꞌë paꞌijë̱ꞌë, yëꞌëre mëꞌë cua̱ñe huëo maca.”

⁴³Caquëna, Jesupi capi, i̱te: “Nuñerepa cayë, mëꞌëre. Yurepi yëꞌë ja̱ꞌre co̱ni paꞌija̱ꞌquë aꞌë, deꞌo hue̱ꞌñare.” Jesús Ju̱ꞌiseꞌe

⁴⁴Muꞌse joporepa paꞌi maca siꞌa yeja ñamije paꞌiorepa deꞌopi, tres paꞌi macaja̱ꞌa naꞌiquëna.

⁴⁵Ë̲sëje̱ miañe pa̱ni cuiꞌne ta̱ꞌtëpo ca̱pi Maijaꞌquëre se̱ huëꞌe Maijaꞌquë paꞌi sito tëhuosicoje̱ jopore paja̱ꞌa tsata sajiꞌi, ë̱mëjeꞌepi meñe huëꞌehuëre pana.

⁴⁶Ja̱ maca Jesupi cuipi: “Jaꞌquë, Jaꞌquë yëꞌë joyo mëꞌëna i̱si nëoñë.” Ja̱je cani ju̱ni huesëpi.

⁴⁷Ja̱ maca capitán, romanopi iye yoꞌoseꞌere ñani Maijaꞌquëre sihuaquë capi: “Nuñerepa iquë ti coꞌaye yoꞌomaꞌquë pajiꞌi.”

⁴⁸Siꞌahuaꞌi ja̱ maca paꞌisicohuaꞌipi i̱te yoꞌoseꞌere ñani quëquë huesëjë coti saihuë̱ana tëꞌcajë saëꞌë.

⁴⁹Ja̱je saijëtaꞌare siꞌahuaꞌi Jesús ñacohuaꞌipi cuiꞌne nomiohuaꞌi Galileapi tuisicohuaꞌipi soꞌona pëani ñahuë, iye yoꞌoye. Jesure Ta̱seꞌe

⁵⁰Pajiꞌi, teꞌi nuñerepa yoꞌoquëpi i̱ mami José hueꞌequëpi, Judea yejare Arimatea daripëre paꞌiquë. Ja̱ë cato judío pa̱i ëjaohuaꞌi aquë pajiꞌi.

⁵¹Iquë José cato Maijaꞌquë te̱ꞌte aye yoꞌoye ñasiꞌi cuasaquë utequë pajiꞌi. Ja̱je paꞌipi yequë ëjaohuaꞌi Jesure huai ja̱ꞌñere cajëna, teꞌe cuiꞌne cuasaye pa̱pi.

⁵²Ja̱je paꞌina, ëjaëpi Pilatore sani se̱jiꞌi, Jesús ca̱pë ta̱ ja̱ꞌñere caquë.

⁵³Cruzu dequëre casani jai ca̱ñapi ca̱ꞌneni quë̱na yejana coje nesicona o̱api, ja̱ yëꞌtaꞌa pa̱ire ta̱maꞌa cojena.

⁵⁴Huajë muꞌse paꞌija̱ꞌconi ne deꞌhua muꞌse pajiꞌi. Ja̱ muꞌse cato tsoe huëoye jaꞌi maca paꞌiji.

⁵⁵Galileapi Jesure nomiohuaꞌi tuisicohuaꞌipi sani ta̱si daripë ñahuë, me o̱areꞌni, i̱ ca̱pë cajë.

⁵⁶Ñani ja̱ maca huëꞌena coꞌini huëo së̱ maꞌña ne deꞌhuahuë. Ne deꞌhuani huajë muꞌse huajëhuë, i̱ti cua̱ñeseꞌe paꞌiyeje̱.