Read Paite 1 Chronicles 11 Bible Online

1 Chronicles 11 - Paite bible

1 Chronicles 11

¹Huchiin Israel tengteng Hebron ah David kiangah a hongkikhawm khawm ua, Ngaiin, na guh leh na sa ka hi uh.

²Tuma lamin, Saul mahmah kumpipa a hih laiin, Israel pi khiaa pi lut nang na hi a; TOUPA na Pathianin na kiangah, Israel ka mite na vak dinga, ka mite Israel tungah lal na hi ding hi, honchi a.

³Huchiin Israel upate tengteng Hebron ah kumpipa kiangah a hong pai ua; huan Davidin Hebron ah TOUPA maah amau toh thukhun a bawla; huan Samuel khuate TOUPA thu bang jela, Israel tunga kumpipa dingin David a septa uhi.

⁴Huan David leh Israel tengteng Jerusalem (huaimah tuh Jebus a hi) ah a hoh ua; huchiin Jebus mite, huai gama tengte, huailaiah a om uhi.

⁵Huchiin Jebusa tengten David kiangah, Hiai lama na hong louh ding ahi, a chi ua. Ahihhangin Davidin Zion kulh muanhuai a laa; huaimah tuh David khopi ahi.

⁶Huan Davidin, Kuapeuh Jebus mite that masapenpen a lianpen leh heutu ahi ding, a chi a. Huan Zerui tapa Joab a kuantou masapena, huchiin amah a lianpena bawlin a omta hi.

⁷Huan David bel kulh muanhuai ah a tenga; huaijiakin David khopi a chi uhi.

⁸Huchiin khopi a bawl suak veka, Millo kimvel akipan nasanin: huan Joabin khopi dang a bawlpha vek hi.

⁹Huchiin David bel a hongthupi semsema; sepaihte TOUPA lah a kiangah a om ngala.

¹⁰Huan hiaite David neih mi hatte laka a pipente ahi uh, Israel tungtanga TOUPA thu bang jela, amah kumpipa dia bawl dinga, Israel tengteng toh, a gamsunga amah laka a hatna uh taklangte.

¹¹Huan hiai Davidin a neih mi hatte zah ahi: Jasobeam, Hakmon mi tapa, sawmthumte laka pipen; za thumte dou dingin a teipi a leka khatvei thuin amaute a that hi.

¹²Huan amah nungin Dodo tapa Eleazar, Ahoh mi, mi hat thumte laka khat ahi hi.

¹³Pas-dammim ah David kiangah a oma, huan huaiah kidou tumin Philistia mite a kikhawm ua, barli-buha dimna mun takah; huan Philistia mite ma akipanin mite a taikekta uhi.

¹⁴Huchiin huai mun laitakah a ding ua, a hum ua, a hum ua, Philistia mite a that uhi; huan TOUPAN zohna thupi takin amau a hondamta hi.

¹⁵Huan mi pipen sawmthumte laka thum suangpi lamah David kiangah, Adullam kokhuk ah a hoh suk ua; huan Philistia mite tampiten Rephaim phaijang ah puanin a kai ua.

¹⁶Huailaiin David bel kohawm sungah a om a, Philistia mite kulhpi bel Beth-lehem ah a om hi,

¹⁷Huchiin David a lungjuanga, Aw kongpi kianga om, Beth-lehem tuihel tui dawn dinga hong pia mi khat om leh chi hinatel ing e! a chi a.

¹⁸Huan huai thumten Philistia mite tampi lak a phu pai suak ua, Beth-lehem tuihel akipan tui a vatawi ua, kongpi kianga om, a honla ua, David kiang a hontun uhi: himahleh Davidin a dawn nuam keia, TOUPA adin a bung khe jawa.

¹⁹Hiai ka hih, ka Pathianin honphal kei hen: a hinna uh lauhuainaa koih hiai mite sisan ka dawn ding hia? amau lah a hinna uh lauthawnna tohin a hontawi uh ahi ngala, a chi a. Huaijiakin a dawn nuamta kei hi. Hiai thilte huai mi hat thumten a hih uh.

²⁰Huan Abisai, Joab unaupa, huai thumte laka khat ahi: aman lah za thumte dou dingin a teipi a lika amau a thata, mi thumte lakah min a neita ngala.

²¹Thumte lakah amah a zahtakhuai jaw hi nihte sangin huchiin a heutupa ding ua bawlin a om hi: hitamahleh thum masate jaw a pha kei hi.

²²Benai Jehoiad tapa, Kabzeela mi hangsan, thilhih thupite hihpa tapa, Moaba Ariel tapate nihte a thata: a pai suk laia, vuk kiak laiin kokhuk lakah humpinelkai a that hi.

²³Huan Aigupta mi a thata, mi lian mahmah, tong ngaa sang; huan Aigupta mi kha a teipi siamganmi chiam bang ahi; huchiin a kiangah chiang toh a hoh suka, Aigupta mi khut akipan teipi a laa, amah mah teipiin amah a hihlumta hi.

²⁴Hiai thilte Benai Jehoiad tapain a hiha, huchiin huai mi hat thumte lakah min a nei hi.

²⁵Ngaiin, sawmthumte sangin zahtakhuaui jawin a oma, himahleh thum masate jaw a pha kei hi: huchiin Davidin a galvil heutuin amah a koih hi.

²⁶Sepaih pawltea mi hatte leng; Asahel Joab unaupa, Elhanan Beth-lehema Dodo tapa;

²⁷Sammot Harod mi, Helez Pelon mi;

²⁸Ira Teko mi Ikkes tapa, Abiezer Anatho mi;

²⁹Sibbekai Husat mi, Ilai Ahoh mi;

³⁰Maharai Netophat mi, Heled Neophat mi Baan tapa;

³¹Ithai Benjamin tate Gibeaha Ribai tapa, Benai Pirathon mi;

³²Hurai Gaah luitate a, Abiel Arabathi mi;

³³Azmavet Baharum mi, Eliahba Saalbon mi;

³⁴Gizon mi Hasem tapate, Jonathan Sage Harar mi tapa;

³⁵Harar mi Sakar tapa Ahiiam, Ur tapa Eliphal;

³⁶Hepher Mekerath mi, Ahija Pelon mi;

³⁷Hezro Karmel mi, Naarai Ezbai tapa;

³⁸Joel Nahtan unaupa, Mibhar Hagri tapa;

³⁹Ammon mi Zelek, Beroth mi Naharai, Joab galvan pomi Zerui tapa;

⁴⁰Ira Ithri mi, Gareb Ithri mi;

⁴¹Uria Hit mi, Zabad Ahlai tapa;

⁴²Adina Reuben mi Siza tapa, Reuben mite laka pipen leh a kianga sawmthumte;

⁴³Hanan Maaka tapa, Josaphat Mithni mi;

⁴⁴Uzzia Asterath mi, Sama leh Joiel Aroer mi Hotham tapate;

⁴⁵Jediael Simri tapa, Joha a unaupa, Tiz mi;

⁴⁶Eliel Mahavi mi, Jeribai, Josavia, Elnaam tapate, Ithma Moab mi;Eliel, Obed, leh Jaasiel Mezobami.

⁴⁷Eliel, Obed, leh Jaasiel Mezobami.