Read Paite 1 Chronicles 16 Bible Online

1 Chronicles 16 - Paite bible

1 Chronicles 16

¹Huchiin Pathian bawm a honla lut ua, puanin Davidin a bawlsak, laizang ah a koihta uhi: huan Pathian maah halmang thillatte leh lemna thillatte a lan uhi.

²Huan Davidin halmang thillat leh lemna thillatte a lat khitin TOUPA minin mite a vualjawl hi.

³Huan Israel mi chih kiangah, pasal leh numei mi chih kiangah tanghou beu khat, sa bak khat, leh grepmingaw beu khat a hawma.

⁴Huchiin TOUPA bawm maia nasem ding leh TOUPA, Israel Pathian kipahpih ding leh kipahthugen ding leh phat dingin Levi mite laka kuate hiam a septa hi:

⁵Asaph a pipen, amah zomin Zekaria, Semiramot, Jeiel, Mattithia, Eliab, Benai, Obed-edom, Jeiel, Pekging guisawmneite leh kaihgingte toh; huan Asaph dakkhutbette, ngaihtaka ging toh;

⁶Huan Benai leh Jahaziel siampute Pathian thukhunna bawm maa, om nilouhlouhte toh.

⁷Huchiin huai niin Davidin, Asaph leh a unaute khutin, TOUPA kianga kipahthute gen ding a hihkip masapenpen hi.

⁸Aw TOUPA kiangah kipahthute gen unla, a min lou un; mite lakah a thilhihte theisak un.

⁹Amah lasaksak unla, phatnalate saksak un; a nasep lamdangte tengteng houlim un.

¹⁰A min siangthou suang unla: TOUPA zongte lungtang kipak hen.

¹¹TOUPA leh a hatna zong unla; a mel zong nilouh un.

¹²A hihkhitsa a thilhih lamdangte theigige unla; a lamdannate leh, a kama vaihawmte;

¹³Aw nou a sikha Israel chi, nou a mitelte, Jakob tate.

¹⁴Amah TOUPA i Pathian ahi: a vaihawmte lei tengtengah a om hi.

¹⁵Khantawnin a thukhun theigige unla, suan sang khatte kianga a piak a thu;

¹⁶Thukhun Abraham toh a bawl, huan Isaak kianga a thuchiam;

¹⁷Huan huaimah thuseh dingin Jakob kiangah a hihkipa, Israel kiangah khantawn thkhun dingin:

¹⁸Na kiangah Kanaan gam, na goutan tuan, konpe ding, chiin:

¹⁹Hihzaha mi tawmchik phet na hih lai un; ahi, tawm chik mahmah, a sunga khualzinmite;

²⁰Nam dangdang kiangah a ban hoh ua, gam dangdang akipanin mi tuamtuamte kiangah.

²¹Kuamah nuaisiah a phal keia; ahi, amaute jiakin kumpipate leng a sal hi;

²²Khoih kei unla, ka jawlneite poi himhim leng khoih kei un, chiin.

²³Leitung luahte tengteng aw, TOUPA pahtawiin lasa unla, ni tengin a hotdamna thu theisak un.

²⁴Nam chih lakah a thupidan gen unla, mi chihte lakah a thillamdang hihte gen un.

²⁵TOUPA lah a thupi-a, nakpi mahmaha phat ding a hih jiakin; pathian tengteng sanga kihtak ding ahi.

²⁶Mi chih pathiante lah milim ahi ngal ua; TOUPAN bel vante a bawl hi.

²⁷Pahtawina leh thupina a maah a oma; hatna leh kilawmna a mun siangthou-ah a om hi.

²⁸Mi chiha chi chihte aw, TOUPA kiangah pia unla, TOUPA thupina leh hatna pia un.

²⁹TOUPA a min thupina pia unla, thillat ding tawi unla, a maah hongpai un; siangthou kilawmnain TOUPA chibaibuk un.

³⁰Lei tengteng aw, a maah ling un; khovel a lin theih louhna dingin hihkipin a om hi.

³¹Vante kipak takin om uhenla, lei leng nuamsa takin om hen; nam chih lakah, TOUPAN vai a hawm, chi uheh.

³²Tuipi leh a sunga thil om tengteng ging hon henla; gam leh a sunga om tengteng kipak takin om hen;

³³Huchih hun chiangin gamnuaia sing tengtengin TOUPA maah nuamsain la a sa ding ua, lei vaihawm dingin lah a hong pai sin ngala.

³⁴Aw TOUPA kiangah kipahthu gen un, amah lah a hoih ngala; a chitna khantawna om ding ahi ngala.

³⁵Aw, ka hotdamna uh Pathian, honhondam inla, na min siangthou phat ding leh, na phatna suang dingin, nam chih laka kipan honpi khawm inla, honhumbitin, chi un.

³⁶Israelte Pathian TOUPA phatin om hen, Khantawn akipan khantawn dongin. Huan, mipi tengtengin, Amen, a chi ua, TOUPA a phatta uhi.

³⁷Huchiin huaia TOUPA thukhunna bawm maa ni teng a kuldan bang jela nasem dingin Asaph leh a unaute a koihtaa;

³⁸Obed-edom leh Hosa, a unau uh sawmguk leh giat te toh; Jeduthun tapa Obed-edom leh Hosa te kongkhakngakmi dingin ahi ua;

³⁹Huan Zadok siampu leh, a unaute siampute, Gibeona om mun sanga TOUPA biakbuk maa,

⁴⁰Jingsang leh nitaka halmangthillat maitam tunga TOUPA adia halmang thillatte lan gige dingin, Israel kiangah thupiaka piak, TOUPA dan sunga kigelh dungjuiin;

⁴¹A chitna khantawna a om jiakin TOUPA kianga kipahthugen ding Heman leh Jeduthun leh mi dang min loha telkhiakte toh;

⁴²Heman leh Jeduthunin Pathian lasaklna dia vanzatte, pengkulte leh dakkhutbette, ngaihtaka ginsak dingte a nei ua; kongkhakngakmi ding Jeduthun tapate toh.Huchiin mipi tengteng amau in lam chiat ah a paita ua; huan David leng a inkote vualjawl dingin a pai sam hi.

⁴³Huchiin mipi tengteng amau in lam chiat ah a paita ua; huan David leng a inkote vualjawl dingin a pai sam hi.