Read Paite 1 Chronicles 23 Bible Online

1 Chronicles 23 - Paite bible

1 Chronicles 23

¹Huan David a nadam sawtin a na upa mahmah taa; huchiin a tapa Solomon Israelte kumpipain a bawlta hi.

²Huan Israelte makai tengteng siampute leh Levite toh a sam khawma.

³Huan, Levite kum sawmthum akipan tunglam sim ahi ua; a tamlam uh piching sing thum leh sang giat ahi uh.

⁴Huaite laka sing nih leh sang li TOUPA in lamheutute heutu ding ahi ua; huan, sang gukte bel heutute leh vaihawmmite dingte ahi uh;

⁵Huan sang lite kongkhakngakmite ding ahi ua, huan sang li te bel, Phatna dinga thil tumging chi ka bawl, Davidin a chihte zanga TOUPA phatmi dingte ahi uh.

⁶Huan Levi ta Gerson te, Kahath te, Merari te zahin Davidin pawl a bawla.

⁷Gerson mite Ladan leh Simei ahi uh.

⁸Ladan tate pipente Jehiel te, Setham te, Joel te, thum ahi uh.

⁹Simei tate Solomoth te, Haziel te, Haran te, thum ahi uh. Hiaite Ladan suan inkote pipente ahi uh.

¹⁰Huan Simei tate bel Juhath te Juhath te, Zin te, Jeus te, Beria te ahi uh. Hiai lite Simei tate ahi uh.

¹¹Huan Jahath a upa pen ahi a, Ziza a sang ahi; Jeus leh Beriaten bel ta a hau kei ua; huaijiakin inkuan khat banga sim ahi uh.

¹²Kahath tate Amram te, Izhar te, Hebron te, Uziel te, li ahi uh.

¹³Amram tate Aron leh Mosi ahi uh; Aron bel amah leh a suante khantawna dinga thil siangthou takte hihsiangthou-a, khantawna TOUPA maa gimlim hala, a na sema, a mina vualjawlpa dinga hihtuam ahi uh.

¹⁴Pathian mi Mosi bel, a tate Levi nam laka sim ahi uh.

¹⁵Mosi tate Gersom leh Eliezer ahi uh, Gersom tate laka upa pen Sebuel ahi.

¹⁶Huan Eliezer tate laka upapen Rehabia ahi.

¹⁷Huan Eliezerin tapa dang himhim a neikei; Rehabia in bel tapa tampi a nei.

¹⁸Izhar tapate; Selmoth a pipen.

¹⁹Hebron tate laka pipen Jeria ahi a, a sang Amaria, a sang nawn Jahaziel, a sang nawn Jekameam ahi.

²⁰Uziel tate laka upajaw Mika ahi a, a sang Isia ahi.

²¹Merari tate; Merari tate bel Mahli leh Musi ahi uh, Mahli tate, Eleazar leh Kis ahi uh.

²²Huan Eleazar a si a, tapate neilouin, tanute kia a nei a; huan Kis tapa a unaute un jiin a nei uh.

²³Musi tate Mahli te, Eder te, Jeremoth te, thum ahi uh.

²⁴Huaite Levi suan, a inkuan uh bang jela min gelha a sim uh inkuan pipen, TOUPA in lama kuan, kum sawmnih akipan tunglama sim tengte ahi uh.

²⁵Davidin, TOUPA, Israelte Pathianin a mite galmuang takin a omsaktaa, Jerusalem ah a om nilouha,

²⁶Leviten leng biakbuk leh a nasepna ding tuiumbelsuan tengteng a zon uh a kiphamohta kei hi, a chi ahi.

²⁷David thupiak nanung jiakin Levite kum sawmnih akipan tung lam tanin sim ahi ngal ua.

²⁸A nasep uh Pathian ina nasepa Aron tapate panpiha intual sung leh dantan sunga thil siangthou tengteng hihsiangthou-a, TOUPA ina nasep lah ahi ngala;

²⁹Tanghou koih ding te, tangbuang thillat dinga tangbuang nel mahmah, silngou hel louh tanghoupek hiam, bela uk hiam, kan hiam, a teh leh a letdan bang tengteng ding bawl khawng te toh;

³⁰Huan jingsang tenga TOUPA kianga kipahthu gen leh amah phatte toh, nitaka leng huchi mah;

³¹Huan khawlni te-a, kha thak te-a ankuanglui neih te-a, a hihding seh bang jela TOUPA kianga halmang thillat tengteng TOUPA maa lat gige te toh;Huan kihoupihna puanin kep te, mun siangthou kep te, TOUPA ina nasema a unau Aron tapaten hih ding a seh peuhmah uh hih te toh.

³²Huan kihoupihna puanin kep te, mun siangthou kep te, TOUPA ina nasema a unau Aron tapaten hih ding a seh peuhmah uh hih te toh.