Read Paite Job 12 Bible Online

Job 12 - Paite bible

Job 12

¹Huchiin Jobin a dawnga, hichiin a chi a:

²Ginlelh vuallouhin mite jaw na hi hi peuhmah ua, huan nou toh pilnaa si ding hi.

³Himahleh noute bangmahin theihsiamna ka nei hi; nou sangin ka niamzo kei hi: ahi, hiaite bang thilte kuan a theikei a?

⁴Kei jaw mi a inveng adia nuihzabuk ka hi a, kei, huai Pathian sama, hua aman amah dawnpa, mi dik, mi hoihkim, nuihzabuk kana hi.

⁵Omnuama om ngaihtuahnaah vangsiatna muhsitna a oma; ahihhangin, a khe uh teute adingin mansain a om hi.

⁶Suamhatmite puaninte a lohchinga, Pathian hehsakte akip ua; a khut uh pathiana neite Pathian in tampi a pia.

⁷Himahleh gamsate dongin, huan amau nang a honsinsak ding uh; huan huihkhuaa vasate, huchiin nang a honhilh ding uh:

⁸Ahihkeileh lei kiangah thu genin, nang a honsinsak dinga; huan tuipia ngasaten na kiangah a phuang ding uhi.

⁹Hiaite tengteng ah, TOUPA khutin a hihkhin chih kua ahia theilou?

¹⁰Amah khut ah thil hing chiteng kha leh, mihing tengteng hatna a om hi.

¹¹Bilin thute a enchian kei maw, dangtungin a an achiam bangin?

¹²Mi upate kiangah pilna a om, huan nite sauna ah theihsiamna a om hi.

¹³Amah kiangah pilna leh hatna a om; aman thupha leh theihsiamna a nei.

¹⁴Ngaiin, a kai puka, a kilam nawn theikei ding; mihing a khak binga, kuaman a hong theikei ding.

¹⁵Ngaiin, tui a chinga a kang; a khahkhiaa lei a tum vek.

¹⁶A kiangah hatna leh pilna a oma; khema omte leh khempa amaha ahi.

¹⁷Thuhilhmite lohsamin a pi manga, huan vaihawmmite mihaiin a bawl hi.

¹⁸Kumpipate kolte a suta, huan kawnggakin a kawng uh a gak hi.

¹⁹Siampute lohsamin a pimanga, huan mi hatte a zou hi.

²⁰Muante thugen a suana, upate theihsiamna a la mang hi.

²¹Lalte tungah muhsitna a buaka, mihatte kawnggak a phel hi.

²²Mial akipanin thil thukte a mukhiaa, huan sihna limliap khovakah a honla khia hi.

²³Namte a pungsaka, huan amau a hihsia: namte a theh-jaka, huan a lakhawm nawn hi.

²⁴Leia mite hausate lungtang a la manga, huan gamdaia lampi omlouhna ah amau a vakvai sak hi.Vakna beiin khomial ah a mai ua, huan zukhammi bangin amau a hoisak hi.

²⁵Vakna beiin khomial ah a mai ua, huan zukhammi bangin amau a hoisak hi.