Read Paite Job 16 Bible Online

Job 16 - Paite bible

Job 16

¹Huan Jobin a dawnga, hichiin a chi a:

²Huchibang thil tampi ka zata hi: lungmuanmi chimtakhuai ngen na hi uhi.

³Thu bangmahlouten tawp a nei ding uam? ahihkeileh dawng dinga nang honhihheh bang ahia?

⁴Nou bangin kei leng ka pai thei sam hi; na kha uh ka kha muna om hileh, noute dema thute kaikhawma, ka lu hon sinkhum thei ding hi vengin.

⁵Himahleh ka kamin nou kon hatsak dinga, ka muka muannain na lungkhamna uh kon nem ding.

⁶Thu gen mahleng, ka dahna nepin a om keia: huan doh mahleng, hihnopin ka oma hia?

⁷Himahleh a honchimtak saktaa: ka lawmte tengteng na hihgamta hi.

⁸Huan kip takin na honlena, huai tuh kei demna theihpihna ahi: huchiin ka gawnna kei demin a thoua, ka mai tangah a theisak hi.

⁹A hehnain kei a honbot keka, a honsawi hi; a ha a hon gawi khuma: ka tungah ka galin a mit a tathiam hi.

¹⁰A kam uh lianpiin a honkat khum ua; simmoh takin biang ah a honbeng uh: kei dou dingin a kikai khawm ua.

¹¹Pathianin pathianlimsakloute kiangah a honpe khiaa, migiloute khut ah a honpai khia hi.

¹²Om nuamin ka om, huan a honkitam jaksaka; ahi, ka ngawngin a honmana, a honpai nen hi: a muitum dingin a hontung tou lai hi.

¹³A thalkapmiten ka kim ka velah a hon um ua, ka sisanguite a bottata, a hawi kei; leiah ka sinkha a sung khia hi.

¹⁴Siatna tungah siatnain a honsesaka; galhat bangin ka tungah a tai.

¹⁵Ka vun tungah saiip ka khuia, leivui ah ka kingata hi.

¹⁶Kahnain ka mai a hoihta keia, ka mitvunte ah sihna limliap a om hi;

¹⁷Ka khut ah hiamgamna omkei mahleh, huan ka thumna siangthou mahleh.

¹⁸Aw lei, ka sisan khuh ken, huan ka kahnain khawlmun neikei hen.

¹⁹Tu mahmahin, Ngaiin, a hontheihpih van ah a oma, kei hontheihpihpa tungsangah a om hi.

²⁰Ka lawmten honnuihsan ua, himahleh ka mitin Pathian lamah khituite a sungkhia hi;

²¹Huchia Pathian laka mihing dikna a letkip theiha, a inveng laka mihing tapa dikna, a letkip theihna dingin:Kum tawm a hongtun chiangin lah ka kik nawn louhna ding lampi ah ka pai ta ding ahi ngala.

²²Kum tawm a hongtun chiangin lah ka kik nawn louhna ding lampi ah ka pai ta ding ahi ngala.