Read Paite Job 19 Bible Online

Job 19 - Paite bible

Job 19

¹Huan Jobin a dawnga, hichiin a chi a:

²Bangtan ka kha hihbuaia, thutea honhihjan gawp ding na hi ua?

³Hiai sawmvei tak na honkouta ua: ka tunga giloutaka na hih uh na zum kei ua.

⁴Huan na na paikhialta mawng leng maw, keimah kianga ka diklouhna om gige hi.

⁵Kei demin nou kiliansak petmah ve nuchin, ka minsiatna ka tungah gen ven uchin:

⁶Pathianin ka thu ah honzouta chih tuin thei un, huan a lenin a honum suak hi.

⁷Ngai un, Hiamgamna, chiin ka kikou khiaa, himahleh jakin ka om kei: panpih deihin ka kikoua, himahleh vaihawmna a om kei hi.

⁸Ka pai theihlouhna dingin ka lampi a um a, huan ka paina dingte ah khomial a koih hi.

⁹Ka thupina honsuahsaka, ka lu akipan lallukhu a la.

¹⁰Ning chitengah a hon hihniama, ka mangta hi: huan, sing bangin ka lametna a bot khia.

¹¹Ka tungah a hehna leng a soua, amah adingin a galte laka khat bangin a honsim hi.

¹²A sepaihpawlte a hongkuan khawm ua, ka siatna dingin a lampi uh a bawl uh, huan ka puanin kimvelin puanin a kai uh.

¹³Kei akipanin ka unaute gamlapi ah a koiha, ka mel-theihte kei akipanin a mituam vekta uh.

¹⁴Ka tanauten a honjuausanta ua, huan ka lawm theihngeiten a honmangngilhta uh.

¹⁵Ka in tengte leh, ka sikhanuten, mikhual a honsa ua: a mitmuh un namdangmi ka hi.

¹⁶Ka sikha ka sama, a hondawng kei, ka kamin amah khem mahleng leng.

¹⁷Ka ji adingin muhthadahhuai ka hia, ka nu tate adingin, kihhuai.

¹⁸Naupang neute nangawnin a honsimmoh ua; ka thoh leh, ka siatna dingin thu a gen uhi.

¹⁹Ka lawm gilte tengtengin kei a honhua ua: huan amau ka itte ka tungah a hel uh.

²⁰Ka guh ka vun ah leh ka sa ah a belh bikbeka, huan ka ha vun toh ka suakta hi.

²¹Honhehpih un, honhehpih un, Aw nou ka lawmte; Pathian khutin kei a honkhoihta ngala.

²²Bangdia Pathian banga nou honsawi na hi ua, ka saa bangdia lungkim lou na hi ua?

²³Aw ka thute tuin gelhin om le uh aw; Aw laibu ah kigelh lut le aw;

²⁴Sik leh ngen gelhna zumin khantawn adingin suangpia gelh hile uh aw;

²⁵Himahleh ka Tanpa a hing chih leh, leitungah a tawp chiangin a ding ding chih ka thei hi:

²⁶Huan ka vun huchibanga hihsiata a om khit nungin, himahleh ka sa akipan Pathian ka mu ding hi:

²⁷Keimah adingin amah keimahmahin ka mu dia, huan ka miten a en dia, midang hi louin. Ka sungah ka lungtang a sidangta hi!

²⁸Amah bangchibangin i sawi ta phet diamah; na chih uleh, kei ah thu bul muhin a om chih theiin;Namsau kihta un: hehnain lah namsau gawtnate a hontun ngala, huchia vaihawmna a om chih na theih theihna ding un.

²⁹Namsau kihta un: hehnain lah namsau gawtnate a hontun ngala, huchia vaihawmna a om chih na theih theihna ding un.