Read Paite Job 22 Bible Online

Job 22 - Paite bible

Job 22

¹Huchiin Elipha Teman miin a dawng a, hichiin a chi a;

²Mihing Pathian adingin a phatuam thei diam? Kuapeuh a pil amah mah adingin a phatuam ngeia.

³Na diktat, Thilbangkimhihthei adinga kipahna ahi himhim hia? ahihkeileh na lampite na hoihkim sak, amah dia punna hia?

⁴Nang a honsalha, vaihawmnaa nang toh a lut, amah na kihtak jiak hia?

⁵Na gitlouhna a lian kei maw? Na thulimlouhna ah leng tawpna a om sam kei hi.

⁶Bangmahlou dingin na unau thuchiamte na lata ngala, huan vuaktangte a puansilh uh na suahsaka.

⁷Gim adin dawn dingin tui na pe kei a, huan gilkial adin tanghou na it hi.

⁸Himahleh mi hat in gam a neia; mi deihthoh a sungah a teng hi.

⁹Khutvuakin meithaite na sawl manga, huan pabeite khutte hihtanin a om hi.

¹⁰Huaijiakin thangte na kim ah a om ua, huan lau guihnain nang honhihbuai hi.

¹¹Ahihkeileh khomial, na muh theihlouh, leh tui tampiin nang a honkhuh hi.

¹²Van sangah Pathian a om ka hia? huan aksite sandan en in, sang hina tel uh e;

¹³Huan nang, Pathianin bang a theia? khomial bikbek lakah vai a hawm thei dia hia?

¹⁴Amaha dingin meipi sahte, a muhlouhna din, khuhna ahi a; huan van kum sungah a vak ahi, na chi.

¹⁵Mi giloute totsa lampi lui na kem ding hia?

¹⁶A hun ma ua lak manga oma, a kingakna ua tuiluang banga butkhiak a omte:

¹⁷Pathian kianga, Hon pai mangsanin; huan eia dingin Thilbangkimhihtheiin bang a hih theia? chite.

¹⁸Himahleh a inte uh thil hoihin a dimsak ua: himahleh migiloute thugen kei akipan a gamla hi.

¹⁹Mi diktatten a mu ua, a kipak ua; huan mihoihten amau a nuihsan ua,

²⁰Chihtaktakin ei dou dinga thoute sat khiakin a om ua, huan amaute laka omlai meiin a hulgaita, chiin.

²¹Tuin amah kimeltheihpih inla, muang takin omin: Huaiah hoih na kiangah a hongpai ding hi.

²²A kam akipanin dan tuh sangin, ka honngen hi, huan na lungtang ah a thute khol khawmin.

²³Thilbangkimhihthei kianga na kik nawn leh, lam kipin na om ding hi; na puaninte akipana gamla pia diktatlouhna na koih mang leh.

²⁴Huan na gou leivui ah koih inla, huan luite suangte lakah Ophir dang kaeng;

²⁵Huchiin Thilbangkimhihthei na gou ahi dia, nanga dingin manpha dangka.

²⁶Huchiin Thilbangkimhihthei ah na kipakin, Pathian kiangah na dak tou ding a hih jiakin.

²⁷Amah kiangah na thumna na gen dia, aman a honza ding.

²⁸Thil khat tungah thupukna bawlin thu na pe dia, huan nanga dia hihkipin a om ding hi; huan na lampite ah khovak a tang ding.

²⁹A honsawnpuk chiang un, Thoh touhna a om, na chi ding; huan mi niamkhiak aman a hondam ding hi.Amah a hoihlou nasan a suaktasak dinga: ahi, na khutte sianna jiakin amah suangtaksakin a om ding.

³⁰Amah a hoihlou nasan a suaktasak dinga: ahi, na khutte sianna jiakin amah suangtaksakin a om ding.