Read Paite Job 23 Bible Online

Job 23 - Paite bible

Job 23

¹Huchiin Jobin a dawnga, hichiin a chi a:

²Tuni mahmahin ka phunna helhuai ahi: ka thuakna ka mauna sangin a gikjaw hi.

³Aw amah ka muhna mun thei lengla, a tutna mahmah ah hoh thei leng aw!

⁴A maah ka thu ka bawlhoih dia, thugentein ka kam dimsak ding hi veng.

⁵A honna dawnna ding thute ka thei dia, huan bang ahia ka kianga a gen ding ka theisiam ding.

⁶A thilhihtheihna letnain kei a honsel diam? Ii; himahleh kei a honlimsak ding hi.

⁷Huailaiah mi dikin amah thu a sutpih thei dia; huchiin ka vaihawmmi akipan suahtaksakin ka om tawntungta ding hi.

⁸Ngaiin, mailam juanin ka paia, himahleh huailaiah a om kei; huan nunglam juanin, himahleh amah ka mu kei hi.

⁹Veilam pangah, na sep laiin, himahleh amah ka mu theikeia: taklam pangah a bu, amah ka muh theihlouhna dingin.

¹⁰Hiamhleh ka zuih lampi a thei a; a hon zeet laiin, dangkaeng bangin ka honsuakkhe ding hi.

¹¹Ka khein a kalsuante a len kipa; a lampi ka juita, ka pial kei.

¹²A mukte thupiak akipan ka pai kik keia, a kama thute a kiphamoh ka an sangin ka kholkhawm jaw hi.

¹³Himahleh amah lungsim khek lou ahia, amah kuan a hei thei dia? a khain a deih, huai mah a hih jel hi.

¹⁴Kei dia sehsa a hih ngala: huan thil huchibang tampi a kiangah a om hi.

¹⁵Huaijiakin a omna ah ka buaia; ka ngaihtuah chiangin amah ka lau hi.

¹⁶Pathianin lah ka lungtang a bahsakta ngala, huan Thilbangkimhihtheiin a honhihbuaita hi.Khomial main satkhiakin ka om ngal keia, ka maia kipan khomial sah leng a khuh sam kei hi.

¹⁷Khomial main satkhiakin ka om ngal keia, ka maia kipan khomial sah leng a khuh sam kei hi.