Read Paite Job 27 Bible Online

Job 27 - Paite bible

Job 27

¹Huchiin Jobin a gentehna thu apan nawna, huchiin a chi a:

²Pathian a hing bangin, aman ka dikna a la manga; huan Thil bangkim hihtheiin, aman ka kha a hih buai a;

³Ka hinna ka sunga a om laiteng, huan Pathian hu ka nakvanga a om laiteng?

⁴Ka mukten thutaklou a gen kei ding, ka leiin leng khemna thu a gen kei ding.

⁵Siam kon tansak mahmah kei ding hi: ka sihma tan ka takna kei akipanin ka koih mang kei ding hi.

⁶Ka diktatna ka len chintena, ka khah kei ding hi: ka damlai teng ka lungtangin kei honkou kei ding.

⁷Ka melma gilou bang hi henla, huan kei dou dia thou mi diktatlou bang hihen.

⁸Punna muta mahleh, Pathian limsakloumi lametna, Pathian in a kha a lak mang ngalin, bang ahia?

⁹A tunga buaina a tunin, a kikou Pathian in a za diam?

¹⁰Thil bangkim hihthei ah nuam asa in, chiklaipeuhin Pathian sap nuam asa diam?

¹¹Pathian khut tungtangah nang ka honsinsak ding; Thil bangkim hihthei kianga om ken ka im kei ding hi.

¹²Ngai un, noute tengteng in huai na muta ua; ahihngalleh, bangdia bangmahlou honghi vek na hi ua?

¹³Hiai Pathian laka mi gilou tantuan leh, nuaisiahhat mite goutan, Thil bangkim hihthei akipana a muh uh ahi.

¹⁴A tate a pun uleh, nuamsau ading ahi; huan a suan tanghouin a tai kei ding hi.

¹⁵A nunga omlaite hi lengin a vuidia, huan a meithaite un kahna a bawl kei ding uh.

¹⁶Dangka leivui bangin vum touin, puansilh tungman bangin bawl mahleh;

¹⁷A bawl thei, himahleh mi dikten a silh ding, huan mi hoihten dangka pen a hawm ding hi.

¹⁸Inn a lam tuh maimom len bang ahia, vengmiin a bawl aidakbuk bang ahi.

¹⁹Hausa inn a luma, himahleh khopin a om kei ding; a mit a haka, huan a om kei.

²⁰Tuite bangin launaten amah a pha a; janin huihpiin amah a gu mang hi.

²¹Suahlam huihin amah a po manga, huan a pai mang hi; huchiin a mun akipanin amah a mut mang hi

²²Pathianin lah amah nakpiin a lawn dia, a dawm kei ding: a khut akipan taimang a ut ding.Miten amah a khut uh a bet khum ding ua, huan a mun akipanin amah a nuihsan khe ding uhi.

²³Miten amah a khut uh a bet khum ding ua, huan a mun akipanin amah a nuihsan khe ding uhi.