Read Paite Job 32 Bible Online

Job 32 - Paite bible

Job 32

¹Huchibangin hiai mi thumte Job dawn a tawpta ua, amah mit a diktat a hih jiakin.

²Huailaiin Buz mi Barakel tapa Elihu hehna a kuangkhia a, Ram innkuana mi: Job tungah a hehna kuangkhiaa, Pathian hizo loua amah siam a kitansak jiakin.

³A lawm thumte tungah leng a hehna a kuangkhiaa, dawnna ding neiloua, hinapia lah Job a mohpaih jiak un.

⁴Amah sanga a upatjawk jiak uh, Job kianga thugen dingin Elihuin a ngak a.

⁵Huan hiai mi thumte kama dawnna a om kei chih a theihin, a hehna a kuangkhia hi.

⁶Huchiin Buz mi Barakel tapa Elihuin a dawnga: Ka naupanga, huan nou na upa mahmah uh; huaijaikin ka daia, ka lungsim ka hon ensak ngam kei hi.

⁷Huchiin ka chi, Niten thu a gen ding uh, huan kum tampiin pilna a sinsak ding hi.

⁸Himahleh mihing lungsim a oma, huan Thilbangkimtheiin amaute theihsiamna a pia hi.

⁹A pilte mi thupite ahi kei ua, vaihawmna theisiamte leng upate ahi sam kei uh.

¹⁰Huaijiakin, hongngaikhia un; ken leng ka lungsim ka ensak ding, ka chi.

¹¹Ngai un, na thute uh ka ngaka, gen ding na zon khiak lai un, na thusutte uh ka ngaikhia.

¹²Ahi, kon limsaka, huan, ngai un, kuamah Job thuzoh zou na om kei uh, ahihkeileh na lak uah, a thute dawng.

¹³Pilna I muta, chi lou dingin pilvang un; mihing hilouin Pathianin amah a zou thei hi:

¹⁴Aman lah kei siatna dingin a thute ahihkeia; ken leng nou thugente in amah ka dawng sam kei ding.

¹⁵Lamdang asa ua, a dawng nawnta kei uh; gen ding thu khat leng a neikei uh.

¹⁶Thu a genlouh jiak uh, a ding kinken ua, a dawn nawnlouh jiakin ka ngak diam?

¹⁷Ken leng ka dawn ding ka dong hia, ka lungsim ka ensak sam ding hi.

¹⁸Thuin lah ka dim ngala; ka sunga khain a honsawl teitei hi.

¹⁹Ngai un, ka gilpi pawtkhiakna neilou uain bang ahi; khuainulhaite bangin puakjak dingin mansain a om hi.

²⁰Ka halh theihna dingin, ka pau ding; ka mukte ka hong dinga ka dawng ding hi.

²¹Mihing himhim mihinna honzahtaksak kei un, ka hon ngen hi; kuamah kiangah leng maitangphatna min ka pe ding hi.Maitangphatna minte piak ding ka thei ngal keia; huchilouinjaw kei a honla zok ding hi.

²²Maitangphatna minte piak ding ka thei ngal keia; huchilouinjaw kei a honla zok ding hi.