Read Paite Job 34 Bible Online

Job 34 - Paite bible

Job 34

¹Huailouin Elihuin a dawnga, hichiin a chi a:

²Ka thute ja un, nou mi pilte; nou theihna neite, bil hondoh un.

³Dangtawngin ann achiam bangin, bilin thute a enchain hi.

⁴A dik eia dingin I tel ding uh; I lak ua hoih bang ahia I thei ding uh.

⁵Job in lah, Ka dika, huan Pathianin ka dikna a la mang, a chi ngala:

⁶Ka dikna huchin hita mahleh juautheia sim ka hia; tatlekna bei himahleng, ka liamna hihdam theihlouh ahi.

⁷Muhsitna tui banga dawn bei, Job bang mihing kua ahia?

⁸Thulimlou nasemmite toh a hona pai, mi giloute toh om khawmmi.

⁹Aman lah, Pathian laka ka kipahna ding bangmah ka lohtak kei, a chi ngala.

¹⁰Huaijiakin, nou theisiammite, honngaikhia un: Pathianin, gilou bangchiin a hih ngei mahmah dia; huan Thilbangkimhihtheiin thulimlou bangchiin a hih mahmah dia.

¹¹Aman lah mihing thilhih amah kianga pe kik ding hi ngala, huan mi chiteng a lampite kianga pekik ding ahi.

¹²A hi, mohkhuksakna thu ah, Pathianin giloutakin a hih kei dia, Thilbangkimhihtheiin leng vaihawmna a hihse sam kei ding hi.

¹³Kuan ahia amah leitunga heututna pia? Ahihkeileh khovel pumpi kuan ahia a thua koih?

¹⁴Mihing tunga a lungtang a ngaka, amah lama a kha leh a hu a lakkhawm leh;

¹⁵Sa tengteng a mangthang khawm ding ua, huan mihing leivui a suak nawn ding hi.

¹⁶Theihsiamna na neih leh, hiai ja in: ka thute aw ngaikhia in.

¹⁷Mi thudik huaiin vai a hawm ding hia? Huan dik leh hat amah na mohpaih ding hia?

¹⁸Kumpipa kianga, Na hoih kei chih a kilawm hia? Ahihkeileh miliante kianga, Na gilou uh? Chih.

¹⁹Mi lalte mi hinna zahtak loua, mi genthei sanga mi hausate limsak zote kianga chih kilawm sem lou ding hia? Amaute tengteng lah a khut nasep ahi ngal ua.

²⁰Mitphiat kallouin a si ua jankim lai mahmahin; mite a ling ua a pai mang ua, mihingkhut hilouin mihatte lakmangin a om uhi.

²¹A mitte lah mihing lampite tungah a oma, huan a painate tengteng a mu hi.

²²Thulimlou nasemmite buk theihna ding, khomial a omkei a, sihna limliap leng a om sam kei hi.

²³Vaihawmna a Pathian maa a pai dingin, mihing a ngaihtuah lailai a kiphamoh ngal keia.

²⁴Lamte theihphak vual louhin aman mi hatte a hihjan veka, a mun uah midangte a tungkhia hi.

²⁵Huaijiakin a nasepte uh a thei hi; janin amau a lumleta, huchiin hihsiatin a om uhi.

²⁶Midang mitmuh mahmahin mi giloute bangin amau a gawt hi.

²⁷Amah zuihna akipan a pialkhiak ua, a lampitea a koi mahmah a limsaklouh jiakun:

²⁸Huchiin genthei kahna a kiang tung dingin a bawl ua, huan gimthuak kahna a ja hi.

²⁹Amah napau kei leh, huchiin kuan siamlouh a tangsak dia? huan aman a mai a sel leh, huchiin amah kuan a mu thei dia? namte kianga hih hiam, ahihkeileh, mihing kianga hih hiam zong a kibang hi:

³⁰Huchia pathiantheilou min vai a hawm louha, huchia mite thanga awksak ding kuamah a omlouhna dingin.

³¹Kuapeuhin Pathian kiangah, Gawtna ka thuakta, ka gilou nawn kei ding,

³²Ka muh louh nang honsinsak in: gilou ka hih aleh ka hih nawn kei ding, a chi uhia?

³³A thukna na deih bangin a om diam, huchia na nial? Kei hilouin, nang na tel ngeingei ding lah ahi ngala.

³⁴Theisiammiten ka kiangah, A hi, a chi ding uh, a honja mi pil chitengin,

³⁵Jobin theihna beiin thu a gena, huan a thute pilna bei ahi uh.

³⁶Mihaite banga a dawnna thu ah, a tawp chiangin Job tungtang ngaihtuah le uh.Aman lah a khelhna ah helna a behlapa, I lak uah a khut a benga, Pathian kalhin a thute a pungsakta ngala.

³⁷Aman lah a khelhna ah helna a behlapa, I lak uah a khut a benga, Pathian kalhin a thute a pungsakta ngala.