Read Paite Job 6 Bible Online

Job 6 - Paite bible

Job 6

¹Huchiin Jobin a dawnga, hichiin a chi a:

²Aw ka lungjinna kibuk peuhmah leh, huan ka tuahsiatna khaina ah kikoih khawm peuhmah leh:

³Tuin tuipitea piaunel sangin a gikzo ding: huaijiakin ka thute leng a huham hi.

⁴Thilbangkimhihthei thalte lah ka sungah a om ngala, gu huai akipana ka khain a dawn vek: Pathian mulkimhuainate kei dou dingin a kivual petmah uhi.

⁵Loupa a neih laiin gam sabengtung a ham hia? ahihkeileh a annekding tungah bawngtal a ham hia?

⁶Gim neilou chi tel louin a kine thei dia hia? ahihkeileh aktuida ah limna mawngmawng a om hia?

⁷Ka khain amaute a khoih nuam kei; kei dingin an kihhuai bang ahi uh.

⁸Aw ka nget tang thei leng jaw; ka thil deih Pathianin honphal lejaw:

⁹Kei honhihgawp dingin Pathian deihlam hi lai henla; a khut zanin, kei honsat khe mai leh:

¹⁰Huchiin lungmuanna ka nei lai mai dia; ahi, dawmlou natna ah ka kipak ding: Mi Siangthou thute lah ka kitheihmohbawl ngal kei a.

¹¹Ka hatna bang ahia, ka ngak ding? huan ka beina bang ahia, ka kuhkal ding?

¹²Ka hatna, suangte hatna hi hia? ahihkeileh ka sa dalsik hia?

¹³Keiah panpihna a om het kei hilou hia, huan kei akipan theihsiamna hawlmangin?

¹⁴Bah dia mansaa om kiangah a lawmin Siamna a etsak ding ahi kei mo; huchilou-in Bangkimhihthei kihtakna a tawpsan ahi kei ding mo.

¹⁵Luita bangin ka unaute a lepchiah uh; luita mangthang luanna bangin.

¹⁶Huai tuh tuikhalin a voma; huai ah vuk a kisel.

¹⁷A lum hun chiangin a tuimang ua, a sat chingin a mun ua kipan a mangthang uh.

¹⁸Huai lampia khualzinte a pial ua, bangmah omlouhna munah a paitou ua, a mangthang uh.

¹⁹Tema khualzinten a zong ua, Seba pawlten a lamen uh.

²⁰A kilamet hangun a zahlak uh; huai lamah avapai ua a hawmsuak uh.

²¹Tuin lah bangmah na hi ngal kei ua; mulkimhuaina na mu ua, na lau uhi.

²²Kei honpia un? ahihkeileh na neihlehlam ua kipanin kei adingin thilpiak lan un, ka chi hia?

²³Ahihkeileh, nuaisiahhatmite khut ahipan hontan un, ka chi hia?

²⁴Hon sinsakin, huan ka dai ding: ka lamhaihna theisiam dingin hon bawlin.

²⁵Dikna thute hat hina mahmah e: Himahleh na miselnain bang a selphoua?

²⁶Thute selphou dinga um na hi uh hia? Chimoh mi thugente huih bang ahi chih theiin.

²⁷A hi, paneiloute tungah ai na san ding ua, na lawm uh sumsinna vanin na bawl ding uh.

²⁸Tuin huaijiakin hehpihtakin hon en un; na ma uah ka juau ka gen sin ngal kei a.

²⁹Kik nawn un ka honngen ahi, diklouhna om kei hen; ahi, kik nawn un, ka thu a dik ahi.Ka lei ah diklouhna a om hia? thil hoihlou ka leiin a theikak theikei dia hia?

³⁰Ka lei ah diklouhna a om hia? thil hoihlou ka leiin a theikak theikei dia hia?