Read Paite Psalms 104 Bible Online

Psalms 104 - Paite bible

Psalms 104

¹Ka hinna aw, TOUPA tuh phatin, TOUPA ka Pathian aw, nang na thupi mahmaha; pahtawinain leh thupinain na kithuam hi.

²Nang vak tuh puan bangin na silha; vante puanintung bangin na kai palha;

³Aman a dantan sunggil kalvaite tuite khawngah a khunga; meipi tuh kangtalaiin a bawla; huih kha tungah a vak hi:

⁴A angelten tuh huihina suaksaka; a nasemte tuh meikuang juajuain a suaksak hi.

⁵Leitung kingaknate tuh na phuma, khantawna lin louhna dingin.

⁶Nang leilung tuh thukpi puan bangin na silhsaka; tuite tang tungah tekhawng a om pheuphou hi.

⁷Na taihilhna jiakin a taimanga; na van-ging husa jiakina paimang pahta a;

⁸Tang khawngah a pai tou a, guam ah tekhawng a pai suka, amah dia mun na bawlsakna lamah.

⁹A kan louh dingin gi na khunga, lei tup mang dinga a kiknawn tak louhna dingin.

¹⁰Aman guam ahte khawng luinakte a sawl khiaa; tangkal khawngah a luang hi.

¹¹Huaiten tuh gamsa khempeuh kiangah dawnding a pia ua; Gam sabengtungten a dangtak uh a hihdai uhi.

¹²A dung uah tungleng vasaten omna a nei ua, singbawk lak khawngah a ham uhi.

¹³Aman a dantan tungnung akipanin tangte tuiin a vaka: lei tuh na thilhih gahtein a vaka: lei tuh na thilhih gahtein a tai uhi.

¹⁴Loupa gante adingin a pousaka, haichi tuh mihing zatdin a pousak hi: lei akipan nekding pawtsak theihna dingin:

¹⁵Mihing lungtang kipahsakna uain toh, a mai kilawmsakna ding thau toh, mihing lungtang hihhatna tanghou toh.

¹⁶TOUPA singte tuh a taisak hi; Lebanon tanga sidar sing a suante mah.

¹⁷Huaiah vasaten bu a sep ua: vaiva bel meilah singte a in ahi.

¹⁸Tang sangte sathak ading ahi a; suangpite zusapi adingin kihumbitna ahi.

¹⁹Aman kha hunbi theihna dingin a sepa: niin tum hun theigige hi.

²⁰Nang mial na bawla, jan a honghi jel hi, huai hunin gamnuaia sa khempeuhte a ta khia uhi.

²¹Humpinelkai hatlaiten a sa mat ding uh, humham khumin, Pathian kiang akipan a nekding uh a zong uhi.

²²Ni suaka, a pai mang uh, a omna khuk chiat uah a lum jel uhi.

²³Mihing tuh na semin apawta, nitaklam tanin a semgim hi.

²⁴TOUPA aw, na thilhihte tam hina tele! Pilnain na bawl vek ahi; leilung na hauhsaknain a dim hi.

²⁵Pamah tuipi a oma, thupi, lianpi tak, huaiah thil bokvaka pai sim zohlouh a oma, sa neu leh sa liante.

²⁶Huailaiah meilong liante a pai uh; huailaiah ole a om, a sunga mawl dinga na bawl ngei.

²⁷Huai tengtengin a honngak chiat ua, a huntaka a ann uh na piak jelna dingin.

²⁸A kiang ua na piak peuhmah a tawm ua; na khut ua jaka, hoihnain a tai jel uhi.

²⁹Na mai na sela, a lungjing ua, a hatna uh na laksaka, a si ua, amau leivui ah a kik nawn uhi.

³⁰Na kha na sawl khiaa, siamin a om jel uhi; leitung leng na bawl thak nawn jel hi.

³¹TOUPA thupina tuh khantawin om henla; TOUPA tuh a nasepah nuam hen:

³²Aman lei a ena, a ling nak; tangte a khoiha, a khu khe nak hi.

³³Ka damsung tengin TOUPA pahtawiin la ka sa dinga: ka hinlai tengin ka Pathian phatin la ka sa ding hi.

³⁴Ka ngaihtuahna tuh amaha dingin khumtak hi hen: kei tuh TOUPA ah ka nuam ding hi.Mi khialte lei akipanin hihmanin om uhenla, mi gilou-saloute om nawnta kei uhen! Ka hinna aw, TOUPA phatin! TOUPA tuh phat un!

³⁵Mi khialte lei akipanin hihmanin om uhenla, mi gilou-saloute om nawnta kei uhen! Ka hinna aw, TOUPA phatin! TOUPA tuh phat un!