Read Paite Psalms 106 Bible Online

Psalms 106 - Paite bible

Psalms 106

¹TOUPA tuh phat un, Aw, TOUPA kiangah kipahthu hilh un; amah lah a hoih ngala: a chitna leng khantawna om ding ahi ngala.

²Kua ahia TOUPA thilhih thupitakte gen theia a phatna tengteng theisak vek thei?

³Vaihawmna kem hoihten nuam a sa uhi, chiklai peuha leng diktat taka hihmi toh.

⁴TOUPA aw, na mite na deihsaknain hontheigige inla, aw, na hotdamna toh hongvehin;

⁵Na mi telte hamphatna ka muhtheiha, na namte kipahna ah ka nopsak theiha, na gouluahte toh ka suan theihna dingin.

⁶Ka pipute utoh thil ka na hihkhial ua, thilgilou ka hih ua, gilou takinka hihta uhi.

⁷Ka pipute un Aigupta gama na thillamdang hihte a theisiam kei ua; na chitna thupitak a theigige ta kei ua; tuipi ah a hel zota ua, Tuipi San ah.

⁸Huchi pipiin leng a mah minjiakin amau a hondamtaa, a thilhihtheihna thupitak a theihsakna dingin.

⁹Tuipi San a taia, huchiin a kangta a; huan amau gamdaia pi paisuak bangin tui thukte ah a pi paisuakta hi.

¹⁰Amau homi khut akipan a hondama, melma khut akipan a tanta hi.

¹¹Tuiten amau doute a khuh khina, khat leng dama pawt a om ta kei uhi.

¹²Huai laiin a thute a gingta ua; a phatna la a sa uhi.

¹³Himahleh a thilhihte tuh a mangngilh zok ua; a lunggelna tuh a ngak ngamta kei uhi;

¹⁴Gamdai ah thil a lungulh mahmah ua, gam keu ah Pathian a zeetta uhi.

¹⁵A thil nget uh a pia a; himahleh a hinna uah gawnna a lutsakta hi.

¹⁶A giah mun uah Mosi a hazata ua, TOUPA mi siangthou Aron toh.

¹⁷Lei tuh a kamkaa, Dathan a valhta, Abiram pawlte tuh a khuh khinvek hi.

¹⁸A pawl lak uah mei hihkuanin a hongoma, meikuang ah mi gilousaloute a kangmangta uhi.

¹⁹Horeb tang ah bawngnou lim a siam ua, a lim sun tuh a beta uhi.

²⁰Huchibangin a thupina uh bawngtal loupa ne bangphet a suaksakta uhi.

²¹Pathian a hondampa uh a mangngilhta ua, Aigupta gama thil thupi taktak.

²²Ham gama thillamdangte, Tuipi San dung athil mulkimhuaite hihte.

²³Huaijiakin, a hihmang kha dinga, chi-a, a hehna hihkik dingin a mi tel Mosi tuh a lutna dingah a maah na ding kei ngial le houh, a hihmang ding chih a gen hi.

²⁴A hi, gam deihhuai tak a ngaineu ua, a thu tuh a gingta nuam kei ua;

²⁵A puanin uahte khawng a phun zota ua, TOUPA aw tuh a ngaikhe nuam kei uhi.

²⁶Huaijiakin amau lamah a khut ajaka, amaute tuh gamdaia a hihpukna ding leh,

²⁷A chi suan dingte uh nam chih laka a hihpuka, gam china a hihjakna dingin.

²⁸Boal-peor lamah a velh ua, misi kianga thil latte tuh a ne samta uhi.

²⁹Huchibangin a thilhihte un amah a hihheh ua; huchiin a tunguah hi honlengta hi.

³⁰Huai laiin Phinehas a dinga, vai a hawma: huchiin hi tuh daihsakin a omta hi.

³¹Huai tuh amah tunga diktatnaa seh ahi, khantawnin suan tengteng tanin.

³²Meribah tuite ah tekhawng leng amah a hihheh ua, huchiin amau jiakin Mosi tungah thilhoihlou a tung hialta hi.

³³A kha tungah a hel ua, a mukin kilawmlou pi thu a gen jiakin;

³⁴TOUPAN a kiang ua hihman thu a piak bangin mipite a hihmang kei ua.

³⁵Nam chih tuh a kihelpih ua, a thilhihte uh tuh a ching jaw ua;

³⁶A milim nate khawng uh a sem ua; huaite tuh amau adingin thang a honghita:

³⁷A hi, dawi kiangah tekhawng a tapate a tanute un a kithoih ua.

³⁸Sisan gensiatbei, a tapate uleh a tanute u sisan ngei a suahta ua, huaitein Kanaan gam milimte kiangah a kithoih uhi; huai gam tuh sisanin a na ninta hi.

³⁹Huchibangin a nasepte ua hihbuahin a om ua, a thilhihte un ang a kawmta uhi.

⁴⁰Huaijiakin TOUPA a mit tungah a thangpaitaa, a gouluah tuh a kih hi.

⁴¹Huchiin amau tuh nam chihkhut ah a paia; amau hoten a tunguah vai a hawmta uhi.

⁴²Amau douten a nuaisiah ua, a khut nuai uah hihneuin a omta uhi.

⁴³Tamveipi amau a humbita; himahleh a lunggelna uah a hel nak uhi, a gitlou a satlouhna uah hihniamin aomta uhi.

⁴⁴Huchi pipiin leng aman, a kikou husa uh a jain, a mangbat uh a limsak ahi.

⁴⁵A thukhun tuh amau a theisak gigea a chitna thupidan bang jelin alungsim a kisikta hi.

⁴⁶Sala pite tengteng tuh amau a hehpihsak hi.

⁴⁷TOUPA ka Pathian u-aw, honhondam inla, nam chih laka kipan honpikhawmin, na min siangthou phat ding leh na phatna suang dingin.TOUPA, Israelte Pathian, phatin om heh, khantawn akipan khantawn phain leng. Mi tengtengin, Amen, chi uhen, TOUPA tuh phat un.

⁴⁸TOUPA, Israelte Pathian, phatin om heh, khantawn akipan khantawn phain leng. Mi tengtengin, Amen, chi uhen, TOUPA tuh phat un.