Read Paite Psalms 107 Bible Online

Psalms 107 - Paite bible

Psalms 107

¹Aw TOUPA kiangah kipahthu hilh un; amah tuh a hoih ngala: a chitna leng khantawnin a om ding ahi ngala.

²TOUPA mi tatten huchibang gen uhen, doumi khut akipan a tatten.

³Gam teng akipan a pi khawma, suahlam leh tumlam, simlam leh mallam akipan tekhawngin.

⁴Gamdaia gam keu lampi ah a vakvak ua; mihing omna khua himhim a mu kei uhi.

⁵Gilkial leh dangtakin a hinna uh a gilsung uah a bahta hi.

⁶Huaitakin a buaina uah TOUPA a sam ua, aman a lungkhamna ua kipanin a humbitta.

⁷Mihing omna khuaa a pai theihna ding un, lampi tangtak ah a pikheta hi.

⁸Aw, mihingten TOUPA a chitna jiak leh, mihing tate tunga a thillamdang hihte jiakin phat himhim le u aw!

⁹Aman hinna thil lunggulh mahmah tuh a taisakin, hinna gilkial tuh vahsak jel ngala.

¹⁰Mial nuaia leh sihna lima tu-a, gimthuakna leh sikkhau a hente mahmah;

¹¹Pathian thu tungahte a hel ua, Tungnungpen lunggel tuh a ngaihneu jiak un:

¹²Aman a lungtang uh sepgimnain a minsakta a; a puk ua, panpihpa ding himhim lah a om ngal kei a.

¹³Huai takin a buaina uah TOUPA a sam ua, aman a buaina ua kipan a pi khia a, a hennate uh a suktat sakta hi.

¹⁴Mial nuai akipan leh sihna lim akipan a pi khia a, a henna uh a suktat sakta hi.

¹⁵Aw, mihingten TOUPA a chitna jiakin leh, mihing tate tunga a thillamdang hihte jiakin phat himhim le u aw!

¹⁶Aman dal kongkhakte tuh a chimsaka, a kalhna sik tawnte tuh a hihtanta ngala.

¹⁷Mi haite a tatlekna jiak un leh, a gitlouh-satlouhnate u jiakin a kihihgim nak uhi.

¹⁸A hinna un nek theih chiteng a kiha; sihna kulh kongkhakte a naih jel uhi.

¹⁹Huaitakin a buaina uah TOUPA a sam ua, aman a mangbatna ua kipanin a hondam jel hi.

²⁰A thu tuh a sawl khia a, amau tuh a damsak jel hi, a mahthatna ding ua kipanin a humbit jel hi.

²¹Aw, mihingten TOUPA a chitna jiakin leh, mihing tate tunga a thillamdang hihte jiakinphat himhim leu aw!

²²Amau kipahthugen kithoihnate tuh lan uhenla, a thilhihte uh lasain hilh uhen.

²³Tuipi-a long liana vapai suka, tui za tak tung khawnga na sem semten:

²⁴Huaiten TOUPA thilhihte leh, tui thupi-a a thillamdang hihte a mu jel uhi.

²⁵Aman thu a pia a, huihpi a nungsaka, huaiin a tuikihawtte tuh a sangsak hi.

²⁶Vanah a pai tou luamluam ua, thukpi ah a pai suk nawn luamluam jel uhi: mangbatna jiakin a hinna uh a zulbei jel hi.

²⁷Zukham bangin a sawi hoihoi ua, a tuan loklok ua, omdan ding himhim a theikei nak uhi.

²⁸Huaitakin a buaina uah TOUPA a sam ua, aman a mangbatna ua kipanin a pi jel hi.

²⁹Huihpi a daisak duama, huchiin a tuikihawtte a dai duam jel hi.

³⁰Huan, a daihtak jiakin a kipak ua; huchiin aman a omna ding uh longkhawlna ah a pi tung jel hi.

³¹Aw, mihingten TOUPA a chitna jiakin leh, mihing tate tunga a thillamdang hihte jiakin phat mahmah le u-aw!

³²Amau tuh mite kikhopna ah amah phat uhenla, upate tutana ah phat uhen.

³³Aman luipite tuh gamdai a suaksak jela, tuinakte leng lei keu a suaksak jel hi.

³⁴Gam hoih tuh gam keu mah leng a suaksak jel, a sunga omte genhak jiakin.

³⁵Gamdai tuh dilin a suaksak jela, gam keu leng tuinak a suaksak jel hi.

³⁶Huaiah gilkialte a omsaka, omna ding khua a bawl ua.

³⁷Loute a neih ua, grep huante a bawl ua, a gah hong pungte a muh theihna ding un.

³⁸Amau tuh vual a jawla, huchiin nakpi taka hihpunin a om ua; a gante uh a kiam a phal kei hi.

³⁹Huan, nuaisiahte, gimthuaknate, lungkhamna te jiakin a kiamta hiaihiai ua, a kun ngiungiauta leuleu uhi.

⁴⁰Aman miliante tungah muhsitna a sungbuaa, gamdai, lampi himhim omlouhna ah a vak saksaka.

⁴¹Himahleh gentheite tuh gimthuakna akipanin mun sangah a khatou hi, gan hon bangin inkuanpihte asiamsak hi.

⁴²Mi diktatten huai a mu ding ua, a kipak ding uh; thulimlouhna tengtengin a kam a hum ding hi.Kuapeuh pilin huaite a kem hoih ding ua, TOUPA chitnate a ngaihtuah ding uhi.

⁴³Kuapeuh pilin huaite a kem hoih ding ua, TOUPA chitnate a ngaihtuah ding uhi.