Read Paite Psalms 109 Bible Online

Psalms 109 - Paite bible

Psalms 109

¹Ka phat Pathian aw, dai nilouh ken:

²Migilou-salou kam leh kam khemhat tuh ka tungah a hang ngal ua: amau tuh lei juautheiin ka kiangah thu a gen uhi.

³Huatna thuin honum suak ua, bangmahlouin a hondou uhi.

⁴Ka it jiakin a hondoute a honghita uhi: himahleh kei jaw thum thum dingin ka kipe chinten hi.

⁵Aman thil hoih tuh thil gilouin honthuk ua, ka itna tuh huatna mahin a honthuk uhi.

⁶Nang a tungah mi gilou koih inla: a tak lamah hekmi ding hen.

⁷Vaihawmsaka a om chiangin siamlouh tangin pawt henla: a thumna tuh khelhna ah suak hen.

⁸A damsung nite tuh tom henla; a heutu hihna midangin tang hen.

⁹A tate tuh pa louin om uhenla, a ji mahleng meithaiin om hen.

¹⁰A tate tuh mi vakvai honghiin, khutdoh uhenla; a nekding uh a mun gamsiate ah zong uhen.

¹¹A pung delha dangka leitawisakin a neih tengteng laksak vek henla; mikhualten a sepgim gah lok uhen.

¹²A tunga chitna langsak jel ding kuamah om sam kei uhenla; a ta paneiloute hehpihpa ding kuamah om kei hen.

¹³A suante hihmanin om uhen la; khangthak hongom nawnah a min uh nul mangin om hen.

¹⁴A pipute uh gitlouh-satlouhna TOUPA kiangah theigigein om henla: a nu khelhna tuh nul mangin om kei hen.

¹⁵Huaite tuh TOUPA maah om gige heh. Aman a mau theihgigena lei akipan a hihmang theihna dingin.

¹⁶Chitna latsak nadan a theihlouh ua, mi genthei tagah leh khasiate hihlup tuma a sawi zosop jiak un:

¹⁷A hi, mi hamsiat tuh a utlam ahi a, huchiin amah tungah a hongtunga: mi vualjawl tuh a kipahlam ahi keia, huchiin amah gamlat piin a om hi.

¹⁸Puanak tual silh bangin hamsiatnain a kivana, huai tuh a gilsung khawngah tui bangina luta, a guh khawngah thau bangin a leng lut hi.

¹⁹Huai tuh amah a dingin silh gige puansilh bangin om henla, a kigak jelna kawnggak mahleng hi hen.

²⁰Huai tuh hondoute leh ka hinna gensete TOUPAN a thukna ahi.

²¹Himahleh, TOUPA Pathian aw, nang na min jiakin honhehpih inla: na chitna a hoih jiakin honhumbit in.

²²Genthei leh tagah tak ka hia, ka lungtang tuh ka gilsungah liamin a om ngal hi.

²³Lim kiamlam bangin ka manga: khaupe bangin mutlengin ka om hi.

²⁴Ka khukte ann ngawl jiakin a hatta keia; ka sain thau himhim a puta kei hi.

²⁵Amau gensiat ka nahita a; honmuh tak un a lu uh a sing jel uhi.

²⁶TOUPA ka Pathian aw, honpanpih inla; aw na chitna bang jelin honhondamin;

²⁷Huai tuh na khut ahi, chih a theih ua, TOUPA, nang na hih ahi chih a theihna ding un.

²⁸Amau hamsiat uhen, nang jaw vualjawl jawin: a thoh tak un a zahlak ding ua, na sikha bel a nuamsa ding hi.

²⁹Hondoute zumna puansilh sakin om uhenla, puannak-a kivan bangin amau zahlaknain kivan uhen.

³⁰Ka kamin TOUPA kiangah kipahthu nakpi takin ka gen dinga; ahi, mipi lakah amah ka phat ding hi.Amah tuh tagahte taklamah a dinga, a hinna vaihawmsakte laka hondam dingin.

³¹Amah tuh tagahte taklamah a dinga, a hinna vaihawmsakte laka hondam dingin.