Read Paite Psalms 118 Bible Online

Psalms 118 - Paite bible

Psalms 118

¹Aw, TOUPA kiangah kipahthu gen un; amah lah a hoih ngala: a chitna leng khantawna om ding a hih jiakin.

²A chitna tuh khantawnin a om ding chih, Israelten gen uhen.

³A chitna tuh khantawnin a om ding chih, Aron inkuanpihten gen uhen.

⁴A chitna tuh khantawnin a om ding chih, TOUPA kihtaten gen uhen.

⁵Ka mangbatna akipanin TOUPA tuh ka sama: TOUPAN hondawnga, mun awngthawl ah honomsakta hi.

⁶TOUPA tuh kei lama pang ahi a: ka lau kei ding: mihing in bang a honchih thei dia:

⁷TOUPA tuh kei lama pang honpanpihte laka ahi: huaijiakin hondoute tungah ka thudeihtel tuh ka mu ding hi.

⁸Mihing muan sangin TOUPA a muanna koih tuh a hoihjaw hi.

⁹Mi liante gintak sangin TOUPA a ginna koih tuh a hoihjaw ahi.

¹⁰Nam chihin honum suak ua; amau TOUPA minin ka hihmang ding.

¹¹Amau tuh honum suak ua; ahi, honum suak ua; amau tuh TOUPA minin ka hihmang ding hi.

¹²Khuaite bangin honum suak ua; ling meiluang bangin mih sakin a omuh: amau tuh TOUPA minin ka hihmang ding hi.

¹³Ka pukna dingin honsut ek na tum jualjuala: himahleh TOUPAN a honna panpih geih hi.

¹⁴TOUPA tuh ka hatna leh ka la ahi: ka hotdamna leng a honghita hi.

¹⁵Kipahna leh hotdamna husa tuh midiktatte puanin ah a om nak hi: TOUPA khut taklamin hang takin a hih nak hi.

¹⁶TOUPA khut taklam tuh pahtawiin a om naknaka; TOUPA khut taklamin hang takin a hih naknak hi.

¹⁷Ka si kei ding, ka dam ding hi, TOUPA thilhihte tuh ka theisak zo ding.

¹⁸TOUPAN nakpi takin honthuzoha: sihna kiangah jaw honpe tel kei hi.

¹⁹Diktatna kulh kongkhakte honhonsak un: huaite ah ka lut dinga. TOUPA kiangah kipahthu ka hilh ding hi.

²⁰Hiai tuh TOUPA kongkhak ahi; mi diktatte tuh a lut ding uh.

²¹Na kiangah kipahthu ka gen ding, nang hon dawngin, honhondampa na hita ngala.

²²Inlamte suang deihlouhpen a ning a suang phatuampen ana hita hi.

²³Huai tuh TOUPA hih a hi-a; I mitmuh uah a lamdang ahi.

²⁴Hiai TOUPA in seh tuh ahi, hiaiah i nuam un i kipak ding uh.

²⁵TOUPA aw, hehpih takin hondam inla. TOUPA aw, hehpih takin vangphatna honsawlin.

²⁶TOUPA mina hongpaiin nuam a sa hi: TOUPA in akipanin vual ka honjawl uhi.

²⁷TOUPA tuh Pathian ahi, aman vak a honpia a: kithoihna ding tuh khauhualin khih uhen, maitam ki khawngah mahmah.

²⁸Nang tuh ka Pathian na hi-a, kipahthu ka honhilh dinga: ka Pathian na hi-a, ka honpahtawi ding hi.Aw, TOUPA kiangah kipahthu hilh un; amah lah a hoih ngala; a chitna lah khantawna om ding ahi ngala.

²⁹Aw, TOUPA kiangah kipahthu hilh un; amah lah a hoih ngala; a chitna lah khantawna om ding ahi ngala.