Read Paite Psalms 119 Bible Online

Psalms 119 - Paite bible

Psalms 119

¹Lampia mi hoihkimten nuam a sa uhi, TOUPA dan juiten.

²A thutheihsakte juiten nuam a sa uhi, lungtang tengtenga amah zongten.

³A hi, amau diktatlouhna himhim a hih kei ua: a lampite ah a pai jel uhi.

⁴Nang na thuzohna thute tuh thupiakin non pia a, phatuamngaihtaka ka zuih theihna ding un.

⁵Aw, na thusehte tuh jui dingin ka omdante hihkipin om leh aw;

⁶Huai hun chiangin ka zahlak kei dinga, na thupiakte tengteng khawk ka sak hun chiangin.

⁷Lungtang diktak puin kipahthu ka honhilh ding hi. Na vaihawmna dikte tuh kazil hun chiangin.

⁸Na thuseh tuh ka jui dinga: aw, honpaisan den ken.

⁹Valnouin, bangchin ahia a omdan a hihsiangthou ding? Na thu bang jela a omdan venghoihin.

¹⁰Ka lungtang tengtengin kon zonga; aw, na thupiakte ka paisan jaw phal mahmah ken.

¹¹Na tunga thil ka hihkhelh louhna dingin na thu tuh ka lungtangah ka kem khawm hi.

¹²TOUPA aw, nang nuam nasa hi; na thusehte honzil sakin.

¹³Na kama na vaihawm pawt tengteng ka mukin ka theisakta hi.

¹⁴Na thutheihsak lamah nuam ka saa, hauhsakna tengtenga nuam ka sak bang hialin.

¹⁵Na thuzohna thute ka ngaihtuah ding a, na lampite ka limsak behlap ding hi.

¹⁶Na thuseh tungte khawngah ka kipak dinga: na thu tuh ka mangngilh kei ding hi.

¹⁷Ka hin theihna dinginna sikha tungah hoih takinhihin; huchiin na thu ka jui ding hi.

¹⁸Na dan thu akipan thillamdang ka muh theihna dingin, ka mitte honhihvaksakin.

¹⁹Leiah mikhual ka hi a; na thupiakte ka lakah imken.

²⁰Ka hinna tuh kitam gawpin aoma, chiklai peuha na vaihawmnate a ngaih jiakin.

²¹Mi kisathei, hamsiat thuakte tuh na taihilha, na thupiakte vakmangsan nakte mahmah.

²²Gensiatna leh muhsitna ka kiang akipan la mangin; na thutheihsakte lah ka jui ngala.

²³Mi liante leng a tu ua, honkalh ua; himahleh na sikhain na thusehte a ngaihtuah jaw ahi.

²⁴Na thutheihsakte ka kipahna ahi a, thupha honhilh te ahi uh.

²⁵Ka hinna tuh leivuiah a belh bikbeka; na thu bang jelin honhihhalhin.

²⁶Ka omdante ka hontheisaka, nang non dawnga: na thusehte tuh honzil sakin.

²⁷Na thuzohna lam tuh hontheisiam sakin: huchiin na thillamdang hih thute ka ngaihtuah ding hi.

²⁸Ka hinna lungkham jiakin a tuimang naka: na thu bang jelin honhihhatin.

²⁹Omdan diklou ka kiang akipan lasuan inla; na dan hehpihtakinhonpia in.

³⁰Omdan muanhuai ka tela; na vaihawmnate ka maah ka omsak hi.

³¹Na thutheihsakte ah ka belh chinten a; TOUPA aw, honzahlak sak ken.

³²Na thupiak lamah ka tai dinga, ka lungtang na hihlet hun chiangin.

³³TOUPA aw, na thuseh lampi tuh honensakin; huchiin a tawpphain ka tawn ding hi.

³⁴Theihsiamna honpia in, huchiin, na dan tuh ka kem hoih ding hi, ahi, ka lungtang tengtengin ka jui ding hi.

³⁵Na thupiak lampi-ah honpai sakin, huaiah ka kipak ngala.

³⁶Na thutheihsak lamah ka lungtang kihei sakin, huaihamna lamah hi louin.

³⁷Thil bangmahlou phet enlou dingin ka mit kaihei inla, na lampite ah honhihhalhin.

³⁸Na thu tuh na sikha kiangah hihkipin, huai tuh nangmah launa ahi.

³⁹Keia dia gensiatna ka kihtak tuh la mangin; na vaihawmte lah a hoih ngala.

⁴⁰Ngaiin, na thuzohna thute tuh theih ka ut gigea: na diktatna jiakin honhihhalhin.

⁴¹TOUPA aw, na chitnate tuh ka kiangah hongpai hen, na hotdamna ngei, na thu bang jelin.

⁴²Huchiin, hon gensete dawnna ding ka nei dinga, na thu lah ka muang ngala.

⁴³Huan, thutak thu tuh ka kam akipan lakhe vek kenla; na vaihawmnate lah ka lamen gige ngala.

⁴⁴Huchiin na dan ka jui gige dinga, khantawn khantawnin.

⁴⁵Huan, noplenna ah ka vak dinga; na thuzohna thute lah ka zong ngala.

⁴⁶Na thutheihsak thute kumpipate maah ka gen dinga, ka zum kei ding hi.

⁴⁷Huan, na thupiak, ka it tungte ah ka kipak ding hi.

⁴⁸Na thupiak, ka it lamte ah, ka khutte ka jak dinga; na thusehte tuh ka ngaihtuah ding hi.

⁴⁹Na sikha kianga thuchiam tuh theigigein. Nang non lamet sak jiakin.

⁵⁰Huai tuh ka gimthuakna ah leng ka khamuanna ahi: na thuin lah a honhihhalhta ngala.

⁵¹Kisatheiten nakpitakin honnuihsan ua: himahleh na dan tuh ka pai hoisan kei hi.

⁵²TOUPA aw, nidanglaia na vaihawmte ka theigige a, ka kikhamuan jel hi.

⁵³Lunghihlouhnain nakpi takin hon buak khumta a, mi gilousalou-na dan paisante jiakin.

⁵⁴Ka khualzinna in ah na thusehte ka la ahi ngitnget hi.

⁵⁵TOUPA aw, janchiangin na min ka theigige hi, na dan leng ka jui gige hi.

⁵⁶Huai tuh ka neia, na thuzohna thute ka vom hoih jiakin.

⁵⁷TOUPA tuh ka tantuan ahi a: na thu ka jui ding chih ka gen khinta hi.

⁵⁸Ka lungtang tengtengin na hehpihna ka ngena: na thu bang jelin honhehpihin.

⁵⁹Ka omdante ka ngaihtuaha, na thutheihsak lamah ka kalsuan hi.

⁶⁰Ka kintata, na thupiakte jui dingin ka zekai kei hi;

⁶¹Mi gilou-salou khauhualten hongak lom gigea; himahleh na dan tuh ka mangngilh kei hi.

⁶²Jan laiin kipahthu honhilh dingin ka thou dinga, na vaihawm diktatte jiakin.

⁶³Nangmah laute tengteng leh na thuzohna thute juite lawm ka hi.

⁶⁴TOUPA aw, leilung na chitnain a dim ahi: na thusehte honhilhin.

⁶⁵TOUPA aw, na thu bangin na sikha tuh na hihhoih jel hi.

⁶⁶Ngaihtuah siamna leh theihna honhilhin; na thupiakte lah ka gingta ngala.

⁶⁷Hihhaksate ka om main ka vakmang naka: tunjaw na thu ka juita hi.

⁶⁸Nang na hoiha, thil hoih leng na hiha: na thusehte honhilhin.

⁶⁹Kisatheiten ka tungah juau a phuaktawm ua: ka lungtang tengtengin na thuzohna thute tuh ka vom hoih ding hi.

⁷⁰A lungtang uh sungthau bangin a thaua; Keia bel na dan tungah ka kipak naknak.

⁷¹Na thusehte ka zil theihna dinga hihhaksata ka na om a hoih hi.

⁷²Dangkaeng leh dangka sang tampi sangin na kama dan pawt keia ding a hoihjaw hi.

⁷³Na khutin honsiamin, honsek ahi: na thupiakte ka zil theihna dingin theihsiamna honpiain.

⁷⁴Nangmah lauten honmu ding ua, a kipak ding uh; na thu ka lamet gige jiakin.

⁷⁵TOUPA aw, na vaihawmte a dik chih leh, nang ginom takin ahi, non hihgim chih ka thei hi.

⁷⁶Na sikha kianga na thuchiam bang jelin hehpihtakin na chitna ka khamuanna ding hihen.

⁷⁷Ka hin theihna dingin na chitnate ka kiangah hongpai hen: na dan tuh ka kipahna ahi ngala.

⁷⁸Kisathei zahlakin om uhen; dikloupiin honhihniamta ngal ua: himahleh na thuzohna thute ka ngaihtuah ding hi.

⁷⁹Nang honlaute keilam hongnga uhen, na thutheihsakte a thei ding uhi.

⁸⁰Ka zahlak louhna dingin ka lungtang na thusehte ah hoihkimin om hen.

⁸¹Ka hinna na hotdamna ngaiin a baha: himahleh na thu ka lamen gige hi.

⁸²Na thu etnain ka mit a vai khintaa, nang chikchianga hon khamuan ding na hia? Ka chi, ka chi –a

⁸³Meikhu uk savun thawl bang ka nahita ngala; himahleh na thusehte ka mangngilh kei hi.

⁸⁴Na sikha kum chiang ding bangtan hi ding ahia, honsimmohte tungah chikchiangin ahia vai na hawm ding?

⁸⁵Mi kisathei, na dan banga om louten ka kiakna dingin kokhukte bang a tou ua.

⁸⁶Na thupiak tengteng a ginom ahi: amau diklou piin honsimmoh nak uh; honpanpihin.

⁸⁷Amau tuh leiah na honhihmang dekdek ua; himahleh na thuzohna thute lah ka kiheisan ngal kei hi.

⁸⁸Na chitna bang jelin honhihhalhin: huan, na kama thutheihsak ka jui ding hi.

⁸⁹TOUPA aw, khantawn adingin na thu tuh van ah kiptakin a om hi.

⁹⁰Na ginomna suan tengteng phain a om ding hi: leilung na hihkipa, a om gige hi.

⁹¹Huaite tuh tuiin na vaihawmte bangin a om gige a thil tengteng lah na sikhate ahi ngal ua.

⁹²Na dan ka kipahna hi kei lejaw, ka gimthuakna a mangthangta ding hi inga.

⁹³Na thuzohna thute tuh chikpeuhin leng ka mangngilh kei ding: nang lah huaitein nonhilhhalhta ngala.

⁹⁴Nanga ka hi, honhondamin; na thuzohna thute lah ka zong ngala.

⁹⁵Mi gilou-salouten honhihmang tumin honngak nak ua; himahleh na thutheihsakte ka ngaihtuah ding hi.

⁹⁶Hoihkimna tengteng tawpna ka muta; na thupiak tuh a za ngei e.

⁹⁷Aw, na dan deih hi natel ing e! nituma ka ngaihtuah nak tuh ahi.

⁹⁸Na thupiakten hondoute sanga piljaw in honbawla; khantawna ka kianga a om gige nak jiakin.

⁹⁹Honhilhte tengteng sangin pilna ka nei jaw ahi; na thutheihsakte ka ngaihtuah a hih nak jiakin.

¹⁰⁰Tekte sangin ka theisiam jaw ahi, na thuzohna thute ka vom hoih jiakin.

¹⁰¹Na thu ka zuih theihna dingin lampi gilou himhim ah ka khete a kalsuan ka phal kei hi.

¹⁰²Na vaihawmna lak apat ka pial kei; nang non hilh jiakin.

¹⁰³Na thute ka kama dingin khum hina tele! ahi, ka kama dingin khuaiju sangin a khumjaw hi.

¹⁰⁴Na thuzohna thute jiakin theihsiamna ka nei jel: huaijiakin omdan diklou peuhmah ka hua hi.

¹⁰⁵Na thu tuh ka khe adingin khawnvak ahi a, ka lampi adingin vakna ahi.

¹⁰⁶Na vaihawmna diktatte jui dingin ka kichiama, ka hihkip lai hi.

¹⁰⁷Nakpi taka hihhaksatin ka oma; TOUPA aw, na thubang jelin honhihhalhin.

¹⁰⁸TOUPA aw, hehpih takin ka kam deihthu-a thilpiakte na sang inla, na vaihawmnate honhilhin.

¹⁰⁹Ka hinna ka khut ah a om naknaka; himahleh, na dan ka mangngilh ngeikei hi.

¹¹⁰Migilou-salouten ka awkna dingin thang a kam ua; himahleh na thuzohna thute ka vakmang san kei hi.

¹¹¹Na thutheihsakte khantawna gouluah din ka la a; ka lungtang hihnuampen ahi ngala:

¹¹²Khantawnin, a tawp phain, na thusehte banga hih dingin ka lungtang ka hoihsak hi.

¹¹³Lungsim kiplou neite ka hua a: Na dan tuh ka deih ahi.

¹¹⁴Nang ka bukna mun leh ka phaw na hi a; na thu ka lamet ahi.

¹¹⁵Nou thil hoihlou hihte aw, hongpaisan un; ka Pathian thilpiakte ka vom hoih theihna dingin.

¹¹⁶Ka hin theihna dingin na thu bang jelin honlen nilouh inla, ka lamet tungah zahlakin honomsak ken.

¹¹⁷Honkaiin, huchiin ka bit dinga, na thusehte ka khawksa gige ding ahi.

¹¹⁸Na thusehte vakmang sante tengteng na musita; a khemna ulah juau ahi ngala.

¹¹⁹Leia mi gilou-salou tengteng banghiam ek sia bangin a hihmang jela: huaijiakin na thutheihsakte ka deih ahi.

¹²⁰Ka sa nangmah lauin a linga: na vaihawmnate leng ka lau hi.

¹²¹Vai ka hawma, diktakin ka hih jel ahi: honnuaisiahte lakah honngeingaih lou ken.

¹²²Na sikha tungtang thu ah, a hoihna a bultum in: kisatheiten honnuaisiah kei uhen.

¹²³Na hotdamna etnain ka mit a vaikhinta a, na thu diktat tak etna tohin.

¹²⁴Na chitna bang jelin na sikha tungah hih inla, na thusehte honhilh in.

¹²⁵Na sikha ka hi a, theihsiamna honpia in; na thutheihsakte ka theihna dingin.

¹²⁶TOUPA, sep a hunta; na dan bangmahlouin a bawlta ngal ua.

¹²⁷Huaijiakin na thupiakte dangkaeng sangin ka deih ahi; ahi, dangkaeng siangthou sangin leng.

¹²⁸Huaijiakin thil peuhmah thu-a na thuzohna thu tengteng tuh dikin ka theia; omdan dikou peuhmah ka hua ahi.

¹²⁹Na thutheihsakte a lamdang ahi: huaijiakin ka hinnain a vom hoih gige a.

¹³⁰Na thu hilhchetin mite a hihvaka: mi mawlte a theisiam sak jel hi.

¹³¹Ka kam zapiin ka kaa, ka ha hawphawpa: na thupiakte ka lunggulh jiakin.

¹³²Kei lam honga inla, honhehpih in, na min deihte na hehpih bangin.

¹³³Ka khe kalsuante na thu-ah hihkip inla; gitlouhna himhim ka tungah thu neisak ken.

¹³⁴Mihing nuaisiahna lakah honhumbit in; huchiin na thuzohna thute ka jui ding hi.

¹³⁵Na melin na sikha sunvak inla; na thusehte honhilhin.

¹³⁶Ka khitui lui tui bangin a luang khia a, na dan a zuih louh jiakun.

¹³⁷TOUPA aw, nang na dika, na vaihawmte leng a dik ahi.

¹³⁸Na thutheihsakte tuh diktat tak leh ginom mahmahin thu na piaa.

¹³⁹Ka phattuamngaih nain honhih mangthangta, hondouten na thu a mangngilhtak jiakun.

¹⁴⁰Na thu sianthou mahmah ahi; huaijiakin na sikhain a deih hi.

¹⁴¹Mi neu leh mi muhsit ka hi a: himahleh na thuzohna thute ka mangngilh ngeikei hi.

¹⁴²Na diktatna khantawn diktatna ding ahi a, na dan leng thutak ahi.

¹⁴³Mangbatna leh lunglaunain hon buak khumta a; himahleh na thupiakte tuh ka kipahna ahi.

¹⁴⁴Na thutheihsakte khantawn adingin a dik ahi: theihsiamna honpia in, huchiin, ka hing gige ding hi.

¹⁴⁵Ka lungtang tengtengin kon sama; TOUPA aw, hondawng in: na thusehte ka kem hoih ding hi.

¹⁴⁶Kon sam jela; hondawng in, huchiin na thutheihsakte ka jui ding hi.

¹⁴⁷Phalvak main ka thou-a, huhna deihin ka kikou-a; na thute ka lamen hi.

¹⁴⁸Na thu ka ngaihtuah theihna dingin jan vente main, ka mitte a hak uhi.

¹⁴⁹Na chitna bang jelin ka aw ngaikhia inla; TOUPA aw, na vaihawmnate bang jelin honhihhalh in.

¹⁵⁰Ngaihtuah gilou delhten a honnaih ua: amau jaw na dan gamlata om ahi uhi.

¹⁵¹TOUPA aw, nang jaw na naia; na thupiak tengteng thutak ahi.

¹⁵²Nidanglaiin, na thutheihsakte akipanin, huaite khantawn adinginna hihkip chih ka na theita hi.

¹⁵³Ka haksatna ngaihtuah inla, honhumbit in; na dan lah ka mangngilh ngei ngal keia;

¹⁵⁴Ka thu hon genpih inla, hontan in na thu bang jelin honhihhalh in.

¹⁵⁵Hotdamna tuh mi gilou-saloute lakah a gamla ahi: na thusehte a zuih louh jiakun.

¹⁵⁶TOUPA aw, na chitnate tuh a thupi ahi; na vaihawmnate bang jelin honhihhalh in.

¹⁵⁷Honsimmohte leh hondoute tampi ahi ua, himahleh na thutheihsakte ka pai kawi san kei hi.

¹⁵⁸Lepchiah taka hihte ka ena, ka lungkim kei hi; na thu a zuih louh jiakun.

¹⁵⁹Na thuzohna thute ka deihdan ngaihtuah inla, TOUPA aw, na chitna bangbangin honhihhalh in.

¹⁶⁰Na thu kigawmkhawm tuh thutak ahi a; na vaihawmna diktat chiteng leng khantawnin a om nilouh ding hi.

¹⁶¹Mi lianten a jiak omlou in hon simmoh ua: himahleh ka lungtang in na thute ahi, a kihtak.

¹⁶²Na thu ah nuam kasa a, thil thupipi gallaka mu bangin.

¹⁶³Juau thu ka huain ka kih a; na dan bel ka deih ahi.

¹⁶⁴Ni khatin sagih vei kon phat jel ahi, na vaihawm diktatte jiakin.

¹⁶⁵Na dan deihten khamuanna thupitak a nei ua; pukna himhim a neikei uhi.

¹⁶⁶Toupa aw, na hotdamna ka lamen a, na thupiakte bangin ka hih jel hi.

¹⁶⁷Ka hinnain na thutheihsakte a jui gige a: ka deih mahmah hi.

¹⁶⁸Na thuzohna thute leh na thutheihsakte thu ka jui jela; ka omdan tengteng na maa om ahi ngala.

¹⁶⁹Toupa aw, kon sap husa na maah hongnai hen: na thu bangbangin theihsiamna honpia in.

¹⁷⁰Hehpih ka ngetna na maah tung hen: na thu bangbangin honhumbitin.

¹⁷¹Ka mukin phatna thu gen hen: nang na thusehte non zilsak jel jiakin.

¹⁷²Ka leiin na thu phatin lasa hen; na thupiak tengteng diktatna a hih jiakin.

¹⁷³Na khut thu honpanpih dingin mansain om hen: na thuzohna thute lah ka telta ngala.

¹⁷⁴Toupa aw, na hotdamna ka lunggulh naka; na dan ka kipahna ahi.

¹⁷⁵Ka hinna thu hing hen, huchiin a honphat ding hi; na vaihawmnaten leng honpanpih hen.Belam mang bangin ka vak manga; na sikha zong in; na thupiakte lah ka mangngilh nei ngal keia.

¹⁷⁶Belam mang bangin ka vak manga; na sikha zong in; na thupiakte lah ka mangngilh nei ngal keia.