Read Paite Psalms 135 Bible Online

Psalms 135 - Paite bible

Psalms 135

¹Toupa phat un. Toupa min tuh phat un; Toupa sikhate aw, amah tuh phat un:

²Nou Toupa ina dinga, I Pathian in huangsung intuala dingte a,

³Toupa phat un; Toupa lah a hoih ngala; A min phatin lasa un, a nuam ngala.

⁴Toupan Jakobte amah adingin a tel ngla, Israelte a goutuam dingin a tel hi.

⁵Toupa tuh thupi tak ahi chih leh, i Toupa tuh Pathian tengteng sangin a tungnung ahi chih, I thei ngala.

⁶Toupan a ut peuhmah a hih jela, van khawngah, lei khawngah, tuipi khawngah, tuithukpi tengteng khawngah leng.

⁷Aman meipite tuh kawlmong akipanin a paitou saka; khophiate vuahin a siam hi; a sunin akipante bangin huih a la khe jel hi.

⁸Aman Aigupta gam ta masate a hihluma, mihing leh sate leng.

⁹Aigupta gam aw, amah chiamtehnate leh thillamdangte na sungah a honsawla, Pharo tungah leh a sikha tengteng tungah.

¹⁰Aman nam tampi a hihluma, kumpipa thupi taktakte a thata.

¹¹Sihon Amorte kumpipa leh Og Bashan gam kumpipa leh, Kanaan gama mi tengteng.

¹²A gam uh gouluah dingin a pia a, a mi Israelte goutan dingin.

¹³Toupa aw, na min tuh khantawnin a om dinga; Toupa aw, nangmah theihgigena tuh suan om sung tengtengin leng a om ding hi.

¹⁴Toupan a mite vai a hawmsakin, a sikhate tungthu-ah a lungsim lah a kisik dek ngala.

¹⁵Nam chih milimte tuh dangka leh dangkaeng ahi ua, mihing khutsuak ahi uhi.

¹⁶Kam bang a nei ua, lah a pau ngal kei ua; mitte a nei ua, lah a mu ngal kei ua;

¹⁷Bilte a nei ua, lah a za ngal kei ua; a kam uah lah hatna himhim a om sam kei hi.

¹⁸Huaite bawlte tuh huaite bangin a om ding uh, a chi, huaite gingta peuhmahte.

¹⁹Israel inkuanpihte aw, Toupa tuh phat un: Aron inkuanpihte aw, Toupa tuh phat un:

²⁰Levi inkuan pihte aw, Toupa tuh phat un; Toupa laumite aw, Toupa tuh phat un.Toupa Zion akipanin phatin om hen, Jerusalema tengpa ngei, Toupa phat un.

²¹Toupa Zion akipanin phatin om hen, Jerusalema tengpa ngei, Toupa phat un.