Read Paite Psalms 139 Bible Online

Psalms 139 - Paite bible

Psalms 139

¹Toupa aw, nang ngentel takin non ensuaka, non theita hi.

²Nang ka tut leh ka din na thei naknaka, ka ngaihtuahna tuh gamlapi akipanin leng na thei thei hi.

³Ka pai leh ka lup non entel jela, ka omdan tengteng na thei vek hi.

⁴Ngaiin, Toupa aw, nang na theih siang vek louh, ka lei ah thu himhim a om kei hi.

⁵Nang ka nunglam leh ka mallamah non umsuaka, ka tungah na khut na koih lai hi.

⁶Huchitela theihna kei dingin a lamdang lua a; a sang tela, ka pha zou kei hi.

⁷Na kha kiang akipanin koiah ka pai dia? Na ma akipan koiah ka tai mang dia?

⁸Van ah kahtou ning chileng, huaiah lah na om ngala: Sheol ah lupna bawl ning chileng ngaiin, huaiah leng na om jel ngala.

⁹Jing kha jakin, tuipi tawp pekah vaom ning chi leng;

¹⁰Huaiah leng na khutin non pi dinga, na khut taklamin honlen ding ahi ngala.

¹¹Pellouin mialin honkhuh zouvek ding a, ka kima vak tuh jan ahi ding chi dek lengleng;

¹²Mialin leng nang lakah bangmah a liah keia, jan lah sun bangin a vakjaw ahi: nang dingin mial leh vak a kibang salpsap hi.

¹³Nangmah ngeiin ka lungsim na neia: ka nu gilsungah non phankhawm hi.

¹⁴Na kiangah kipahthu kon hilh dinga; lauhuai tak leh lamdang pi-a bawl ka hih jiakin: na thilhihte lah lamdang tak ahi a; huai tuh ka hinnain a theitel mahmah hi.

¹⁵A guka bawla ka oma, lei mun nuainungpena kilawmtaka bawla ka om laiin, ka guh ka tang nang lakah selin a om kei hi.

¹⁶Ka lim kibawl kim nailou tuh na mitin a mu-a, na laibu ah ka hiangte tengteng gelh vek ahi, ani sima bawlin a om jela, khat leng a om nai louh laiin.

¹⁷Pathian aw, na ngaihtuahnate kei adingin manpha hina tele! a gawmkhawmna thupi hina tele!

¹⁸Sim dek mahleng, a tamdan tuh piaunel sangin a tam zo ding: ka khanloh aleh, na kiangah ka om nilouh naknak ahi.

¹⁹Pathian aw, mi gilou-saloute na thah ngei dinga; huchiin sisan suah hat miten honpaisan ding.

²⁰Amau tuh gilou takin nang a hon gensia un, nangmah douten na min tuh a genthanghuai nak uhi.

²¹Toupa aw, nangmah hote ka ho kei ahia? Nangmah sualte tungah ka lung kim lou kei ahia?

²²Amau tuh huat petmahin ka huaa: hondoute dingin ka sep chiat hi.

²³Pathian aw, ngentel takin honen suak inla, ka lungtang thei in: honchian inla, ka ngaihtuahnate thei in.Huan, kei ah gilou-salou lam mawngmawng a om hiam om lou, en inla, khantawn lampi ah honpi in.

²⁴Huan, kei ah gilou-salou lam mawngmawng a om hiam om lou, en inla, khantawn lampi ah honpi in.