Read Paite Psalms 25 Bible Online

Psalms 25 - Paite bible

Psalms 25

¹TOUPA aw, ka lungsim na kiangah ka koih den jela.

²Ka Pathian aw, nang ka honmuang hi, zahlakin honomsak kenla; hondoute honzoh phal ken.

³A hi, nang honngak himhim kuamah zahlakin a om kei ding uh. A jiak om lou-a lepchiah taka gamtate jaw zahlakin a om ding uh.

⁴TOUPA aw, na lampite hontheisak inla; na lamtate tanchin honhilhin.

⁵Na thutak ah hopi inla, hon hilhin. Nang hon hondampa Pathian na hi ngala: nitumin kon ngak nilouh hi.

⁶TOUPA aw, na lainatna leh na chitnate theigige in; tuma a na om tawntung sa ahi ngala.

⁷Ka valnou lai khelhnate leh ka tatleknate theigige kenla; TOUPA aw: na hoihna jiakin, na chitna bang jelin hontheigige in.

⁸TOUPA jaw a hoih in a dik ahi: huai jiakin mi khialte lampi a musak ding hi.

⁹Thunuailutte tuh vaihawmna dikah a pi dinga: thunuailutte tuh amah lampi tanchin leng a hilh ding hi.

¹⁰A thukhun leh a thutheihsakte juite adingin TOUPA lampi tengteng tuh chitna leh thutak ahi.

¹¹TOUPA aw, na min jiakin ka thu limlouhna ngaidamin, thupi tak ahi ngala.

¹²TOUPA laudan siam mi kua ahia? Huai mi tuh a lampi tel ding a musak ding hi.

¹³A hinna tuh nuamsatakin a om ding; a suanten gam tuh a luah ding uhi.

¹⁴TOUPA thuguk amah laudansiamte kiangah a om, a thukhun tuh amaute a theisak ding hi.

¹⁵Ka mitin TOUPA lam a en gige a: aman ka khete len akipanin a lakhe ding ahi ngala.

¹⁶Kei lam hongnga inla, honhehpihin; chim leh haksatakin ka om ngala.

¹⁷Ka lungtang buainate a hongthupita a; ka mangbatna akipan honpi khiain aw.

¹⁸Ka haksatna leh ka thuakdan ngaihtuah inla, ka khelhna tengteng ngaidamin.

¹⁹Hondoute ngaihtuah dih, tampi ahi ua: nakpi petmahin a honhua behlap uhi.

²⁰Ka hinna vom hoih inla, hon humbit in aw: zahlakin honomsak kenla, nang ah ka ginna ka koih ngala.

²¹Ka lungsim hoihna leh ka diknain honhumbitin. Ka honngak nilouh ngala.Pathian aw, Israelte a mangbatna tengteng ua kipan tankhia in.

²²Pathian aw, Israelte a mangbatna tengteng ua kipan tankhia in.