Read Paite Psalms 34 Bible Online

Psalms 34 - Paite bible

Psalms 34

¹Chiklai peuhin leng Toupa tuh ka phat dinga: amah phatna ka kam ah a pawt gige ding hi.

²Ka hinna in Toupa a suang dinga: thunuailutten huai a za ding ua, a kipak ding uhi.

³Aw, Toupa hon phatpih unla, a min pahtawi chiat ni.

⁴Toupa ka zonga huan aman hon dawnga, ka kihtaklam peuhmah lakah a hon humbit ahi.

⁵Amah a en ua, huan, a hong vakta uhi; a melte uh chikmah in a zum kei ding.

⁶Hiai mi genthei a kikou a, huan Toupan a ja a, a mangbatna tengtengah a honkhe ta hi.

⁷Amah laudansiamte tuh, a kim a vel uah Toupa angelin a om khuma, a humbit jel.

⁸Aw, Toupa hoihdan chiam him dih ua: amaha muanna koih mi a hampha hi.

⁹A mi siangthoute aw, Toupa laudansiam un: amah laudansiamte a ding in taksapna himhim a om louh jiak in.

¹⁰Humpinelkai lunlaite tuh a tasam un a gilkial naknak uhi: Toupa zongte jaw thil hoih himhim a tasam kei ding uhi.

¹¹Kisa un, naupangte, ka thu ngaikhia un: Toupa laudan ka honhilh ding hi.

¹²Hoihna a muh theihna ding un, hinna deiha damsawt ut mi kua ahia!

¹³Na lei tuh gilou lakah veng hoih inla, na muk tuh khemna thu genlou dingin veng hoih in.

¹⁴Gilou paisan inla, thilhoih hih in; lemna zong inla, a delhin delh in.

¹⁵Toupa mit in mi diktatte lam a en gige a, a bilin a sap uh za ding in a ngaikhe gige hi.

¹⁶Toupa melin thilhihkhialte a dou naknaka, amau theih gigena tuh lei akipana hihmangthang dingin.

¹⁷Mi diktatte a kikou ua, huan Toupan a naja a, a mangbatna tengteng uah a honkheta hi.

¹⁸Toupan lungtang khasiate a vanaih jeljel a, lungsima kisik peuhmahte a hondam jeljel hi.

¹⁹Mi dik haksatnate a tama, himahleh Toupan huai tengtengah a honkhe gige ahi.

²⁰A guh tengteng a kem hoih a, khat lel leng hihtan ahi kei hi.

²¹Thil hoihlou in mi gilou-saloute a hihlum dinga: dik hoten siamlouh a tang ding uhi.Toupan a sikhate hinna a tan ngitnget a; amaha muanna koihte tuh khat leng siamlouh tang a om kei ding uhi.

²²Toupan a sikhate hinna a tan ngitnget a; amaha muanna koihte tuh khat leng siamlouh tang a om kei ding uhi.