Read Paite Psalms 44 Bible Online

Psalms 44 - Paite bible

Psalms 44

¹Pathian aw, nidang laia a damlai ua na thilhihte ka pipute un honhilh uh ka bil un ka ja ua.

²Namte na khutin na hawlkhiaa, amau na phuta; miten a sugima, na paikhia.

³Gam luah dinga amau namsaua a lak uh ahi kei a, amau bana kihumbit leng ahi kei uhi; a tung ua na kipah jiakin na khut taklam leh, na ban leh, na mel vakin ahi jaw.

⁴Pathian aw, nang ka Kumpipa na hi: Jakob humbitna dingin thu pia in.

⁵Nangmah jiakin ka melmate uh ka si pai ding ua; na min jiakin honsualte ka chil ekek ding uhi.

⁶Ka thalpeu ka muang kei dinga, ka namsauin honhondam sam kei ding.

⁷Hondoute lak ah nang non hondam zota hi, honhote na zaklaksak behlap hi.

⁸Nitumin Pathian ka suang ding ua, na min khantawn in ka phat ding uhi. Selah.

⁹Tun jaw nang non khah khia a, non hihzum a; ka sepaih honte u lakah lah na pawtkhe ngeikei hi.

¹⁰Melmate lakah non taijak saka: honhoten sum a deihdeih uh a lauhi.

¹¹Nang nek ding a seh belam bang in non pia a; namchih lakah non hihdalh behlap hi.

¹²Na mite bangmahlou in na khawngta a, a man uh lah a tam het kei hi.

¹³Nang ka kim ua mite gensiatin non omsaka, ka kiangnai ua mite muhsit leh nuihsan in non omsak.

¹⁴Nang namchih lakah a selam gentehna in non omsaka, michih laka mite lu sinsanin non omsak hi.

¹⁵Ka zumna nitum in ka maah a om gige a, ka zahlaknain hon tuam zouta hi.

¹⁶Genthangmi leh gense mi aw jiak leh, melma leh phulami jiakin.

¹⁷Huai tengteng ka tunguah a tunga; himahleh kon mangngilh ngeikei ua, na thukhun ah juauin ka hih ngeikei uhi.

¹⁸Ka lungtang uh a kihei nawn kei a, ka kalsuante un na lampi a paisan ngeisam kei hi.

¹⁹Nang sehalte omna ah non bawl ek a, sihna lima non tuamna ding in.

²⁰I Pathian min i mangngilh hiam, gamdang Pathian lamah i khutte i jak hiam.

²¹Pathian in huai tuh a zong khe kei dia hia! Lungtang thugukte a thei gige ngala.

²²Ahi, nangmah jiakin nitumin thah in ka om gige ua; belam goh dingte banga seh ka hi uhi.

²³Toupa aw, halh tanla, bangachia ihmu! hak inla, khantawnin hon khah khe ken.

²⁴Bangjiakin ahia na mai na sela, ka haksatdan u leh nuaisiah ka thuakdan uh na mangngilh nak.

²⁵Ka hinna uh leivui siin a kun a; ka gilpi uh lah leiah a belh bikbek ngala.Honpanpih dingin thou inla, na chitna jiakin hon tan in.

²⁶Honpanpih dingin thou inla, na chitna jiakin hon tan in.